JINGKHEIÑ 14

Ki paidbah ki ïaleh pyrshah ïa U Blei

1Ynda kumta, uta u paidlang baroh u la pyrta jam, bad u la kyang lynñiar; bad kita ki briew ki la ïam ha kata ka miet. 2Te ki khun Israel baroh, ki la ïakren khñium pyrshah ïa u Moses, bad pyrshah ïa u Aaron: bad uta u paidlang baroh, u la ong ha ki, “A suk ba ngin da la lah ïap noh ha kata ka ri Ijipt!” lane “A suk ba ngin da la lah ïap noh ha kane ka ri khlaw! 3#Ki Kam. 7:39.Te balei ba U Trai u la wallam ïa ngi sha kane ka ri, ba ngin hap da ka waitlam? ki tnga, bad ki khun jong ngi, kin long ka jinglute: hato ym kham bha, ba ngin ïaphai pat sha ka ri Ijipt?”

4Te ki la ïa-ong paralok hi, “To ïa, ngin ïathung ïa u nongïalam, bad ngin ïaleit phai pat sha ka ri Ijipt.” 5Hynrei, u Moses bad u Aaron, ki la dem ngon la ki khmat ha khmat ka jingïaseng baroh u paidlang ki khun Israel. 6U Joshua u khun u Nun ruh, bad u Kaleb u khun u Jephunneh de, kiba na kita kiba la ïakhmih syntiat ïa kata ka ri, ki la kad ïa la ki jaiñ: 7ki la kren ruh ha uta u paidlang baroh ki khun Israel, ki da ong, “Kata ka ri, ba ngi la ïaid lyngba ban khmih syntiat ïa ka, ka long ka ri ka babha eh shikatdei. 8Lada U Trai u sngewbha ïa ngi, te un ïalam ïa ngi sha kata ka ri, un ai ruh ïa ka ha ngi; ka ri keiñ kaba shlei da ka dud, bad ka ngap. 9#Heb. 3:16.Tangba phin ym ïaleh pyrshah ïa U Trai, lymne wat sheptieng phi ïa ki briew jong kata ka ri; namar ki long kpu ïa ngi: ka jingïada ïa ki, ka la kynriah noh na ki, hynrei, U Trai u don lem bad ngi: to wat sheptieng te ïa ki.” 10Hynrei, uta u paidbah baroh, u la ong ban lynthem ïa ki da ki maw.

Te ka burom U Trai ka la paw ha Ka Tabernakl ka jingïaseng ha khmat ki khun Israel baroh. 11#Eks. 32:9-14,31-35.Te U Trai u la ong ha u Moses, “Haduh katno kine ki briew kin ïa-pynbitar ïa nga? tad lano ruh kin long ki bymngeit ha nga, namar kita ki dak phylla baroh ba nga la leh hapdeng jong ki? 12Ngan shoh ïa ki da kaba ïapthem, bad ngan pynsaphred ruh ïa ki, te ïa me, ngan pynlong ka jaid bynriew kaba kham khraw, bad kaba kham khlaiñ ruh ïa ki.”

13 # Eks. 32:11-14. Te u Moses u la ong ha U Trai, “Kumta ki Ijipt kin ïohsngew; namar me la wallam ïa kine ki briew da ka borbah jong me napdeng jong ki. 14Kin ïathuh ruh ha ki trai-shnong kane ka ri: namar ki la ïohsngew ba me U Trai, me long hapdeng kine ki briew; bad ba me U Trai, me paw markhmat markhmat, bad ba u lyoh jong me, u sah halor jong ki, bad ba me leit ha shuwa jong ki ha u rishot lyoh mynsngi, bad ha u rishot ding mynmiet. 15Te lada men pynïap noh ïa kine ki briew baroh kum ïa uwei u briew keiñ, te kumta, kita ki jaid bynriew kiba la bna ïa ka nam jong me, kin ïakren, kin da ong, 16‘Namar ba U Trai um donbor ban wallam ïa kine ki briew sha kata ka ri ïa kaba u la smai ha ki, namar kata, u la pynïap noh ïa ki ha kata ka ri khlaw.’ 17Mynta te, nga kyrpad ïa me, to ai ba yn pynkhraw ïa ka bor U Trai jong nga, kat kumba me la kren, da kaba ong, 18#Eks. 20:5,6; 34:6,7; Deu. 5:9,10; 7:9,10.‘U Trai u long uba shah slem, bad uba khraw ka jingisynei, uba map noh ïa ka pop, bad ïa ka jingpalat, khlem da pynksan da lei lei ruh ïa uba rem; uba pynwan hap ïa ka pop jong ki kpa halor ki khun ki ksiew, haduh ka balai, bad ka basaw pateng bynriew.’ 19Te nga kyrpad ïa me, to map ïa ka pop jong kine ki briew, katba kum ka jingisynei ka bakhraw jong me, bad kumba me la map ïa kine ki briew, naduh ka ri Ijipt jin haduh mynta.”

