OBUBALI 11
11
Habundu ahalangwa mbu, Tabera
1Mana abandu nibeyiniakanila Nyasaye OMWAMI, amatinyu aka balola. Ne olwa OMWAMI Nyasaye yakahulila yasinyikha, mana naruma omulilo mubandu abo, nikwakha hakari mubo, khandi nikusamba ebitonye biokhundulo biekambi. 2Mana abandu abo nibamulilila Musa, naye Musa nasaaya khu OMWAMI Nyasaye, mana omulilo okwo nikusima. 3Kho habundu aho nihakulikhwa elira mbu Tabera,#11:3 Tabera: Tabera muluheburania eshisina mbu, okhusamba. shichila omulilo okwa OMWAMI Nyasaye kwakha hakari mubo.
Musa yaahula abemilisi amakhumi musafu
4Baliho abarende abachendanga halala nende Abaisiraeli, Nabo bali nolusa lweinyama olunji. Mana kata Abaisiraeli boosi nibachaaka okhwiyiniakana nibaboola bari “Nikhwakhabelekhwo butswa neyinyama khwalia! 5Nikhushili Misiri khwalitsanga tsinyeni nikhulakulile ta, khwalitsanga obunuuka, amahondo, eliani, ebitungu nende tsitania, 6ne bulaano amaani kefwe kahwele, ne khubulakhwo eshindu shindi shiakhunyala okhulia habula imana butswa!”
7 #
Okhur. 16:31
Ne imana tsana yalinji shinga imwo yamabele keikhumba, eyobukondo obulafu lafu. 8#Okhur. 16:13-15Abandu barulanga nibayitola mana bachisia khuluchina noho bachiswaka mubinu. Mana bachiteshela mutsinyungu, ne bachikasiakhwo emikaate. Ne eshiuya shiayo shialinji shinga eshiuya shiemikaate chiteshilwe namafura. 9Olwa liime liamanga khukambi mushilo, ne imana yaama ninalio halala.
10Mana Musa nahulila abandu nibalilanga mumikanda chiabwe habwinjililo bweliheemalie. Kho OMWAMI Nyasaye natiilwa noburuma obunji, naye Musa nasinyika. 11Kho Musa naboolela OMWAMI Nyasaye ari, “Mbushina niundeerera isie omukhalabaniwo amatinyu kano? Shichila shiina niusinyishila? Shichila shiina niundeshela omusiko kwabandu bano boosi? 12Shiendi nisie owebula abandu bano ta! Kho eshichila niumboolela mbu, ebachinje mumakhono kanje shinga ouchinga indana, okhuula mushialo shiawetsuba okhuhelesia abakuuka babwe nishiina? 13Ndakhanyoola hena mushitsiimi muno inyama yokhuhelesia abandu bano boosi? Okhuba bandililanga mbu, ebahelesie inyama balie. 14Shienyala okhuchinga abandu bano sienyene ta, omusiko kuno nomusiro muno khwisie. 15Nikaba mbu nolwa otsia okhuukholela, ekhusaaya nochama unzire efwe bwangu, kho endeshe okhulola amatinyu kanje kano.”
16Mana OMWAMI Nyasaye naboolela Musa ari, “Khung'asia abasaatsa amakhumi musafu okhurula mubemilisi ba Abaisiraeli, aba omanyile mbu nabemilisi babandu khandi abasinjilili babwe. Mana obareere mwiheema basinjileho halala ninawe. 17Nasi ndalekha hasi okhuboola ninenywe yaho. Ndalabukulakhwo iroho yandara mwiwe neyinjisia mubo. Nabo balakhukhoonya okhuchinga omusiko okwo, kho mbu oleshe okhukwitukha wenyene tawe. 18Bulano boolela abandu ori, ‘Mwisiiye abeene khulwa inyanga ya mukamba, okhuba mulalia inyama. OMWAMI Nyasaye ahuliile nimulilanga khandi nimuboola mbu mwikombanga okhulia inyama, khandi mbu mwali obulayi nimushili Misiri. Bulano OMWAMI Nyasaye alamuhelesia inyama mulie. 19Shimulachilia khulweinyanga ndala noho tsinyanga tsibili, noho tsinyanga tsirano noho tsinyanga ekhumi noho tsinyanga amakhumi kabili tawe, 20habula khulwomwesi omulamba, okhuula olwa yilamurulila mumolu, khandi yimusinye. Kano kalekholekha kario shichila mulobile OMWAMI Nyasaye ouli hakari mwinywe, ne nimwiyiniakana khuye nimuboola mbu shiamwakharulile Misiri tawe.’ ”
21Nebutswa Musa yaboolela OMWAMI Nyasaye ari, “Abandu benzimiliile nabandu ebikhumila ebikhumi bisasaba (600,000) abachendanga khubilenje, nawe oboola mbu, olabahelesia inyama balie khulwomwesi omulamba! 22Kata nobeerera tsing'ombe namakondi, shibibahela tawe! Kata tsinyeni tsiomunyanza tsiosi nitsikhung'asibwa, shitsibahela tawe.”
