ABAROMA 12

Okhukhalabanila Nyasaye

1Khulweshio, baana befwe, khulwa tsimbabasi tsikhongo tsia Nyasaye emusaaya mbu, mwihaane abeene khu Nyasaye shinga omusango omutakatifu, omulamu khandi kwokhuchamisia. Khuno nikhwo okhwinamila Nyasaye khwatoto okhwa mukhoyile okhukhola. 2Ne mulalonda ebiima biabandu beshialo tawe, habula muleshe Nyasaye amukalukhasie mumioyo khulwa okhukalukhasilia elala obuyililisi bwenywe mana mulamanya akokhwenya khwa Nyasaye, nende okhumanyilisia amalayi khandi akokhuchamisia khandi amalamba.

3Ne khulwa obukoosia bwa Nyasaye obwa ndahebwa emboolela buli mulala khwinywe mbu, olepaarakhwo mbu oli oweikulu okhushila owashio tawe. Habula obe omurecherefu mumapaaroko okhulondana nende eshichelo shiobusuubili eshia Nyasaye yakhuhelesia. 4#1 Abakor. 12:12Omubili kuli nebiungo ebinji, nebutswa buli shilala shili nomulimo kwashio okwahukhaane. 5Munjila ndala eyo, kata olwa khuli abanji, khuli omubili mulala halala nende Kristo, ne fwesi khwalimasibwa halala shinga ebiungo ebiaukhaane ebiomubili mulala. 6#1 Abakor. 12:4-11Kho khukhoyile okhwikhoonyela emikabo chiefwe echiahukhaane okhulondana nobukoosia bwa Nyasaye yakhuhelesia. Ne omukabo kwefwe nikuba nikuli okhuyaala likhuwa lia Nyasaye, okhuula khukhole khurio okhulondana nende obusuubili obwa khuli ninabwo. 7Ne nikuba nikuli okhukhalabana, okhuula khukhalabane, nikuba nikuli okhwechesia, okhuula khwechesie; 8nikuba nikuli okhutsuuba, okhuula khukhole khurio. Yesi ouhaananga ahaane nomukhono omusiro, omundu yesi ouli nobunyali okhuula abwikhoonyele obulayi, ne oulolosinjia tsimbabasi akholenje ario nobusangafu.

9Obuheeli bube obwatieli. Musile amabi; ne muhande khumalayi. 10Muheelanenje abeene khubeene nobusangafu shinga abakristo; mana mube nobuha okhuhelesaninjia oluyali abeene khubene. 11Mukhalabane emilimo neitswoni ne mulaba abatofu tawe. Khalabanile Omwami nomwoyo kwosi. 12Obunaayi bwenywe butsiililile okhumusangasia, mwisimilisie mumanyakhano kenywe, ne musaaye buli eshise. 13Mukabanenje emiandu chienywe nende abasuubili bashienywe abatakha, nimwinjisia abacheni mutsingo tsienywe. 14#Mat. 5:44; Luka 6:28Musabile abo abamusandia ikhabi, toto musabe Nyasaye okhubahelesia ikhabi, ne mulabarakhwo eshilaamo shiobubi tawe. 15#Sira 7:34Mwikhoye halala nende abo abekhoya, mwikhuule halala nende abo abekhuula. 16#Tsinj. 3:7Mube nobuheeli obuhelana khubuli mundu. Mulechinjimisia ta, nebutswa mwitutuyie. Mulepaarakhwo okhuba abachesi abeene ta. 17Mularunga omundu yesi obubi khu obubi tawe. Teeme okhukhola akachamisia buli mundu. 18Khole akamunyala okhumenya nomulembe nabandu boosi. 19#Okhuk. 32:35Abaheelwa banje, mulemalilanga abeene eshikwoli ta, nebutswa muleshe liruma lia Nyasaye limale eshikwoli. Okhuba OMWAMI Nyasaye aboola mumahandiko ari, “Ndalamala eshikwoli khandi omwene ndalarunga.” 20#Tsinj. 25:21,22Nebutswa mukhole shinga olwa Amahandiko kaboola mbu, “Omusukuwo naba nali inzala, omuhelesie eshiokhulia, naba nali nobuloho, omuhelesie amaatsi, okhuba khulwa okhukhola orio, olamufwimbia omurwe.” 21Shiolafuchililwa okhuhulwa nobubi tawe, nebutswa ohule obubi khulwa okhukhola amalayi.

Currently Selected:

ABAROMA 12: OLUDC

Highlight

Copy