JINGKHEIÑ 35
35
Ki nongbah jong ki Lebi
1 #
Leb. 25:32-34; Jos. 21:1-42. Te U Trai u la kren ha u Moses ha ki pyntha ka ri Moab, harud ka Jordan, marpyrshah ka Jerikho, U da ong, 2“To hukum ïa ki khun Israel, ba kin ai ha ki Lebi na kata ka bynta trai ka jingïoh pateng jong ki, ïa ki nongbah ba kin ïashongneh ha ki; bad phin ai ruh ha kita ki Lebi, ïa ki rudnong hajan kita ki nongbah baroh sawdong ïa ki. 3Te ïa kita ki nongbah kin ïoh, ba kin ïashongneh ha ki; bad kita ki rudnong jong ki, kin long ïa ki jingri jong ki, bad ïa ki spah jong ki, bad ïa ki mrad jong ki baroh. 4Bad kita ki rudnong jong kita ki nongbah, ïa kiba phin ai ha kita ki Lebi, kin kot naduh ka kynroh ka nongbah shabar shi hajar pruh baroh sawdong. 5Te phin thew na shabar kata ka nongbah ha ka phang mihngi, ar hajar pruh, bad ha ka phang shathie, ar hajar pruh, bad ha ka phang sepngi, ar hajar pruh, bad ha ka phang shatei, ar hajar pruh, te kata ka nongbah kan long hapdeng. Kane keiñ kan long ki rudnong jong kita ki nongbah ha ki. 6#Deu. 19:1-13.Te na kita ki nongbah ïa kiba phin ai ha kita ki Lebi, hynriew tylli, kin long ki nongbah jaka rieh, ïa kiba phin buh ba u nongpynïap briew u lah ban phet ïap hangta: bad nalor kita, phin pyntam sa sawphew ar ki nongbah. 7Kita ki nongbah baroh ïa kiba phin ai ha kita ki Lebi, kin long sawphew phra ki nongbah, ïa kita keiñ, lem bad ki rudnong jong ki. 8Bad kita ki nongbah ïa kiba phin ai na ka jingïoh pateng ki khun Israel, na kita kiba bun, phin shim shibun; bad na kita kiba khyndiat, phin shim khyndiat: uwei uwei baroh un ai na la ki nongbah ha kita ki Lebi katba shong ka bynta pateng jong u, ïa kaba u la ïoh pateng.”
Ki shnong jaka rieh
(Deu. 19:1-13; Jos. 20:1-9)
9 #
Jos. 20:1-9. Bad U Trai u la kren ha u Moses, U da ong, 10“To kren ha ki khun Israel, to ong ruh ha ki, ‘Ynda phi la poi sha shiliang ka Jordan ha ka ri Kanaan, 11te phin ïabuh ki nongbah, ban long ki nongbah jaka rieh ïa phi; ba u nongpynïap briew uba la kum pynïap ïa u briew, u la lah ban phet ïap hangta. 12Te kine ki nongbah, kin long ki jaka rieh ha phi na u nongpynhiar kput ka snam; ba yn ym pynïap ïa uta u nongpynïap briew, tad ynda u la ïeng ha ka jingbishar ha khmat uta u paidlang. 13Te na kine ki nongbah ïa kiba phin ai, hynriew tylli ki nongbah, kin long ki jaka rieh ha phi. 14Lai tylli ki nongbah, phin ai shaphang shane ka Jordan, bad lai tylli ki nongbah, phin ai ha ka ri Kanaan; kin long ki nongbah jaka rieh ha phi. 15Kine ki hynriew tylli ki nongbah, kin long ki jaka rieh, ïa ki khun Israel, bad ïa u sohshnong, bad ïa u nongwan hap hapdeng jong ki de: ba uno uno baroh uba kum pynïap ïa u briew, u lah ban phet ïap hangta.