23Naye OMWAMI Nyasaye nareeba Musa ari, “Nishina eshinyala okhukhaya isie? Bulano olalola nikali aka emboolile kekholekha noho tawe.”
24Kho Musa narula, naboolela abandu amakhuwa aka OMWAMI Nyasaye yali naboolile. Nakhung'asia abasaatsa amakhumi musafu khubemilisi babandu, nababotokhasia khuliheema liosi. 25Mana OMWAMI Nyasaye niyekha hasi nali mwileesi naboola nende Musa. Ne nabukulakhwo iroho eya yali niyara mu Musa nachira mubemilisi amakhumi musafu abo. Olwa iroho eyo yabenjilamwo bachaaka okhurumbula shinga abalakusi, nebutswa kali butswa khulweshise shiti.
26Bulano abasaatsa babili khubemilisi abo amakhumi musafu bali nibasikaale mukambi, mulala mbu Elidabu, ne oundi mbu Medadi. Bali balala khubahandikwa nebutswa shibali nibarulile okhutsia ewa liheema liali tawe. Kho nibali mukambi iroho eyo yabenjilamwo, ne boosi nibachaaka okhurumbula shinga abalakusi. 27Ne omuraaka oundi niyelukha naboolela Musa ari, “Elidadi nende Medadi balarumbulanga muliira elia OMWAMI Nyasaye mukambi.” 28Naye Yoshwa omusiani wa Nuni, owali omukhonyeleli wa Musa okhurula muburaakabwe naboolela Musa ari; “Omwami wanje Musa, obakaye!”
29Nebutswa Musa yamukalusia naboola ari, “Khane otiililwe imbalikha khulwanje? Shiakhuha OMWAMI Nyasaye yahelesia abandube boosi irohoye mana boosi baba abalakusi!” 30Mana Musa nende abemilisi amakhumi musafu ba Abaisiraeli abo nibakalukha mukambi.
OMWAMI Nyasaye aruma Tsisindu
31Mana OMWAMI Nyasaye naruma omuyeka nikuhutsa, nikureera tsisindu okhurula munyanza, ne nitsikwa ahambi neliheema, nitsibunjikha khwiloba oburambi buhela ahambi tsifuti tsitaru, ne nitsibotokhana tsimbeka tsiosi tsieliheema habundu hanyala okhuhela oluchendo lweinyanga ndala. 32Mana khunyanga eyo yosi nende eshilo shiosi nende inyanga yaloondakhwo yosi, abandu barula nibatoola tsisindu. Oyo owatoola tsinemu muno yatoola amatebe ekhumi. Mana nibatsibakala okhuuma nitsibotokhana liheema liosi. 33Olwa bali nibashilitsanga tsisindu etsio, nibashili okhutsimala, OMWAMI Nyasaye yatilwa noburuma khubandu mana nabarumila eshinyasio eshikhongo. 34Khulweshio habundu yaho nihakulikhwa mbu, Kibirotsi-hatava, eshisina mbu: “Ebilindwa biobwikombi” shichila baliho abandu abali nobwikombi bayabilwayo. 35Okhurula Kiburotsi Hatava abandu bachenda okhuula Hazerotsi, ne nibakhomayo ikambi yabwe.
Currently Selected:
OBUBALI 11: OLUPR
Highlight
Copy
Compare
Share
Want to have your highlights saved across all your devices? Sign up or sign in
