LUKA 6:27-49

“Nebutswa emuboolela inywe abambulilisinjia mbu, muheele abasuku benywe, nimubakholela amalayi abamusila. Mubalaamile ikhabi abamulaama eshilaamo shiobubi, nimubasaayila abamunyeka. Oukhupaama oluseya lulala, mushiukhasilie khandi olundi, ne oyo oukhunuula likootilio, lekha abukule kata lishaatilio khandi. Buli mundu oukhusaba eshindu omuhelesie, ne lwoundi abukula emianduchio olamubanza mbu akhukalusilie tawe. Mubakholelenje butswa abashienywe akamwikoomba mbu boosi bamukholele inywe. “Kho nimuba nimuheela abamuheela inywe bonyene, ni nganga shiina eya mwakhanyoola? Okhuba kata abonooni baheelanga ababaheela. Kho nimuba nimukhola amalayi khu abamukholelanga inywe amalayi bonyene, eshiakhachila mwanyoola tsikhabi nishiina? Okhuba kata abonooni bosi bakholanga bario! Khandi nimuba nimuhosia abamusuubilanga mbu, balamukalusilia injelesio bonyene, eshiakhachila mwanyoola tsikhabi nishiina? Shichila kata abonooni bosi bahosinjia abonooni bashiabwe, kho mbu babakalusilie eshia babahosiye eshio. Nebutswa inywe muheele abasuku benywe khandi mubakholelenje amalayi. Muhosie nimulalindilila okhukalusilibwa tawe, ne mulaba nomurungo omukhongo, kho mbu mube abaana ba Nyasaye Omukhongo Muno. Okhuba ye nowetsimbabasi khubalamukalusilinjia orio ta, nende khubamayanu. Mube abetsimbabasi shinga olwa Senywe ali owetsimbabasi. “Shimulakhalachile abashienywe eshiina ta, naye Nyasaye shialamukhalachila inywe eshiina tawe. Mubeele abashienywe, naye Nyasaye yesi alamubeela inywe. Helesinjie abashienywe, naye Nyasaye yesi alamuhelesia. Mulanyoola toto eshichelo eshitsuule, eshiikaarwe khandi eshisungusilwe nishisundukha hasi. Okhuba eshichelo shiene eshiamuchelelangamwo abashienywe, nishio eshia mwesi mulachelelwamwo khandi.” Mana khandi Yesu nababoolela oluchelo luno ari, “Omundu omubofu shianyala okhwimilila omubofu washie injila tawe. Namwimilila nibakwa mubwina boosi babili. Abulaho omwechi oushila omwechesiawe, nebutswa olunyuma lwokhweka, buli omwechi abetsanga shinga omwechesiawe. “Eshichila iwe nolola akhakokha akhali mumoni yowashio, ne nolalola eshirundu eshili mumoniyo omwene nishiina? Kata wakhaboolela orie owashio mbu, ‘Owashianje, lekha ekhuyinie akhakokha akhali mumoniyo,’ ne iwe omwene shionyala okhulola eshirundu eshili mumoniyo omwene ta? Oli omwikaati, ranjilila mbeli oyinie eshirundu eshili mumoniyo, ne olanyalilwa okhulola obulayi, lwoyinia akhakokha akhali mumoni yowashio. “Omusaala omulayi shikwamanga ebiamo ebibi tawe. Khandi omusaala omubi shikwamanga ebiamo ebilayi tawe. Buli omusaala kumanyishilanga khubiamo biakwo okwene, shionyala okhunoka amakhuyu okhurula khubisisia tawe. Kata shionyala okhunoka emitsabibu okhurula khumarakalu tawe. Omundu omulayi arusinjia amalayi komwibishilolie liomumwoyokwe, naye omundu omubi arusinjia amabi komwibishilolie liamakhuwa amabi. Okhuba omundu aboolanga aketsuule mumwoyokwe. “Eshichilanga nimunanga mbu, ‘Omwami, Omwami,’ ne nimulakhola akemuboolelanga ta, nishiina? Omundu yesi yesi owitsa khwisie nahulila amakhuwa kanje khandi nakakhola, ali shinga omundu owaranjilila okhuyaba hasi ne niyombokha omuse kweinzuye khulwanda. Ne lwomuyembo kwamaatsi kwetsa, kwakhupa khunzu eyo, nebutswa shikwachireesia tawe, shichila yali niyombakhwa obulayi niyaralila. Nebutswa omundu yesi yesi ouhulilanga amakhuwa kanje, ne nalakakhola ta, ali shinga omundu owombakha inzuye nalaranjiliile okhuyaba hasi niyombakha omuse kwayo tawe. Ne lwomuyembo kwamaatsi kwetsa nikukhupa khunzu eyo, kwachikwisia hasi habwene nahabwene, ne niyisasikha muno.”