16“ ‘Te lada u shoh ïa u da ka atiar nar, ba kumta u ïap noh, u long u nongshohnoh: ïa uta u nongshohnoh, yn pynïap noh shisha. 17Te lada u lynthem ïa u da u maw, ba kumta u lah ban ïap, te lada u ïap noh, uta u long u nongshohnoh: ïa uta u nongshohnoh, yn pynïap noh shisha. 18Lane lada u shoh ïa u da u sping, da kaba u lah ban ïap, bad lada u ïap noh, uta u long u nongshohnoh: ïa uta u nongshohnoh, yn pynïap noh shisha. 19Dei uta u nongpynhiar kput ka snam hi u ban pynïap ïa uta u nongpynïap briew: haba u shem ïa u, un pynïap noh ïa u. 20Bad lada u khynñiat ïa u, na kaba shun, lane ba u shat ha u, ba u da leh khnang, ba kumta u ïap; 21lane na kaba shun u da shoh ïa u da ka kti jong u, ba kumta u ïap: ïa uta uba la shoh ïa u, yn pynïap noh shisha; naba u long u nongshohnoh: u nongpynhiar kput ka snam, un pynïap noh ïa uta u nongshohnoh, haba u shem ïa u.
22“ ‘Hynrei, lada u kum khynñiat kyndit ïa u, khlem ka jingshun, lane lada u la shat ei ei ruh ha u, khlem da leh khnang, 23lane da u maw, da kaba u lah ban ïap, te haba um ïohi ïa u, u la pyndei ïa uta ha u, ba kumta u ïap, haba um long u nongshun jong u, bad ba um wad khnang ïa ka ban pynsniew ïa u: 24te kumta, to ai ba uta u paidlang un bishar hapdeng uta u nongpynïap briew bad u nongpynhiar kput ka snam katba kum kine ki jingbishar: 25bad uta u paidlang un pyllait noh ïa uta u nongpynïap briew na ka kti jong uta u nongpynhiar kput ka snam, bad uta u paidlang un pynphai pat ïa u sha ka nongbah jaka rieh ka jong u, sha kaba u la phet ïap: te un ïaishong sah hangta ha ban da ïap u rangbah lyngdoh ïa uba la pynsleh lyngdoh, ïa uba la pynsleh da ka umphniang bakyntang, 26hynrei, lada uta u nongpynïap briew un leit palat ïa ka pud ka nongbah jaka rieh jong u, sha kaba u la phet ïap; 27te lada uta u nongpynhiar kput ka snam un shem ïa u shabar kata ka pud ka nongbah jaka rieh jong u, bad lada uta u nongpynhiar kput ka snam un pynïap noh ïa uta u nongpynïap briew; wat tei pop ka snam halor jong u: 28namar ka la dei keiñ ïa u, ban shong sah hapoh kata ka nongbah jaka rieh jong u haduh ka jingïap uta u rangbah lyngdoh: hynrei, ynda u la ïap uta u rangbah lyngdoh, uta u nongpynïap briew u lah ban leit phai pat sha ka ri ka bynta trai jong u.’
Ka aiñ kaba ïadei bad ki sakhi bad ka kuna
29“Kumta, kine kin long ka hukum ka jingbishar ha phi ha ki jingkha pateng baroh jong phi ha ki ïing jong phi baroh. 30#Deu. 17:6; 19:15.‘Uno uno ruh u ban pynïap ïa u briew, ïa uta u nongpynïap briew yn pynïap na ka shyntur ki sakhi: hynrei, tang uwei u nongsakhi um bit ban sakhi pyrshah ïa u briew ba un ïap. 31Nalor kata ruh, to wat shim kuna na ka bynta ka jingim u nongshohnoh, ïa uba la pynrem ban ïap: hynrei shisha to pynïap duh ïa u. 32To wat shim kuna ruh na uta uba la phet ïap noh sha kata ka nongbah jaka rieh jong u, ba un ïoh wan phai pat ban shongneh ha ka ri, haduh ka jingïap uta u lyngdoh. 33Ba phin ym pyntngit sang ïa ka ri ha kaba phi shong: namar kane ka snam kan pyntngit sang ïa ka khyndew: bad yn ym lah pynkhuid ïa kata ka khyndew na kata ka snam ïa kaba la theh ha ka, hynrei, tang da ka snam jong uta uba la theh ïa ka. 34Namar kata, to wat pyntngit sang ïa ka khyndew ha kaba phin ïashongneh, hapdeng kaba nga shongneh ma nga: namar nga U Trai, nga shongneh hapdeng ki khun Israel.’ ”
Currently Selected:
JINGKHEIÑ 35: KHB
Highlight
Copy
Compare
Share
Want to have your highlights saved across all your devices? Sign up or sign in
The Bible Society of India
