EKSODOS 15

Ka jingrwai u Moses

1 # Jpw. 15:3. Ynda kumta, u Moses bad ki khun Israel ki la ïarwai ïa kane ka jingrwai ha U Trai, bad ki la kren, da kaba ong,

“Ngan rwai ha U Trai,

naba u la jop

da ka burom bakhraw:

ïa u kulai

bad la u nongshong kulai

u la bred sha ka duriaw.

2 # Salm. 118:14; Isa. 12:2. U Trai u long ka bor

bad ka jingrwai jong nga,

bad u la wan long

ka jingpynim ïa nga:

U long ma U,

U Blei jong nga,

bad ngan pyndonburom

ïa U;

U Blei u kpa jong nga,

bad ngan ïaroh burom

ïa U.

3U Trai u long

u nongïaleh thma:

‘U Trai’ long

ka kyrteng jong u.

4“Ki kali ïapom u Pharaoh

bad ki paidïapom jong u,

U la phyrnep sha

ka duriaw:

ïa ki rangbah ïapom jong u

ba la donnam ruh

la pynngam jyllop

ha ka Duriaw Basaw.

5Ki jingjylliew ki la tyllep

ïa ki:

ki la ngam haduh ka trai

kum u maw.

6Ka kti kamon jong me,

A Trai,

ka long kaba donburom

ha ka bor,

ka kti kamon jong me,

A Trai,

ka la lympat lyngkhot

lyngkhai ïa ki nongshun.

7Bad da ka jingkhraw

ka burom jong me,

me la pynkyllon

ïa kita kiba la ïeng ïaleh

ïa me:

me la phah noh

ïa la ka jingbitar,

kaba la bam duh ïa ki

kum ïa u jyntang kba.

8Bad da ka jingpyrsad

ki thliew khmut jong me

la pynïalang lem

ïa ki um,

ki jingshlei ki la ïeng

sha jrong

kum ka kynton;

ki jingjylliew ki la ïalang

hapdeng ka duriaw.

9Uta u nongshun u la ong,

‘Ngan sa beh, ngan sa lap,

ngan sa pynïabynta

ïa ka jinglute:

yn sa pynhun

ïa ka jingkwah jong nga

halor jong ki;

ngan sei ïa la ka waitlam,

ka kti jong nga kan

sa pynjot ïa ki.’

10Me la pyrsad da

ka lyer jong me,

ka duriaw ka la tyllep

ïa ki:

ki la ïangam

kum ka sisa

ha kita ki um

bajylliew bah.

11“Uei uba kat ma me,

A Trai,

hapdeng ki blei?

uei uba kat ma me

uba tyngshaiñ

ha ka jingkhuid,

uba itieng

ha ki jingïaroh,

uba leh ïa ki kam phylla?

12Me la kner noh ïa la

ka la kti kamon,

ka khyndew ka la nguid

tylli ïa ki.

13“Da la ka jingisynei

me la ïalam noh

ïa uta u paidbah

ïa uba me la siewspah:

me la btin ïa ki

ha ka bor jong me

sha ka jaka shongneh

ka jingkhuid jong me.

14Ki briew kin ïohsngew,

bad kin ïasheptieng,

ki jingkhuslai kin ngat

ha ki nongshong

ka ri Philistia.

15Te ki syiem Edom

kin kyndit;

ki briew bakhraw batri

ka Moab,

ka jingkhynñiuh

kan kem ïa ki:

ki Kanaan baroh

kin sa um noh.

16Ka jingsheptieng

bad ka jingshyrkhei

kin ngat ha ki;

da ka jingkhraw

ka ksang'ti jong me

kin ïasngap jar

kum u maw;

tad ynda

kita ki briew jong me

kin ïalait shiliang,

A Trai,

tad ynda ki ïalait shiliang

uta u paidbah ïa uba

me la siewspah.

17Men wallam ïa ki shapoh,

bad men thung ruh ïa ki

ha u lum ka bynta

skhem jong me,

kata ka jaka,

A Trai,

ïa kaba me la khreh

ïa lade

ban shong duh ha ka,

kata ka jaka kyntang keiñ,

A Trai,

ïa kaba ki kti jong me keiñ

ki la pynskhem.

18U Trai un synshar

ha la ka rta.”

19Naba ki kulai jong u Pharaoh lem bad ki kali ïapom jong u bad ki nongshong kulai jong u ruh ki la ïangam sha kata ka duriaw; bad U Trai u la pynphai ïa ki um ka duriaw halor jong ki; hynrei, ki khun Israel ki la ïaid ryngkew hapdeng ka duriaw. 20Te ka Miriam ka nongïathuhlypa, ka hynmen u Aaron, ka la shim ka kanjari ha la ka kti; ki kynthei baroh ruh ki la ïamih noh hadien jong ka da ki kanjari bad ki jingshad. 21Ka Miriam ka la ong ruh ha ki,

“To rwai phi ïa U Trai,

naba U la jop

da ka burom;

ïa u kulai bad ïa

u nongshong kulai

U la phyrnep sha

ka duriaw.”

Ki um bakthang ka Marah

22Kumta, u Moses u la ïalam ïa ki Israel na ka Duriaw Basaw, ki la ïaleit ruh sha ka ri khlaw jong ka Shur; te ki la ïaid lai sngi lynti ha kata ka ri khlaw, bad kim shym la shem um. 23Te mynba ki la ïapoi sha Marah, kim lah ban dih ïa ki um jong ka Marah, naba ki la kthang: namar kata, la khot kyrteng “Ka Marah” ïa ka. 24Uta u paidbah te u la khñium ïa u Moses, ki da ïa-ong, “Ngin sa dih aïu?” 25Te u la duwai ha U Trai; te U Trai u la pyni ïa u dieng ïa u, ïa uba haba u la bred ha kita ki um, kita ki um keiñ ki la bang.

Hangta u la buh ïa ka hukum bad ka rukom ïa ki, bad hangta u la tynjuh ïa ki; 26bad u la ong, “Lada men sngap biang biang ruh ïa ka ktien jong U Trai U Blei jong me, bad lada men leh ruh ïa kata kaba dei ha khmat jong u, bad men shahshkor ruh ïa ki hukum jong u, da kaba rakhe ïa ki niam ki rukom jong u baroh, ngan ym da buh ha me kawei ruh keiñ na kita ki jingpang ïa kiba nga la wallam halor ki Ijipt: naba ma nga, nga long U Trai uba pynim ïa me.”

27Te ki la ïawan poi sha Elim, ha kaba la don khat-ar tylli ki umpohliew, bad hynñiewphew tylli ki dieng Tlai: bad ki la ïashong dara hangta harud kita ki um.

Currently Selected:

EKSODOS 15: KHB

Highlight

Copy

Compare