LEBITIKOS 22
22
Ka jinglong bakhuid ki jingkñia ainguh
1Bad U Trai u la kren ha u Moses, u da ong, 2“To kren ha u Aaron, bad ha ki khun shynrang jong u, ba kin kyndiah noh na kiei kiei ki bakhuid jong ki khun Israel, kiba ki pynkyntang ha nga bad ba kin ym pyntngit ïa ka kyrteng bakhuid jong nga: Nga long U Trai. 3To ong ha ki: ‘Uno uno ruh na ki khun ki ksiew jong phi baroh ha ki pateng la pateng jong phi uba leit hajan ïa kiei kiei ruh ki bakyntang, ba ki khun Israel ki pynkyntang ha U Trai, haba u don ha u ka jingbymkhuid, yn ot noh ïa kata ka mynsiem na khmat jong nga: Nga long U Trai. 4Wat ai ba uno uno ruh na ki khun ki ksiew u Aaron un ïoh bam na kita kiei kiei ruh kiba la kyntang, haba u da long u bapang 'ñiangthohlieh, lane uba liat ksuit, tad ynda u la khuid: lymne uba la ktah ïa kaei kaei ruh ba la pyntngit namar uba la ïap, lymne uba hap symbai briew na u; 5lymne uba ktah ïa ka kynja bapar, da kaba u lah ban wan long bymkhuid, lane u briew na uba u lah ban bit ka jingbymkhuid, la ka long kaba kumno kumno ruh ka jingbymkhuid jong u; 6bad jar uba ktah ïa uta, un long bymkhuid haduh la janmiet, bad un ym bam na kita kiei kiei ki bakyntang, lymda u sait ïa la ka met da ka um. 7Te haba la sep ka sngi, un long u bakhuid, ynda kumta, un ïoh bam na kita kiei kiei ki bakyntang; naba kata ka long ka jingbam jong u. 8Bad wat ai ba un bam na kaei kaei ruh kaba la ïap hi, lymne ba la tar, ïa ka ban long bymkhuid namar jong ka: Nga long U Trai.’ 9Hynrei, kin sumar ïa ka hukum jong nga, ba ïoh kin kit pop kum ha kata ka rukom, ïa ka ban ïap namar jong ka, haba kin pynkheiñ sang kumta ïa ka: Nga long U Trai uba pynkhuid ïa ki.
10“Wat ai ba u nongwei un ïoh bam na kaei kaei ruh ka bakhuid: u nongwei uba ha ïing u lyngdoh, lane u nongbylla, un ym ïoh bam na kata kaei kaei ruh ka bakyntang. 11Hynrei, haba u lyngdoh u thied ïa u briew da la ki sbai hi, uta un ïoh bam na kata, bad uta ïa uba la kha ha ka ïing jong u; kine keiñ ki lah ban bam na ka jingbam jong u. 12#Leb. 7:31-36.Bad ka khun u lyngdoh, haba ka la shongkurim bad u nongwei, kan ym ïoh bam na ka jingainguh ïa kiei kiei ki bakhuid. 13Hynrei, lada ka khun u lyngdoh kan long ka riewkynthei, lane ïa kaba la khlad na la u tnga, khlem da ïoh khun, bad kaba la leit phai pat sha ïing u kpa jong ka, kata kan ïoh bam na ka jingbam u kpa jong ka, kumjuh kum ha ka por ka jinglong samla jong ka: hynrei, u nongwei un ym ïoh bam na kata. 14Bad haba uno uno ruh u bam ïa kaei ka bakyntang da ka jingbymtip, to ai ba un ai ha khlieh kata shi bynta na kaba san bynta, bad un ai noh ïa ka lem bad kata kaei kaei ka bakyntang ha u lyngdoh. 15Bad kin ym pyntngit ïa kiei kiei ruh kiba la kyntang jong ki khun Israel, ïa kiba ki kñia ainguh ha U Trai; 16wat ai ruh kin kit ha lade ïa ka jingsaja ka jong ka jingpalat, haba ki bam na kiei kiei ruh ki bakhuid jong ki: naba nga long U Trai uba pynkhuid ïa ki.”
