EBIKHOLE BIA ABARUME 13
13
Baranaba nende Saulo baahulwa nende okhurumwa
1Mukanisa ya Antiokia balimwo abalakusi nende abeechesia bano, Baranaba, Simeoni (owalangwa mbu Omumali,) Lukio (owa Kurene,) Manaeni (owakhusibwa nende omuruchi Herode) nende Saulo. 2Olwa bali nibakhalabanilanga Omwami khandi nibahonganga inzala, Roho Omutakatifu yababoolela ari, “Munzahulile Baranaba nende Saulo khulwa emilimo echia ndabalanjiile.” 3Kho olunyuma lwokhuhonga inzala nende okhusaaya, babarakhwo emikhono mana nibabaseebula.
Baranaba nende Saulo bayaala Injiili Kupuro
4Roho Omutakatifu yaruma Baranaba nende Saulo okhutsia Seleukia, ne okhurula yaho benjila muliaro nibatsia khushikhalachinga shia Kupuro. 5Olwa boola Salami, bayaala likhuwa lia Nyasaye mutsisinagogi tsia Abayahudi. Bali nende Yohana Mariko owobakhoonya emilimo echio.
6Olwa bali nibambuushe eshikhalachinga eshio, boola Pafo, ewa babukaana nende omufumu Omuyahudi owali omulakusi wobubeeyi oulangwa mbu Bari Yesu. 7Yali omwitsa womukafuna weshikhalachinga eshio, oulangwa mbu, Serugio Paulo, owali omundu omuchesi. Omukafuna oyo yalanga Baranaba nende Saulo mbu bamuyaalile likhuwa lia Nyasaye. 8Nebutswa omufumu Elima, (nilio eliiralie mulugiriki), yateema okhubekalila, kho mbu omukafuna oyo aleshe okhukalukhana niyekhola omuloondi wa Kristo. 9Nebutswa Saulo owalangwa khandi mbu Paulo, niyetsulwemwo Roho Omutakatifu, yahenga omufumu oyo mumoni, 10ne naboola ari, “Iwe omwana wa Setani! Oli omusuku wabuli likhuwa liobwtoto. Iwe wetsulamwo obukaati obubi, ne buli lwosi oteemanga okhukalukhasia obwatoto obwa Omwami okhubukhola obubeeyi! 11Bulano obunyali obwa Omwami bulakhwitsakhwo, ne bulakhukhola omubofu, ne khulwa ebisekhwo shiolalola obulafu bweshiteere tawe.”
Habwene nahabwene Elima nahulila eshindu shinga omwosi omumali nikufuunikha tsimonitsie, nachenda nakoyana nakhaaba omundu wokhumutiila omukhono namwimilila. 12Olwa omukafuna yalola akekholekha yasuubila, shichila yahuchisibwa namechesio aka Omwami.
Paulo nende Baranaba bayaala mwitookho lia Antiokia mu Pisidia
13Paulo nende abakhalabani bashie batsiila muliaro okhurula Pafo niboola Peruga, litookho elili Pamufilia. Nebutswa Yohana Mariko yabalekhayo nakalukha Yerusalemu. 14Batsiililila nibabira Periga niboola Antiokia elili Pisidia. Ne khunyanga eya Isabato batsia musinagogi mana nibekhalamwo. 15Olunyuma lwokhusoma eshitabu shiamalako ka Musa nende kabalakusi bahandika, abemilisi bemusinagogi babarumila omurume nibaboola bari, “Baana befwe, khumusaaya mbu, muboolelekhwo abandu bano likhuwa eliamuli ninalio eliokhubatinyilisia.” 16Kho Paulo nasinjila, nabasimila omukhono, nachaaka okhuboola ari, “Abaisiraeli bashianje, nende inywe Abamahanga boosi aba muli hano abenamilanga Nyasaye, muurecheresie! 17#Okhur. 1:7; Okhur. 12:51Nyasaye oyo owabandu ba Isiraeli yaahula abakuuka befwe, nabakhola abandu abelihanga likhongo munyanga tsiabamenyanga shinga abarende mushialo eshia Misiri. Nyasaye yabarusia Misiri nobunyalibwe obukhongo. 18#Obub. 14:34; Okhuk. 1:31Mana nabesimilisilia mushitsiimi khulwemiyika amakhumi kane. 19#Okhuk. 7:1; Yos. 14:1Yamulula amahanga musafu mushialo eshia Kanani mana nakhola abandube okhubukula eshialo eshio. 20#Abay. 2:16; 1 Sam. 3:20Kano koosi kabukula oluhoono lwemiyika ebikhumi bine namakhumi karano (450).
