EBIKHOLE BIA ABARUME 28

Akekholekha khu Paulo nali Malita

1Olwa khwali khulukuku nikhwihonokooshe, khwamala nikhumanya mbu, eshikhalachinga eshio shilangwa mbu Malita. 2Abandu bamenyaho bali abalayi khwifwe okhushila. Ifula yali niyachachile okhukwa, ne omunyiri kwaliho, kho bamala nibabwana omulilo nibakhwinjisia obulayi. 3Paulo yabunjelesia olukhanya lwetsikhwi, ne olwa yali natsireranga khumulilo, khulwa oluuya lwomulilo okwo, inzokha yarulamwo niyikanyila khumukhonokwe. 4Olwa abandu baho abo balola inzokha niyelelanga khumukhono kwa Paulo, baboolelana abeene khubeene bari, “Omundu uno okhuula abe omwiiri, kata naba niyehonokooshe munyanza imongo yilamukalushila, ne shialaba omulamu tawe.” 5Nebutswa Paulo yabungulula inzokha eyo mumulilo omwene nalasalilakhwo kata nahatuutu tawe. 6Baliindilila mbu balole nafimba omubili noho nakwa hasi matetekhana mana afwe. Nebutswa olwa bali nibakhaliinda eshise eshiraambi, nibalalolakhwo eshindu shiosi nishikholekha khuye ta, bakalukhasia amapaaro kabwe lwangu nibaboola bari, “Omundu uno nomunyasaye!”

7Ahambi nende habwene yaho, chialiho emikunda chia Pubulio, owali omukhulundu weshikhalachinga eshio. Yakhwinjisia obulayi bwene nikhuba abachenibe khulwetsinyanga tsitaru. 8Samwana Pubulio yali nali hasi nalwala omurengo nende okhunyalala amatsayi. Paulo yenjila mushisikashie namusaayila, namurakhwo amakhono, mana namuhonia. 9Ne olwa kano kekholekha, abalwale boosi khushikhalachinga eshio, betsa nibahonibwa. 10Nibakhuhelesia ebihaanwa ebinji, ne olwakhwasumukha bakhureelera mumeeli ebindu biosi ebiakhwatakha khulwa oluchendo olwo.

Oluchendo okhurula Malita okhuula Roma

11Olunyuma lwemiesi chitaru khwachaka khandi oluchendo nikhuniina mumeeli eyarula Alekisanderia, eyalangwa mbu, “Abanyasaye amakhwana,” eyali niyimalile tsinyanga tsiomunyiri etsio mushikhalachinga eshio. 12Khwola mwitookho lia Sirakuse, mana nikhwikhalayo tsinyanga tsitaru. 13Okhurulaho khwatsiililila nikhuula mwitookho lia Regio. Olunyuma lweinyanga ndala, omuyeka kwachaaka okhuhutsa okhurula emulambo, mana munyanga tsibili nikhuula khwitaala lia Putioli. 14Khwanyoola abasuubili bandi habwenaho abakhureeba mbu khumenyakhwo ninabo khulwa lichuma elala. Mana nikhuula Roma. 15Ne olwa abasuubili ba Roma bahulila mbu khuliyo, betsa mushiiro shia Apio nende aha Emikahawa chitaru okhukhwakanila. Ne olwa Paulo yabalola, yetsoomia Nyasaye mana nalemibwa omwoyo.

Emilimo chia Paulo Roma

16Olwa khwola Roma, Paulo yafuchililwa okhumenya yenyene, nalindilwe nomusikari mulala.

17Olunyuma lwetsinyanga tsitaru, Paulo yalanga abemilisi ba Abayahudi mushiina. Ne olwa bali nibekhung'asiye halala yababoolela ari, “Abaisiraeli bashianje, kata nikali mbu shindakhola eshindu eshibi khubandu befwe noho okhwonoonia emiima echiakhwanyoola okhurula khubakuuka befwe ta, ndakholwa omubohe mu Yerusalemu, mana nihaanwa mumakhono ka Abaroma. 18Nibamalile okhureebelesia, Abaroma abo benya okhundekhuula, shichila banyoola mbu, shikholile eshindu eshichila ekhalachilwe okhufwa tawe. 19#Ebikh. 25:11Nebutswa olwa Abayahudi baloba ako, kho nikachila nereeba mbu eyaasibwe nomuruchi wa Roma, kata kario shindali nende eliokhwinjililakhwo abandu banje beene itookho tawe. 20Khulweshio kano niko akachilile niireeba mbu mwitse emulole khandi emboolekhwo ninenywe. Akatoto kali mbu, ndabohwa muminyololo chino endi nanwa khulwa okhubeela oyo ouli obunaayi bwabandu ba Isiraeli.”

21Nabo nibamuboolela bari, “Ifwe khushili okhunyoolakhwo tsibarwa tsiosi tsiosi okhurula Yudea nitsiboolanga khwiwe ta, kata abandu befwe bashili okhureelakhwo amakhuwa koosi koosi, noho likhuwa liosi libi khwiwe tawe. 22Nebutswa khwakhekoomba okhuhulila aka iwe oli ninako, shichila ifwe khumanyile mbu, buli habundu abandu bafukulanga amakhuwa khumukanda kwolimwo kuno.”

23Kho nibakaasia inyanga yokhwakana nende Paulo. Ne olwa inyanga eyo yoola betsa omukanda omukali habundu aha Paulo yali namenyile. Okhurula mumabwibwi okhuula mushilo Paulo yabenoosia oburumebwe khu aka Obwami bwa Nyasaye, mana nateema okhubahombelesia khu aka Yesu nakalushilanga mumalako ka Musa nende akabalakusi bahandika. 24Mana balala khubo nibafuchilila aka yali naboolile, nabo abandi nibalakasuubila tawe. 25Kho nibenyokha nibalafuchilisaniye abeene tawe, olwa Paulo yali naboolile likhuwa lino ari, “Roho Omutakatifu yali habwene olwa yaboolela abakuuka benywe okhubirira mumulakusi Isaya ari,

26 # Isa. 6:9,10 ‘Tsia oboolele abandu bano mbu,

mulirecheresia, nimurecheresia nebutswa shimulitiila eshisina tawe,

mulihenga nimuhenjelesia nebutswa shimulilola tawe.

27Shichila inywe mwesi mubula obumanyilisi mumioyo chienywe.

Khandi amarwi kenywe kekala,

natsio tsimoni tsienywe tsiabofula.

Shimunyala okhulola kata okhuhulila,

kata emioyo chienywe okhumanyilisia tawe.

Nimwakhanyalile okhulola, okhuhulila nende okhumanyilisia nemioyo chienywe;

mwakhangalushile, ne nasi ndakhamuhoniye.’ ”

28Mana Paulo namalilisia naboola ari, “Bulano mukhoyile okhumanya mbu, oburume bwa Nyasaye bwobuhonia bwamalile okhurumwa khu abamahanga. Ne nabo balabuhulila.” [ 29Ne olwa Paulo yamala okhuboola ako, Abayahudi benyokha nibayingananga obutinyu abeene khubeene khumakhuwa ako.]#28:29 Amahandiko kandi kakhale shikali nolunyali lwa 29 tawe.

30Kho Paulo yamenya habundu yaho khulwemiyika chibili omwene niyerunjilanga inzu. Yenjisinjia abandu boosi abetsanga okhumulola. 31Yayaalanga aka Obwami bwa Nyasaye nende okhwechesia aka Omwami Yesu Kristo habulafu obulekalilwa tawe.

Currently Selected:

EBIKHOLE BIA ABARUME 28: OLUDC

Highlight

Copy