DEUTERONOMI 34

Ka jingïap u Moses

1Te u Moses u la leit kiew na ki madan Moab sha u lum Nebo, sha kliar Piskah keiñ, kaba marpyrshah ka Jerikho. Bad U Trai u la kdew ha u, ïa ka ri Gilead baroh, haduh Dan; 2bad ïa ka ri Naphtali baroh, bad ïa ka ri Ephraim, bad Manasseh, bad ïa ka ri Judah baroh, haduh ka bakut duriaw; 3bad ïa kaba shathie, bad ïa ka pynthor jong ka them Jerikho ka nongbah ki dieng Tlai, haduh Soar. 4#Jen. 12:7; 26:3; 28:13.Bad U Trai u la ong ha u, “Kane ka long kata ka ri kaba nga la smai ha u Abraham, ha u Isaak, bad ha u Jakob, da kaba ong, ‘Ïa u symbai jong me ngan ai ïa ka: nga la phah ïa me ban ïohi ïa ka da la ki khmat, hynrei, men ym ïoh leit sha shiliang shato keiñ.’ ” 5Kumta, u Moses u shakri U Trai u la ïap hangta ha ka ri Moab, katba kum ka ktien U Trai. 6Bad la tep ïa u ha ka syng-it lum ha ka ri Moab, marpyrshah ka Beth-peor; hynrei, ym don briew keiñ ba tip ïa ka jingtep jong u haduh kane ka sngi. 7Te u Moses u la long shispah arphew snem ka rta mynba u la ïap; ki khmat jong u kim pat la byrngut, lymne ka bor jong u kam shym la duna. 8Te ki khun Israel ki ïaïam na ka bynta u Moses ha kita ki pynthor Moab, laiphew sngi: kumta, kita ki sngi ka jingïambriew ïa u Moses ki la kut.

9Bad u Joshua u khun u Nun u la dap da ka mynsiem ka jingstad; naba u Moses u la lah buh ïa la ki kti halor jong u: bad ki khun Israel ki la shahshkor ïa u, bad ki la leh ruh kumba U Trai u la hukum ïa u Moses. 10#Jkñ. 12:6-8.Bad ym shym la mih prophet naduh kata ha Israel kum u Moses, ïa uba U Trai u la ithuh markhmat; 11ha kita ki dak bad ki jingphylla baroh, ïa kiba U Trai u la phah ïa u ban leh ha ka ri Ijipt, halor u Pharaoh, bad halor ki shakri jong u baroh, bad halor ka ri jong u baroh; 12bad ha kata ka kti badonbor baroh, bad ha kata ka jingitieng bakhraw baroh, ïa kiba u Moses u la pyni ha khmat ki Israel baroh.

Currently Selected:

DEUTERONOMI 34: KHB

Highlight

Copy

Compare