HOSIA 4
4
Ka jingïasaid U Trai bad la ki paidlang
1To sngew ïa ka ktien U Trai,
phi ki khun Israel:
“namar U Trai u don
ka jingïasaid
bad kiba shong ha ka ri,
namar ym don jingshisha,
lymne jingisynei,
lymne jingtip ïa U Blei
ha ka ri.
2Don tang kaba smai
bad kaba shukor,
bad kaba pynïap,
bad kaba tuh, bad kaba klim;
ki mih, bad ka snam ka kynroi
ïa ka snam.
3Namar kata,
ka ri kan sa ïambriew,
bad uba shong ha ka baroh
un sdot noh,
lem bad ki mrad khlaw
bad ki sim bneng;
shisha keiñ,
ïa ki dohkha ka duriaw ruh
yn shim noh.”
4“Pynban, uno uno
to un ym ïaleh,
lymne uno uno un ym sneng:
namar u paidlang jong me
u long
kum kita kiba ïaleh
ïa u lyngdoh.
5Te men jynthut mynsngi,
bad u nongïathuhlypa ruh
un jynthut bad me mynmiet:
ngan pynjot noh ruh
ïa ka kmie jong me.
6Ïa u paidlang jong nga
la pynjot
namar bymdon jingtip;
namar ba me la kyntait
ïa ka jingtip,
nga ruh ngan kyntait ïa me,
ba men ym long lyngdoh satia
ha nga:
naba me la klet
ïa ka hukum U Blei jong me,
nga ruh ngan klet
ïa ki khun jong me.
7“Katba ki la nang roi ruh,
ki la nang leh pop ïa nga:
ngan pynkylla ïa ka burom
jong ki
sha ka jinglehrain.
8Ki bam kdang
na ka pop u paidlang
jong nga,
bad ki buh ïa la ka dohnud
sha la ka jingleh bymhok.
9Te kan long,
kum u paidlang
kumta ruh u lyngdoh:
te ngan pynshitom ïa ki
namar ki lynti jong ki,
bad ngan ai nong ïa ki,
ïa ki jingleh jong ki.
10Te kin bam,
hynrei, kin ym kdang;
kin leh nuti, hynrei, kin ym roi:
namar ki la iehnoh
ban kohnguh ïa U Trai.
11Ka jingleh nuti
bad ka Waiñ bad ka 'iad rot
ki rong noh ïa ka dohnud.
12U paidlang jong nga
u ïaikylli ha la u dieng,
bad u diengduh jong ki
u ïathuh ha ki:
namar ka mynsiem
ka jingleh nuti
ka la pynbakla ïa ki,
bad ki la ïaid nuti
napoh la U Blei.
13Ki kñia ha kliar ki lum bah,
bad ki thang jingiwbih
halor ki lum rit,
hapoh ki dieng Sning
bad ki dieng Poplar
bad ki dieng Terebinth,
naba ka syrngiew jong kita
ka bha:
Namar kata, ki khun kynthei
jong phi, ki leh nuti,
bad ki nongleit-kurim jong phi,
ki klim.
14Ngan ym pynshitom
ïa ki khun kynthei jong phi,
haba ki leh nuti,
lymne ïa ki nongleit-kurim
jong phi, haba ki klim;
namar ki hi ki leit kyrpang
bad ki nuti,
bad ki ïakñia lem bad ki:
te ïa u paidlang
u bymshemphang
yn pynkyllon.
15“La me, Israel, me leh nuti,
hynrei, wat ai ba ka Judah
kan leh palat;
wat wan phi sha Gilgal ruh,
lymne wat kiew sha Beth-aben,
lymne wat smai,
‘Katba im U Trai.’
16Namar, u Israel
u la leh mutlop ïa lade
kum ka masi lud bamutlop:
hynrei, mynta U Trai
un bsa ïa ki
kum ïa u khun langbrot
ha ka jaka kylluid.
17“U Ephraim u la ïasoh
sha ki bleithaw;
iehnoh ïa u.
18Ka jingdih jong ki,
ka la jew:
ki ïai-leh nuti;
ki nongsynshar jong ki,
ki ieit eh ïa ka jinglehrain.
19Ka lyer ka la kli ïa ka
ha la ki thapniang;
te yn pynlehrain ïa ki
namar la ki jingkñia hi.”
The Bible Society of India