17Bad U Trai u la kren ha u Moses, u da ong, 18“To kren ha u Aaron, bad ha ki khun shynrang jong u, bad ha ki khun Israel baroh, bad to ong ruh ha ki, ‘Uno uno ruh na ka ïing Israel, lane u nongwei ha Israel, uba kñia ïa ka jingkñia ainguh jong u, katba kum ki jingkular jong u baroh, bad katba kum ki jingainguh sngewbha jong u baroh ruh de, ïa kiba kin kñia ainguh ha U Trai ïa ka ban long ka jingkñia ainguh thang; 19khnang ban pdiang hun ïa phi, to kñia da la ka mon sngewbha hi da uwei u shynrang uba janai bha na ki masi, lane na ki langbrot, lane na ki blang. 20#Deu. 17:1.Phin ym kñia ainguh ïa kaei kaei ruh kaba don ka jingduna: naba kan ym long ba la pdiang hun na ka bynta jong phi. 21Bad haba u briew u da kñia ainguh ïa ka jingkñia bapynïasuk ha U Trai ïa ka ban pyndep ïa la ka jingkular, lane ïa ka ban pynlong ka jingainguh sngewbha na ki masi, lane na ki langbrot, ka dei ïa ka, ban long bajanai ba yn pdiang hun ïa ka; yn ym long ka jingduna satia ha ka. 22U bamatlah, lane uba la lait doh, lane uba la mong, lane uba mih thapbasim ha u, lane uba don ki prum, lane uba sa 'ñiangtrew, ïa kiba kum kine phin ym kñia ainguh ha U Trai, lymne wat pynlong ka jingkñia da ka ding na kita halor ka duwan U Trai. 23Ïa u masi lyngraw, lane u khun blang#22:23 u khun blang: Ha ka ktien Hebru, ka jingmut ka dei ka langbrot ym u khun blang. uba don kaei kaei ruh kaba tam, lane kaba duna ha ki dkhot jong u, me lah ban kñia kum ka jingainguh sngewbha; hynrei, na ka bynta ka jingkular, un ym long ba yn pdiang hun ïa u. 24Wat kñia ainguh ha U Trai ïa kaei kaei kaba la pynlwet, lane ïa kaba la kyrshoiñ, lane ba la kheiñ, lane ba la ot; phin ym pynlong ka jingkñia da kita ha ka ri jong phi. 25Wat kñia ruh ïa ka jingbam ka jong U Blei jong phi da kine kiei kiei baroh na ka kti u nongwei; naba ka jingsniew jong ki ka don ha ki, bad ka jingduna ha ki: kin ym long kiba yn pdiang hun ïa ki na ka bynta jong phi.’ ”
26Bad U Trai u la kren ha u Moses, u da ong, 27“Haba yn kha ïa u khun masi, lane ïa u khun blang, lane ïa u khun langbrot, to ai ba un sah bad ka kmie hynñiew sngi; naduh ka sngi baphra bad hadien yn pdiang hun ïa u kum ka jingkñia ainguh ba la pynlong da ka ding ha U Trai. 28Phin ym pynïap ïa ka masi lane ïa ka langbrot bad i khun ha kajuh ka sngi. 29Bad haba phi kñia ïa ka jingkñia ainguh ha U Trai, phin kñia ïa ka da ka mon sngewbha hi jong phi. 30Ha kata ka sngi hi ka dei ban bam ïa ka; wat pynsah ei ei ruh na ka haduh lashai: Nga long U Trai.
31“Phi ruh phin sumar ïa ki hukum jong nga, bad to leh ruh ïa ki: Nga long U Trai. 32Bad wat shim thala ïa ka kyrteng bakhuid jong nga; hynrei, to ai ba yn pynkyntang khuid ïa nga hapdeng ki khun Israel: Nga long U Trai uba pynkhuid ïa phi, 33uba la ïalam ïa phi na ka ri Ijipt, ïa ka ban long U Blei jong phi. Nga long U Trai.”
Currently Selected:
LEBITIKOS 22: KHB
Highlight
Copy
Compare
Share
Want to have your highlights saved across all your devices? Sign up or sign in
The Bible Society of India
