LEBITIKOS 27
27
Ki aiñ shaphang ka jingpynkyntang
1Bad U Trai u la kren ha u Moses, u da ong, 2“To kren ha ki khun Israel bad to ong ha ki, ‘Haba uno uno ruh u kular ïa ka kular kaba phylla, kita ki briew kin long ki jong U Trai katba kum ka jingbuh dor jong me. 3Bad ka jingbuh dor jong me namar u shynrang uba naduh arphew snem ka rta haduh hynriewphew snem ka rta, kan long, ho-oid, ka jingkheiñ dor jong me kan long sanphew ki shekel rupa, katba kum ka shekel ka jaka kyntang. 4Te lada kan long ka kynthei, ka jingkheiñ dor jong me kan long laiphew shekel. 5Bad lada kin long naduh san snem haduh arphew snem ka rta, te ka jingkheiñ dor jong me ïa u shynrang kan long arphew shekel, bad ïa ka kynthei shiphew shekel. 6Bad lada kin long naduh shi bnai haduh san snem ka rta, te ka jingkheiñ dor jong me ïa u shynrang kan long san shekel rupa, bad ïa ka kynthei, lai shekel rupa. 7Te lada kan long haduh hynriewphew snem ka rta bad tam: lada u shynrang, te ka jingkheiñ dor jong me kan long khatsan shekel, bad shiphew shekel ïa ka kynthei. 8Hynrei, lada un long kham duk ïa ka jingkheiñ dor jong me, ka dei ba un leit ïeng ha khmat u lyngdoh, ynda kumta, u lyngdoh un kheiñ dor ïa u; katba kum ka bor jong uta uba kular, kumta keiñ u lyngdoh un buh dor ïa u.
9“ ‘Hynrei, lada u long u mrad, da uba ki ju kñia ainguh ïa U Trai, kata baroh ïa kaba yn ai na uta ha U Trai kan long ka bakyntang khuid. 10Un ym pynkylla ïa u, lymne ïapli ïa u da kawei pat, lane u babha ha ka jaka u basniew, lane u basniew ha ka jaka u babha: bad lada u da pynïapli ïa uwei u mrad namar u mrad, to ai ba uta bad uta uwei pat ba la buh ha ka jaka jong u kin long ba la kyntang khuid baroh ar. 11Te lada un kular da u mrad bymkhuid, u bym ju bit kñia ainguh ha U Trai, ynda kumta, un pynïeng ïa uta u mrad ha khmat u lyngdoh: 12ynda kumta, u lyngdoh un kheiñ dor ïa u la u long u babha lane u basniew: katba kum ka jingkheiñ dor jong me uba long lyngdoh, kumta hi kan long. 13Hynrei, lada un siewspah pat ïa uta u mrad, un ai kaba san bynta nalor ka jingkheiñ dor jong me.
14“ ‘Bad haba u briew u pynkyntang ïa la ka ïing ban long khuid ha U Trai, te u lyngdoh un kheiñ dor ïa ka, la ka long ka babha lane ka basniew: katba kum ka jingkheiñ dor uta u lyngdoh, kumta hi kan long. 15Te lada uta uba la pynkyntang khuid ïa ka un siewspah noh ïa la ka ïing, ynda kumta, un ai kaba san bynta nalor ka jingkheiñ dor jong me, bad kan long ka jong u.