“Olunyuma lwako#13:20 Kano koosi kabukula oluhoono lwemiyika ebikhumi bine namakhumi karano. Nyasaye yabahelesia abayaasi okhuula munyanga tsiomulakusi Samweli. 21#1 Sam. 8:5; 1 Sam. 10:21Ne olwa basaba mbu, baheebwe omuruchi, Nyasaye yabahelesia Saulo omusiani wa Kishi, owomuluyia lwa Benjamini. Yali omuruchi wabwe khulwemiyika amakhumi kane. 22#1 Sam. 13:14; 1 Sam. 16:12; Tsits. 89:20Olunyuma lwokhumurusiaho, Nyasaye yakhola Daudi okhuba omuruchi wabwe. Nyasaye yaboola khuye ari, ‘Enyoolile mbu, Daudi omusiani wa Yese, nomundu owa ndachama, alakhola koosi aka enzenya mbu akhole.’ 23Yali Yesu, owomulwibulo lwa Daudi, owa Nyasaye yakhola omuhonia wabandu ba Isiraeli, shinga olwa yali niyasuubisia. 24#Mrk. 1:4; Luka 3:3Yesu nashili okhuchaaka emilimochie, Yohana yayaalila abandu boosi aba Isiraeli mbu, okhuula bekalukhasie okhurula mubwonooni bwabwe mana babatiisibwe. 25#Yoh. 1:20; Mat. 3:11; Mrk. 1:7; Luka 3:16; Yoh. 1:27Ne olwa Yohana yali nali ahambi okhumala omulimokwe, yareeba abandu ari, ‘Mupaaranga nisie wina? Shindi nisie owa mulindililanga oyo tawe. Nebutswa recheresie! Omwene oyo yetsanga inyuma wanje, ne shiengwanile okhufwalula ebilaarobie okhurula mubilenjebie tawe!’
26“Abaisiraeli bashianje, abali abolwibulo lwa Aburahamu, nende Abamahanga boosi abali hano abenamilanga Nyasaye; nifwe aba oburume bwobuhonia buno burumiilwe! 27Okhuba abandu bamenyile mu Yerusalemu, nende abemilisi babwe, shibamanyile mbu, niye omuhonia tawe, kata shibamanyilisia amakhuwa akabalakusi akasoomungwa buli khunyanga eya Isabato tawe. Habula bakhola amakhuwa akabalakusi okhusiibwa khulwa okhukhalachila Yesu okhufwa. 28#Mat. 27:22,23; Mrk. 15:13,14; Luka 23:21-23; Yoh. 19:15Ne kata olwa balaanyoola eshifune shiosi shiosi eshiokhumukhalachila okhufwa ta, basaba Pilato mbu, Yesu yerwe. 29#Mat. 27:57-61; Mrk. 15:42-47; Luka 23:50-56; Yoh. 19:38-42Kho olunyuma lwokhukhola koosi ka Amahandiko kaboolanga khuye, bamwakula okhurula khumusalaba mana nibamuyabila mung'ani. 30Nebutswa Nyasaye yamulamusia okhurula mubafu, 31#Ebikh. 1:3mana khulwetsinyanga tsinyinji yaloleshela abachendanga ninaye okhurula Galilaya okhuula Yerusalemu. Nibo bulano ababoolanga obuloli khuye khubandu ba Isiraeli. 32#Tsits. 2:7Ne khuli hano okhumurereera Amakhuwa Amalayi aka Nyasaye yasuubisia okhukholela abakuuka befwe. 33Yosiiye amakhuwa kano khwifwe abali abetsukhulu babwe khulwa okhulamusia Yesu, shinga khandi olwa kahandikwa mutsabuli yakhabili kari,
‘Niwe omwana wanje,
leelo luno engwile papawo.’
