ABAROMA 2

Obukhalachi bwa Nyasaye khubandu boosi

1 # Mat. 7:1; Luka 6:37 Bulano owashianje, okhalachilanga abashio eshiina noho? Shiolikhwo neshibehelesi shiosi shiosi ta, kata lwoba noli wina. Shichila nokhalachila abandi eshiina, ne nokhola akabakholanga ako, kho wikhalachilanga eshiina omwene. 2Khumanyile mbu, Nyasaye ali habwene olwa akhalachilanga abandu abakholanga amakhuwa shinga ako eshiina. 3Nebutswa iwe owashianje oukholanga malala katsana akokhalachilanga abandi, opaaranga mbu olehonokokha eshinyasio shia Nyasaye? 4#Obuch. 11:23Noho haundi olechelesinjia tsimbabasi tsia Nyasaye tsikhongo, nende obwisimilisibwe nende obwifwilibwe? Shimumanyile mbu, Nyasaye akhwisimilisilinjia mbu kho khwikalukhasie tawe? 5Nebutswa inywe muli abatinyu khandi abemioyo emiumu, khulweshio abeene mumeetanga eshinyasio shienywe okhuba eshikhongo okhushila eshiokhunyanga eyoburuma nende eyokhukhalachilwa eshiina shiahabwene shia Nyasaye yilifwimbulwa. 6#Tsits. 62:12; Tsinj. 24:12Okhuba Nyasaye alirunga buli shiamulala okhulondana nende akayakhola. 7Abandu bandi batsiilililanga okhukhola amalayi nende okhukhaaba oluyali, neifuma, nende obulamu bweinziayo, khubeene abo Nyasaye alihaana obulamu bweinziayo. 8Ne abandi nabo nabokhwiyenyela khandi baloba akali amalayi nibakhola amabi, khubeene abo Nyasaye alabamanyia liruma nende okhusinyikhakhwe. 9Obunyakhani nende obutsunwi bilibaho khubandu boosi abakholanga amabi okhuchachila khu Abayahudi okhuloosiakhwo abamahanga boosi. 10Nebutswa Nyasaye alihaana oluyali, ifuma indayi nende omulembe khuboosi abakholanga amalayi okhuchachila khu Abayahudi mana okhuloosiakhwo Amahanga boosi khandi. 11#Okhuk. 10:17Okhuba Nyasaye shiakholanga ebiela olwa akhalachila abandu eshiina ta.

12Boosi abonoona nibalamanyile amalako ka Musa ta, shibalikhalachilwa eshiina okhulondana namalako ako tawe. Nebutswa abonoona nibamanyile amalako ako balikhalachilwa eshiina okhulondana namalako kenako. 13Okhuba shikhuli khulwa okhuhulila amalako okhuchila abandu nibaba abalunjishi imbeli wa Nyasaye ta, nebutswa khulwa okhukhola akamalako kalakanga. 14Abamahanga shibali nende amalako ka Musa ta; nebutswa muburulanda bwabwe nibakhola akamalako kalakanga, bali amalako khubeene, kata olwa balali namalako aka Musa tawe. 15Ebiima biabwe bimanyiinjia mbu, aka Amalako ka Musa kalakanga kahandikwa mumioyo chiabwe. Obumanyilisi bwomukari bwomumioyo chiabwe bwosi bumanyinjia khandi mbu, kano nakatoto, shichila amapaaro kabwe ebise bindi kabenjililanga abeene, ne ebise bindi kabatereranga. 16Kho mana okhulondana nende Injiili eya eyaalanga, nolwa kaliba khunyanga eyo eya Nyasaye aliyaala amapaaro komukari kabandu okhubirira mu Yesu Kristo.

Abayahudi nende Amalako ka Musa

17Nawe iwe! Wilanganga omuyahudi; wileetanga khumalako ka Musa, ne niwiyitsialila okhuba owa Nyasaye; 18omanyile aka Nyasaye yenyanga okhole, ne weka okhurula khumalako okhwela akali amalayi; 19osuubilanga toto mbu, oli omwimilisi wababofu, obulafu khwabo abali mushiilima; 20omwibaali wabasilu, khandi omwechesia owabalamanyile ta? Oli nende obulamba mbu mumalako oli nobuchesi bwitsule nende obwatoto. 21Wechesinjia abandi, mbushiina oleeyichesinjia omwene? Oyaalanga mbu, “Oleeba ta,” mbushiina iwe mwene wibanga? 22Oboolanga mbu, “Shiolaheyanga ta,” mbushiina iwe omwene oheyanga? Wasila ebifwanani; mbushiina iwe mwene onuulanga tsihekalu? 23Witsialilanga okhuba namalako ka Nyasaye, ne shiofwolanga Nyasaye lwolahulilanga amalakoke ta? 24#Isa. 52:5Amahandiko kaboolanga mbu, “Abamahanga banyekanga Nyasaye khulwa okhubela inywe Abayahudi.”

25Okhushebwa khwenywe nokhweinganga nimulonda amalako, nebutswa nimulalonda amalako ta, bwakhabeele obulayi nimwakhaleshile okhushebwa. 26Nikaba omumahanga, oulashebwa ta, alonda amalako, opaara mbu, Nyasaye shiyakhamulola shinga owashebwa ta? 27Khulweshio, inywe Abayahudi mulikhalachilwa eshiina nabamahanga, shichila shimuhulilanga amalako ta, kata olwa muba nimuli namalako kahandikwa, ne khandi nimwashebwa. Nebutswa bo balondanga amalako kata nibaalashebwa likhoba liomubili tawe. 28Mukhumalilisia ouli omuyahudi mwene owashebwa toto niwiina? Omundu shabetsanga omuyahudi khulwa okhulolekhakhwe khwebulafu, noho okhushebwakhwe, okhuli eshindu shilolekha habulafu tawe. 29#Okhuk. 30:6Habula omuyahudi watoto, nomundu ouli omuyahudi owashebwa mukari, niye owomwoyokwe kwashebwa. Ne kuno nomulimo kwa Roho wa Nyasaye, shikuli okwa amalako kahandikwa tawe. Omundu shinga oyo shianyoolanga oluyali okhurula khumundu ta, habula okhurula khu Nyasaye.

Currently Selected:

ABAROMA 2: OLUDC

Highlight

Copy