16“ ‘Bad lada u briew un pynkyntang ha U Trai na ka lyngkha ka bynta ba hiar pateng jong u, te ai ba ka jingkheiñ dor jong me ïa ka, kan long katba kum u symbai jong ka: shi homer u Kew Barli kan shong dor sanphew shekel rupa. 17Bad lada un pynkyntang ïa la ka lyngkha naduh ka snem ka jubili, katba kum ka jingkheiñ dor jong me kan long keiñ. 18Hynrei, lada u pynkyntang ïa la ka lyngkha hadien ka jubili, ynda kumta, u lyngdoh un kheiñ ha u, ïa ki sbai katba kum ki snem kiba dang sah haduh ka snem ka jubili, bad yn pynduna na ka jingkheiñ dor jong me. 19Bad lada uta uba la pynkyntang ïa ka, un siewspah pat ïa la ka lyngkha, to ai ba un siew ïa ka basan bynta nalor ka jingkheiñ dor jong me, bad kan long ka jong u. 20Te lada um siewspah ïa kata ka lyngkha, lane lada u la die noh ïa ka lyngkha ha uwei pat, yn ym lah siewspah shuh ïa ka; 21bad kata ka lyngkha, haba kan lait noh ha ka snem ka jubili, kan long kaba la pynkyntang ha U Trai, kum ka lyngkha ba la pynkyntang; bad to ai ba kan long ka jong u lyngdoh. 22Bad lada u briew un pynkyntang ha U Trai ïa ka lyngkha ba u la thied, ka bymdei ïa kata ka khyndew ba hiar pateng jong u hi; 23ynda kumta, u lyngdoh un kheiñ ha u ïa ka dor ka jingkheiñ dor jong me haduh ka snem ka jubili: bad un ai ïa ka jingkheiñ dor jong me, kum kaba la pynkyntang ha U Trai, ha kata ka sngi hi. 24Ha ka snem ka jubili kata ka lyngkha kan hap pat ha uta na uba la thied ïa ka, ha uta keiñ uba la long mynshuwa u trai kata ka khyndew. 25Bad ki jingkheiñ dor jong me baroh kin long katba kum ka shekel ka jaka kyntang: shi shekel kan shong arphew gerah.
26“ ‘Hynrei, uba kha nyngkong jong u mrad, uba long u soh nyngkong ha U Trai, mano mano ruh em un ym lah pynkyntang ïa u; la u long u masi lane ka langbrot, ka long ka jong U Trai. 27Hynrei, lada ka long da u mrad bymkhuid, ynda kumta, un siewspah ïa uta katba kum ka jingbuh dor jong me, bad un siew ïa ka basan bynta nalor kata: bad lada yn ym siewspah ïa u, yn die noh ïa u ha ka jingkheiñ dor jong me. 28#Jkñ. 18:14.Hynrei, kaei kaei ruh ba la pynkyntang ka long kaba pynkyntang ha U Trai na kiei kiei baroh ba u don, la u long u briew lane u mrad, lane ka lyngkha ka bynta ba hiar pateng jong u, ïa kata yn ym lah ban die, lymne siewspah: ka kynja ba la pynkyntang baroh ka long ka bakyntang khuid tam eh ha U Trai. 29Yn ym lah ban siewspah ïa uno uno u mrad ba la pynkyntang, ïa uba u briew un pynkyntang; to pynïap noh ïa u.
30 #
Jkñ. 18:21; Deu. 14:22-29. “ ‘Bad kaba shiphew bynta jong ka khyndew baroh, na u symbai ka khyndew, bad na u soh ki dieng, ka long ka jong U Trai: ka long ba la kyntang khuid ha U Trai. 31Bad lada u briew u mon ban siewspah ïa kaei kaei na ka bashiphew bynta jong u, un ai shuh ïa ka basan bynta lem bad kata keiñ. 32Bad ka bashiphew bynta na ki jingri lane na ki blang, kat kiba hap kheiñ hapoh u diengduh, ka bashiphew kan long ba la kyntang ha U Trai. 33Un ym khmih thuh lada ka long ka babha lane ka basniew, lymne ïapli da kawei ïa ka; te lada un ïapli ïa ka satia, kumta, kata hi bad kata kawei pat ba la buh ha ka jaka jong ka, kin long ba la kyntang; yn ym lah ban siewspah ïa ka.’ ”
34Kine ki long ki hukum, ïa kiba U Trai u la hukum ha u Moses ïa ki khun Israel ha u lum Sinai.
Currently Selected:
LEBITIKOS 27: KHB
Highlight
Copy
Compare
Share
Want to have your highlights saved across all your devices? Sign up or sign in
The Bible Society of India
