ABAROMA Okhumanyisia akalimwo
Okhumanyisia akalimwo
Ibarwa ya Paulo yahandichila Abaroma yahandikwa khulwa okhurechekha oluchendo olwa Paulo yali nakaasiye okhucheniha ikanisa eya Roma. Lichoomolie liali okhukhalabanila Abakristo ebweneyo khulweshise shitiiti, mana bamukhoonye atsililiile noluchendo okhutsia mushialo shia Sipania. Yahandika khulwa okhwinoosia aka yamanyilisia khubusuubili bweshikristo nende lichoomo liabwo mubulamu bwa Abakristo. Eshitabu shino shilimwo oburume bwa Paulo bwosi.
Olunyuma lwokhushesia abandu beikanisa eya Roma nende okhubaboolela shinga olwa abasaayilanga, Paulo aboolanga lichoomo lieibarwa yino ari, “Injiili yifimbulanga shinga olwa Nyasaye alunjisinjia abandu, nokhubirira mubusuubili, okhurula okhuchaaka okhuula khushiakamo” (1:17).
Paulo atsiilililanga okhuralisia eshisina shino mbu, abandu boosi, Abayahudi nende Abamahanga, bakhoyile okhusasanibwa nende Nyasaye, okhuba boosi nabonooni. Abandu basasanibungwa nende Nyasaye khulwokhusuubila mu Yesu Kristo. Eliloondakhwo, Paulo yenoosinjia akobulamu obuyia mu Kristo oburulanga mubwikho obuyia nende Nyasaye. Omusuubili asasanibwa nende Nyasaye mana akholwa omulekhuule nende Roho wa Nyasaye okhurula mubunyali bwobwonooni nende olufu. Mumiliango 5-8 Paulo khandi aboolanga khwichoomo lia Amalako ka Nyasaye nende obunyali bwa Roho wa Nyasaye mubulamu bwomusuubili. Mana omurume Paulo ateemanga okhwinoosia shinga olwa Abayahudi nende Abamahanga banyala okhwinjisibwa mwichoomo lia Nyasaye khubandu boosi. Amalilisinjia mbu, okhulobwa khwa Yesu nabayahudi kali akobuloosie bwa Nyasaye obwokhureera abandu boosi mubukoosiabwe mu Yesu Kristo. Ne asuubilanga mbu, Abayahudi shibalaloba Yesu buli lwosi tawe.
Mukhuhelelesia Paulo ahandikanga namanyia shinga Abakristo bakhoyile okhumenya, okhushila muno shinga bakhoyile okhuheela abashiabwe. Yechesinjia amakhuwa akahukhane shinga: Obukhalabani khu Nyasaye, Aka Abakristo bakwanile okhukholela abaruchi nende abashiabwe, nende amareebo khukobumanyilisi bwomukari bwomumwoyo. Amalilisinjia ibarwaye yino, noburume omwene nende amakhuwa akokhwitsoomia Nyasaye.
Akalimwo mubwimbichiti
Okhumanyisia akalimwo nende Lichoomo 1:1-17
Obuha bwa buli mundu bwokhuhonibwa 1:18–3:20
Injila ya Nyasaye eyobuhonia 3:21–4:25
Obulamu obuyia mu Kristo 5:1–8:39
Isiraeli mubuloosie bwa Nyasaye 9:1–11:36
Eshiima shieshikristo 12:1–15:13
Akokhumalilisia nende amashiesioke omwene 15:14–16:27
Currently Selected:
ABAROMA Okhumanyisia akalimwo: OLUDC
Highlight
Share
Copy
Want to have your highlights saved across all your devices? Sign up or sign in