HOSIA 2
2
Ka jingbishar U Blei ïa la u paidlang
1 #
Rom. 9:25; 1 Pet. 2:10. “To ong ha la ki para shynrang, ‘Ammi’; bad ha la ki para kynthei, ‘Ruhamah’.
2“Kyrpad ïa la ka kmie,
to kyrpad;
namar kam long ka tnga
jong nga,
lymne ngam long u tnga
jong ka:
bad to kan bred noh
ïa la ki jingklim
na khmat jong ka,
bad ïa ki jingleh nuti jong ka
napdeng ki jymbuiñ jong ka;
3ïoh ngan pynlyngkhuit ïa ka,
bad buh ruh ïa ka
kum ha kata ka sngi
ba la kha ïa ka,
ba ngan pynlong ruh ïa ka
kum ka ri bakynjah,
bad buh ïa ka
kum ka ri ryngkhiang,
bad pynïap ïa ka,
da ka jingsliang;
4shisha, ngan ym isynei
ïa ki khun jong ka ruh;
namar ki long ki khun
jong ki jingklim.
5Namar ka kmie jong ki
ka la leh nuti:
kata kaba la pun ïa ki,
ka la leh khlem rain:
namar ka la ong,
‘Ngan leit bud ïa ki ba-ieit
jong nga,
kiba ai ïa nga la u kpu
bad la ka um,
la u 'saiwul bad la u 'saihon,
la ka umphniang
bad la ki jingdih.’
6Namar kata, ha khmih,
ngan khang ïa ka lynti jong pha
da ki shiah,
bad ngan kynroh pyrshah ïa ka,
ba kan ym shem
ïa la ki lynti ïaid.
7Te kan bud ïa ki ba-ieit
jong ka,
hynrei, kan ym lap ïa ki;
kan wad ruh ïa ki,
hynrei, kan ym shem:
te kan sa ong,
‘Ngan leit phai
sha la u tnga trai;
namar myn ha kata
ka la long kham bha bad nga
ban ïa mynta.’
8Naba kam shym la tip
ba nga, nga la ai ha ka,
ïa u Kew, bad ka Waiñ,
bad ka umphniang,
bad ba nga la pynroi ha ka,
ïa ka rupa bad ka ksiar,
ïa kiba ki la pynlong
ki durblei Baal.
9Namar kata, ngan shim pat
ïa la u Kew ha ka por jong u,
bad ïa la ka Waiñ ha ka aïom
jong ka,
bad ngan shim noh
ïa la u 'saiwul
bad ïa la u 'saihon
kiba dei ban tap
ïa ka jinglyngkhuit jong ka.
10Mynta te, ngan thad
ïa ka rain jong ka
ha khmat ki ba-ieit jong ka,
yn ym don ruh u ban pyllait
ïa ka
na ka kti jong nga.
11Te ngan pynkut noh
ïa ka jingkmen jong ka baroh,
ïa ki jingkhawai jong ka,
ïa ki 'nai thymmai jong ka,
bad ïa ki Sabbaton jong ka,
bad ïa Ki Jingkhawai Niam
jong ka baroh.
12Bad ngan pynlong khlaw
ïa ki dieng Waiñ jong ka
bad ïa ki dieng Dumbur
jong ka,
ïa kiba ka la ong,
‘Kine ki long ki bainong
jong nga
ba ki ba-ieit jong nga
ki la ai ïa nga:’
te ngan pynlong khlaw ïa ki
bad ki mrad khlaw
kin bam ïa ki.
13Bad ngan pynhap kput
halor jong ka,
ïa ki sngi ki Baal,
ha kiba ka la thang jingiwbih;
haba ka la pyndeng ïa lade
da la ki sohshkor
bad da la ki jingdeng,
bad ka la leit bud
ïa la ki ba-ieit,
ka la klet ïa nga ruh,”
ong U Trai.
14“Namar kata, ha khmih,
ngan ring pah ïa ka,
bad ngan wallam ïa ka
sha ka ri kynjah,
ngan kren sngewbha ruh ha ka.
15 #
Jos. 7:24-26. Te ngan ai ha ka,
ïa ki brisoh Waiñ
jong ka nangta,
bad ïa Ka Them Akhor ban long
ka khyrdop ka jingkyrmen:
kan phai ktien hangta ruh,
kumba ha ki sngi
ka jinglong samla jong ka,
bad kumba ha ka sngi
ba ka la wan kiew
na ka ri Ijipt.
16“Te kan long ha kata ka sngi,” ong U Trai, “ba phan khot ïa nga, ‘Ishi’; bad phan ym khot shuh ïa nga, ‘Baali’. 17Naba ngan shim noh ïa ki kyrteng jong ki Baal na ka shyntur jong ka, te yn ym ïalap shuh ïa ki kyrteng jong ki. 18Te ha kata ka sngi, ngan pynlong ka jutang na ka bynta jong ki bad ki mrad khlaw, bad ki sim bneng, bad ki kynja bapar jong ka khyndew: ngan pynkheiñ ruh ïa ka ryntieh bad ïa ka waitlam bad ïa ka thma na ka ri, bad ngan pynthiah suk ïa ki. 19Ngan ïatehktien ruh ïa pha ha nga junom; shisha keiñ, ngan ïatehktien ïa pha ha nga ha ka hok, bad ha ka jingbishar, bad ha ka jingieit, bad ha ki jingleh isynei. 20Ngan ïatehktien ruh ïa pha ha nga ha ka jingïaineh: te phan ithuh ïa U Trai.
21“Te kan long
ha kata ka sngi,
ngan phai ktien,”
ong U Trai,
“ngan phai ktien ïa ki bneng,
ki ruh kin phai ktien
ïa ka khyndew;
22bad ka khyndew
kan phai ktien ïa u Kew,
bad ïa ka Waiñ,
bad ïa ka umphniang;
ki ruh kin phai ktien
ïa ka Jesril.
23 #
Rom. 9:25; 1 Pet. 2:10. Bad ngan bet ïa ka ha nga
ha ka khyndew;
te ngan isynei
ïa ka bym shym
la ïoh jingisynei;
ngan ong ruh ha kita
ki bym shym la long
u paidlang jong nga,
‘Me long u paidlang jong nga;’
ki te kin ong,
‘Me long U Blei jong nga.’ ”
The Bible Society of India