EBIKHOLE BIA ABARUME 14

Paulo nende Baranaba bayaala Injiili Ikonio

1Mana nikekholekha Ikonio shinga olwa kali nikekholeeshe Antiokia. Paulo nende Baranaba nibatsia musinagogi, ne nibayaala okhuula omukanda omukhongo okwa Abayahudi nende Abamahanga nibasuubila. 2Nebutswa Abayahudi abakhaya okhusuubila basakania abamahanga mana nibabakhola okhufukula abasuubili. 3Abarume abo nibamenyayo oluhoono olurambi, nibaboola neitswoni khu aka Omwami. Naye Omwami mwene namanyisia mbu, oburume bwabwe khubukoosiabwe nobwatoto khulwa okhubahelesia obunyali bwokhukhola akamakana nende akokhuhuchisia. 4Abandu abomwitookho elo bakhung'ana, abandi nibaloonda aka Abayahudi, nabandi nibaloonda akabarume.

5Mana abandi khubamahanga nende Abayahudi, halala nabemilisi babwe nibasandia abarume nende okhubalasa amachina. 6Olwa abarume bamanya kano, belushila mumataala aka Lisitera nende Deribe, akali Likaonia, nibatsia mumbali etsirondokhaneyho. 7Mana ebweneyo nibayaalayo Injiili.

Paulo nende Baranaba bayaala Injiili Lisitera nende Deribe

8Yaliho omundu undi mwitookho lia Lisitera owali likara okhurula okhwibulwakhwe, ne shiyanyalilwakhwo okhuchenda tawe. 9Kho yekhala narecheresia amakhuwa ka Paulo. Paulo nalola mbu asuubile, khandi nounyala okhuhonibwa. Paulo namuhenga shilunji, 10ne naboola nomwoyo omukhongo ari, “Kololokha, osinjile shilunji nebilenjebio!” Omundu owali likara oyo naruuma ikulu, ne nachaaka okhuchenda. 11Olwa abandu abomukanda abo balola aka Paulo yali nakholile, baayula nibaboola mululimi lwabwe olulikoaonia bari, “Abanyasaye bakhwitsiile mwikondo liabandu!” 12Mana nibakulikha abarume abo ameera kabanyasaye babwe; Baranaba nibamukulikha mbu Zeu, naye Paulo shichila niye owali omubooli mwene nibamukulikha mbu Herime. 13Kho omwisaaliisi owa omunyasaye Zeu, owa Ihekaluye yali elwanyi welitaala elo, nareera tsisurusi nende ebimuli hashiliibwa, niyenyanga mbu, ye halala nende abemikanda bamalile abarume abo omusango.

14Olwa Baranaba nende Paulo bahulila aka bali nibenya okhukholelwa, barandula tsingubo tsiabwe mana nibatsia tsimbilo hakari womukanda nibalanjilisia bari, 15#Okhur. 20:11; Tsits. 146:6“Baana befwe, mbushiina mukholanga amakhuwa kano? Ifwe khuli butswa abandu nabandu shinga inywe! Khuli hano khulwa okhumuyaalila Amakhuwa Amalayi aka Yesu kho mbu, mwikalukhasie okhurula khubindu biabutswa bino, mana mwinamile Nyasaye ouliho mwoyo, owalonga likulu nende eshialo, inyanza nende biosi ebilimwo. 16Mutsinyanga tsiabira Nyasaye yafuchilila abandu boosi okhukhola shinga olwa benya. 17Nebutswa buli lwosi akholanga amakhuwa amalayi khulwa okhumanyisia inywe mbu aliho. Khandi amwikwisilinjia inywe ifula okhurula mwikulu nende okhumuhelesia lichesa mubise bikhoyeele. Amuhelesinjia ebiokhulia nende okhumusangasia mumioyo.” 18Nebutswa kata olwa abarume abo baboola amakhuwa ako, shibayekalila abomukanda okhubamalila omusango tawe.

19Nebutswa Abayahudi bandi betsaho okhurula Antiokia litookho lili Pisidia nende okhurula Ikonio, nibakatilisia abandu mbu, baleshe abarume. Nibalasa Paulo namachina, mana nibamukhwesa nibamuyila elwanyi welitaala elo, nibaparanga mbu afwile. 20Nebutswa olwa abasuubili bekhung'asiaho nibamubotokhaane, yabukhaho, ne nakalukha mwitaala. Inyanga yalondakhwo, ye halala nende Baranaba batsia Deribe. .

Paulo nende Baranaba bakalukha Antiokia mu Siria

21Paulo nende Baranaba bayaala Injiili Deribe, mana nibanyoola abalondi abanji. Mana nibakalushile Lisitera nende Ikonio, nende Antiokia mu Pisidia. 22Nibatinyilisia abeechi nende okhubatsuuba mbu, balumiilile mubusuubili. Nibabeechesia nibaboola bari, “Okhuula khubirire mumanyakhano amanji, kho khwinjile mubwami bwa Nyasaye.” 23Baahula abakofu mubuli ikanisa, mana olunyuma lwokhusaaya nende okhuhonga inzala, babara mumakhono aka Omwami owabasuubilila.

24Nibamalile okhubira mumbali tsia Pisidia, boola Pamufilia. 25Ebweneyo bayaala oburume mu Periga, ne nibatsia Atalia. 26Okhurula ebweneyo batsila muliaro okhuula Antiokia, habundu aha bali nibahaanilwe mbu, baliindwe nobukoosia bwa Nyasaye, khulwa emilimo echia bali nibamalile okhukhola.

27Ne olwa boolayo, bakhung'asia abandu beikanisa eyo halala, mana nibabarumbulila koosi aka Nyasaye yali nakholile halala ninabo, khandi shinga olwa yali niyekuliile abamahanga omuliango kwokhwinjila mubusuubili. 28Mana nibamenya nende abasuubili abo khulwa oluhono olurambi.

Currently Selected:

EBIKHOLE BIA ABARUME 14: OLUDC

Highlight

Copy