34 #
Isa. 55:3
Ne okhulondokhana nokhulamusibwakhwe okhurula mubafu Nyasaye yaboola ari;
‘Ndilikhuhelesia tsikhabi tsindakatifu khandi etsiatoto,
etsia ndasuubisia Daudi.’
35 #
Tsits. 16:10
Khandi kano kenoosibungwa mutsabuli yindi mbu,
‘Shiolifuchiilila omutakatifuwo okhubolela mung'ani tawe.’
36Okhuba Daudi namalile okhukhalabanila lichoomo lia Nyasaye munyangatsie yafwa, mana nayabilwa halala nende abakuukabe, nakwo omubilikwe nikubolela mung'ani. 37Nebutswa oyo owa Nyasaye yalamusia okhurula mubafu shiyabolakhwo kata nahatutu tawe. 38Kho khwenya mbu, inywe Abaisiraeli bashianje, mumanye mbu nokhubirira mu Yesu, owa mwayaalilwa habulafu, owamulaleshelwa ebionoono bienywe. 39Khandi nokhubirira muye omwa, buli ousuubila muye alekhulungwa okhurula mubwonooni bwosi obwa Amalako ka Musa kalanyala okhumuleekhuula okhurulamwo tawe. 40Khulweshio mube meeso kho mbu, kabalakusi baboola kano kaleshe okhukwa khwinywe mbu;#13:40 Amahandiko kandi shikali nende, khwinywe tawe.
41 #
Hab. 1:5
‘Lole, inywe abachaayi!
Muchenye ne mufwe!
Okhuba eshiekholanga leelo luno,
neshindu eshiamulanyala okhusuubila,
kata omundu namwinoosia tawe!’ ”
42Ne olwa Paulo nende Baranaba bali nibarulanga musinagogi, abandu babasaaya mbu, bakalushile okhuboola amakhuwa ako khunyanga eya Isabato yiloondakhwo. 43Olunyuma lwabandu okhusalana okhurula musinagogi, Abayahudi abanji nende Abamahanga abenamilanga Nyasaye, baloonda khu Paulo nende Baranaba. Abarume abo nibaboola ninabo nibabatsuuba mbu, balumiilile mukhumenya mubukoosia bwa Nyasaye.
44Khunyanga eya Isabato eyaloondakhwo, ahambi abandu boosi abomwitookho elo bakhung'ana okhuhulila likhuwa lia Nyasaye. 45Ne olwa Abayahudi balola abemikanda abo, batiilwa neimbalikha, nibafukula aka Paulo yaboola, ne nibamunyeka. 46Mana Paulo nende Baranaba nibaboola nomwoyo omukhongo obularia ta bari, “Kali habwene mbu, inywe mube abambeli okhuyaalilwa likhuwa lia Nyasaye. Nebutswa shichila mwalifukula nimwibukula mbu shimukwaniile obulamu bwobumeli ta, khulashiukhana mana khutsie khu abamahanga. 47#Isa. 42:6; 49:6Okhuba lilako lia Nyasaye yakhuhelesia liboola liri,
‘Ndamwahula mbu, mube obulafu khu abamahanga,
kho mbu abandu boosi mushialo bahonibwe.’ ”
48Olwa Abamahanga bahulila ako, basangaala, nibetsoomia likhuwa elia Omwami, ne abo boosi abaahulwa khulwa obulamu bwobumeli nibasuubila.
49Mana likhuwa elia Omwami nilitswana mumbali tsiosi. 50Nebutswa Abayahudi batswanzwania abasaatsa abamanyikhana abomwitookho nende abakhasi abamahanga abali abakhongo, abenamilanga Nyasaye. Nibayakula obusandibwi khu Paulo nende Baranaba, nibabaloonda okhurula mumbali tsiabwe. 51#Mat. 10:14; Mrk. 6:11; Luka 9:5; 10:11Abarume abo nibateng'ulula olufu lwokhubilenje biabwe okhubafukula mana nibatsia Ikonio. 52Nebutswa abasuubili abali Antiokia bekhoya muno khandi nibetsulwamwo Roho Omutakatifu.
Currently Selected:
EBIKHOLE BIA ABARUME 13: OLUDC
Highlight
Share
Copy
Want to have your highlights saved across all your devices? Sign up or sign in
