JINGKHEIÑ 13
13
Ki khat-ar ngut ba la phah syntiat ïa ka ri Kanaan
(Deu. 1:19-33)
1Bad U Trai u la kren ha u Moses, u da ong, 2“To men phah ki briew, ba kin ïakhmih syntiat ïa ka ri Kanaan, ïa kaba ngan sa ai ha ki khun Israel: ïa uwei u briew na kawei kawei ka jaid ki kpa jong ki men phah; ïa uwei uwei ruh uba rangbah hapdeng jong ki.” 3U Moses te u la phah noh ïa ki na kata ka ri khlaw Paran da ka hukum U Trai: kita ki briew baroh, ki la long ki rangbah ki khun Israel. 4Kine te ki la long ki kyrteng jong ki: na ka jaid Reuben — u Shammua u khun u Sakkur. 5Na ka jaid Simeon — u Shaphat u khun u Hori. 6Na ka jaid Judah — u Kaleb u khun u Jephunneh. 7Na ka jaid Issakhar — u Igal u khun u Joseph. 8Na ka jaid Ephraim — u Oshea u khun u Nun. 9Na ka jaid Benjamin — u Palti u khun u Raphu. 10Na ka jaid Sabulon — u Gaddiel u khun u Sodi. 11Na ka jaid Joseph, kata ka long, na ka jaid Manasseh — u Gaddi u khun u Susi. 12Na ka jaid Dan — u Ammiel u khun u Gemalli. 13Na ka jaid Asher — u Sethur u khun u Mikhael. 14Na ka jaid Naphtali — u Nahbi u khun u Bophsi. 15Na ka jaid Gad — u Geuel u khun u Makhi. 16Kine ki long ki kyrteng jong kita ki briew, ïa kiba u la phah noh u Moses ïa ka ban khmih syntiat ïa kata ka ri. Te u Moses u la khot kyrteng ïa u Hoshea, u khun u Nun “u Joshua.”
17Bad u Moses u la phah noh ïa ki, ïa ka ban khmih syntiat ïa kata ka ri Kanaan, u la ong ruh ha ki, “To khie leit kumne shaphang shathie, to kiew sha kata ka ri lum: 18to khmih ruh ïa kata ka ri, kaba kumno; bad ïa kita ki briew kiba ïashong sah ha ka, la ki long kiba khlaiñ, ne kiba tlot bor, kiba khyndiat, ne kiba bun; 19ïa ka khyndew ruh ha kaba ki ïashong sah, la ka babha, ne ka basniew; ha kiba kumno ki shnong ki ïashong ruh, la ha ki ïingjaiñ, ne ha ki kut baskhem; 20bad ïa ka khyndew ruh, la kaba don sboh, ne kaba lyngki, la ki don ki dieng ha ka ne em. To long phi ki bashlur, to wallam ruh na ki soh jong kata ka ri.” Te kata ka aïom ka la long ka aïom soh nyngkong ki dieng soh Waiñ.
21Kumta te ki la ïaleit kiew, bad ki la ïakhmih syntiat ïa kata ka ri, naduh ka ri khlaw Sin haduh Rehob, ha ka lynti kaba leit sha Hamath. 22Bad ki la ïaleit kiew na shathie, bad ki la ïawan poi ha Hebron; hangta ki la don u Ahiman, u Sheshai, bad u Thalmai, ki khun u Anak. (Te haba ym pat tei ïa ka Soan ha Ijipt, ïa ka Hebron la lah tei la hynñiew snem.) 23Te ki la poi haduh ka them Eshkol, nangta ruh ki la pom noh ïa kawei ka tnat ha kaba don shi rynjup u soh Waiñ, bad ki la ïabah ïa ka halor u dieng hapdeng ar ngut; ki la wallam ruh ïa ki soh Pong#13:23 soh Pong: Soh Pomgranet., bad ïa ki soh Dumbur de. 24Te ki la khot ïa kata ka jaka “ka them Eshkol” namar kata ka shi rynjup ki soh Waiñ, ïa kaba la pom noh ki khun Israel nangta.
25Te ynda la sawphew sngi, ki la ïawan phai pat na kaba khmih syntiat ïa kata ka ri. 26Ki la ïaleit wan ruh, bad ki la ïapoi ha u Moses, bad ha u Aaron, bad ha uta u paidlang baroh ki khun Israel, ha Kadesh, kaba ha ka ri khlaw Paran; ki la wallam ktien ruh ha ki, bad ha uta u paidlang baroh, bad ki la pyni ha ki, ïa ki soh jong kata ka ri. 27Te ki la ïathuh ha u, ki la ong ruh, “Ngi la ïaleit poi ha kata ka ri ha kaba me la phah ïa ngi, shisha ruh ka long kaba shlei da ka dud, bad ka ngap; kine ruh ki soh jong ka. 28Hynrei, kita ki briew kiba shong ha kata ka ri, ki long kiba khlaiñ, ki shnong ruh ïa kiba la ker kynroh, bad ki bakhraw eh; hangta ruh, ngi la ïohi ïa ki khun u Anak. 29Kita ki Amalek, ki ïashong sah ha ka ri shathie: te ha ki ri lum, ki ïashong sah ki Heth#13:29 ki Heth: Ki Hit., bad ki Jebus, bad ki Amor: ki Kanaan ruh ki ïashong hajan kata ka duriaw, bad harud ka Jordan.”
30U Kaleb te, u la pynsngap jar ïa kita ki briew ha khmat u Moses, u la ong ruh, “To ïa, ngin ïaleit kiew shisyndon, ngin jop ruh ïa ka; namar ngi lah biang biang ban jop noh ïa ka.” 31Hynrei, kita kiwei ki briew kiba la leit kiew lem bad u, ki la ong, “Ngim don bor ban ïaleit kiew ïaleh pyrshah ïa kita ki briew; namar ki long kiba kham khlaiñ ïa ngi keiñ.” 32Bad ki la wallam ïa ka jingbna basniew ha ki khun Israel, shaphang kata ka ri ïa kaba ki la khmih syntiat, ki da ong, “Kata ka ri, ïa kaba ngi la ïaid lyngba ïa ka ban khmih syntiat ïa ka, ka long ka ri kaba bam duh ïa la ki trai-shnong; ki briew baroh ruh ïa kiba ngi la ïohi ha ka, ki long kiba jrong eh ka rynïeng. 33#Jen. 6:4.Hangta ruh, ngi la ïohi ïa kita ki radbah, ki khun shynrang u Anak keiñ, kiba la mih na kita ki radbah: bad ha ka jingñiew jong ngi, ngi la long kum ki puit, kumta ruh ngi la long, ha ka jingñiew jong ki de.”
Currently Selected:
JINGKHEIÑ 13: KHB
Highlight
Copy
Compare
Share
Want to have your highlights saved across all your devices? Sign up or sign in
The Bible Society of India