Ka jingpynshitom U Blei ïa ki Israel

(Deu. 1:34-40)

20U Trai ruh u la ong, “Nga la map keiñ katba kum ka ktien jong me: 21hynrei da shisha, katba nga im, ïa ka pyrthei baroh yn pyndap da ka burom jong U Trai: 22#Heb. 3:18.Namar kita ki briew baroh kiba la ïohi ïa ka burom jong nga, bad ïa ki dak phylla jong nga ïa kiba nga la leh ha ka ri Ijipt, bad ha kata ka ri khlaw, bad kiba la pynshoi ïa nga kine shiphew sien, bad kim shym la shahshkor ruh ïa ka ktien jong nga; 23da shisha, kin ym ïohi ïa kata ka ri ïa kaba nga la smai ha ki kpa jong ki, kita baroh keiñ kiba la pynbitar ïa nga, kin ym ïohi ïa ka: 24#Jos. 14:9-12.Hynrei, u shakri jong nga u Kaleb, naba u don ka jingmut ka bapher, bad ba u la bud ïa nga biang biang, ïa u keiñ, ngan ïalam sha kata ka ri sha kaba u la leit; bad u symbai jong u kin ïoh ïa ka. 25Hynrei mynta, ki Amalek, bad ki Kanaan, ki ïashong sah ha kata ka ri them: lashai te to phai noh, to leit ruh sha kata ka ri khlaw da kata ka lynti ka Duriaw Basaw.”

26U Trai ruh u la kren ha u Moses, bad ha u Aaron, u da ong, 27“Tad lano ngan shah ïa une u paidlang basniew, uba kren khñium ïa nga? Nga la ïohsngew ïa ki jingkren khñium jong ki khun Israel, ïa kiba ki la ïakren khñium ïa nga. 28To ong ha ki, ‘Katba nga im’, u ong U Trai, ‘kat kumba phi la kren ha ki shkor jong nga, kumta ruh ngan leh ïa phi: 29#Heb. 3:17.Ha kane ka ri khlaw, ki metïap jong phi, kin kyllon ïap; bad baroh ïa kiba la ñiew katba kum ka jingkheiñ jong phi baroh, naduh uba arphew snem ka rta bad tam, kiba la kren khñium ïa nga, 30da shisha keiñ, phin ym ïoh poi sha kata ka ri, ïa kaba nga la smai da kyntiew ïa la ka kti, ïa ka ban pynshong duh ïa phi ha ka, hynrei, tang u Kaleb u khun u Jephunneh, bad u Joshua u khun u Nun. 31Hynrei, ïa ki khun khynnah jong phi, ïa kiba phi la ong ba kin long ka jinglute, ïa kita keiñ, ngan wallam sha kata ka ri, ma ki ruh, kin ïoh ithuh ïa kata ka ri ïa kaba phi la ïañiewbeiñ. 32Hynrei, ki metïap jong phi, kin kyllon ïap ha kane ka ri khlaw. 33#Ki Kam. 7:36.Ki khun jong phi ruh, kin ïaidwir kylleng la kylleng ha kane ka ri khlaw jin sawphew snem, bad kin ïakit shitom shi jot ïa ki jingïaleh nuti jong phi ha ban da la duh noh khoit ki metïap jong phi ha kane ka ri khlaw. 34Katba kum ka jingkheiñ jong kita ki sngi ba phi la ïakhmih syntiat ïa kata ka ri, sawphew sngi keiñ, ïa kawei ka sngi namar kawei ka snem, phin ïakit shitom shi jot ïa ki pop jong phi jin sawphew snem, te phin ïoh tip keiñ, ïa ka jingkylla ïa ka jingthmu jong nga.’ 35Ma nga U Trai nga la kren, da shisha ngan leh ruh ïa kata ha une u paidlang basniew baroh, uba la ïalum lang ban ïaleh pyrshah ïa nga: ha kane ka ri khlaw yn pynduh noh khoit ïa ki, hangne ruh kin ïap noh.”

Ka jingïap ki shiphew ngut ki nongsyntiat bymman

36Te kita ki briew, ïa kiba u la phah u Moses ïa ka ban khmih syntiat ïa kata ka ri, kiba la wan phai pat, bad kiba la pynlong ïa uta u paidlang baroh ïa ka ban kren khñium ïa u, da kaba ki da ai ktien budnam ïa kata ka ri, 37kita ki briew keiñ, kiba la ai ktien budnam ïa kata ka ri, ki la ïap noh da kaba ïapkhlam ha khmat U Trai. 38Hynrei, na kita ki briew kiba leit ïa ka ban khmih syntiat ïa kata ka ri, u Joshua u khun u Nun, bad u Kaleb u khun u Jephunneh, ki la ïoh im.

Ka jingshahjop ki Israel ha Hormah

(Deu. 1:41-46)

39U Moses ruh u la ïathuh ïa kine ki ktien ha ki khun Israel baroh: kita ki briew te, ki la ïam sngewsih jam eh. 40Te ki la khie la dang step ïa ka ban sa leit kiew sha kliar uta u lum, ki da ong, “Ha khmih ïa ngi, ngin ïaleit kiew ruh sha kata ka jaka ïa kaba U Trai u la kular: namar ngi la leh pop.” 41Hynrei, u Moses u la ong, “Hato balei phi ïaryngkang kumne ïa ka hukum ka jong U Trai? Hynrei, kane kan ym myntoi shuh. 42Wat leit kiew phi, namar U Trai um don hapdeng jong phi; ïoh ba yn pom noh ïa phi ha khmat ki nongshun jong phi. 43Namar kita ki Amalek, bad kita ki Kanaan, ki don ha khmat jong phi, bad phin hap da ka waitlam: naba phi la phai dien noh na U Trai, namar kata, U Trai un ym long lem keiñ bad phi.” 44Pynban, ki la shlan ban leit kiew sha kliar uta u lum: hynrei, kata ka synduk ka jutang U Trai, bad u Moses, kim shym la mih noh napdeng kata ka jaka shong dara. 45Te kita ki Amalek, bad kita ki Kanaan, kiba la ïashong sah ha uta u lum, ki la ïawan hiar, ki la shoh noh ruh ïa ki, bad ki la pynjot noh thiaw ïa ki, jin haduh Hormah.

Currently Selected:

JINGKHEIÑ 14: KHB

Highlight

Copy

Compare