ABALAWI 9
9
Haroni akhola emisango
1Khunyanga yomunane yelisabo liokhwahulwa elo, Musa yalanga Haroni nabasianibe nende abakofu ba Isiraeli. 2Ne naboolela Haroni ari, “Bukula ihunwa yomusango kwobwonooni nende limiiku liomusango omusambe ebilalikhwo nobulema bwosi ta, mana obihaane khu OMWAMI Nyasaye. 3Mana oboolele abandu ba Isiraeli babukule imbusi ikhole khulwa omusango kwobwonooni eshimoosi nende eshimeme shielikondi biosi ebiomuyika mulala ebilalalikhwo obulema bwosi bwosi ta, khulwa omusango omusambe. 4Babukule khandi iheyi nende limiiku khulwa omusango kwokhureera omulembe. Babihaane khu OMWAMI Nyasaye nende omusango kweimele yitsokasibwe namafura. Okhuula bakhole kano shichila inyanga yino OMWAMI Nyasaye alabaloleshela.”
5Mana nibareera imbeli weliheema litakatifu ebindu biosi ebia Musa yali nababoolele. Abomukhung'ano boosi nibakhung'anilaho khulwa okhwinamila OMWAMI Nyasaye. 6Mana Musa nababoolela ari, “Kano niko aka OMWAMI Nyasaye amulachilisiye okhukhola, kho mbu oluyalilwe lumuloleshele okhubirira mubulafu obukhongo bwokhubahokhwe.” 7#Abaheb. 7:27Musa naboolela Haroni ari, “Tsia hashimalilo shiemisango ohaane omusangokwo kwobwonooni nende omusangokwo omusambe, khulwa okhwitisa iwe omwene nende abandu. Mana oreere omusango kwabandu, obakholele eshitiso shinga olwa OMWAMI Nyasaye alachilisiye.”
8Kho Haroni nasita hambi khushimalilo shiemisango, nasinza eshimoosi shiomusangokwe omwene okwobwonooni. 9Nabo abasianibe nibamureerela amalasile, naye niyeenamwo olwalalwe nakabakha khutsinzika tsieshimalilo shiemisango; Ne amalasile katong'a nakatsukha hasi weshimalilo shiemisango. 10Nebutswa amasinya nende tsifuko nende amasinya kokhushitakhaliira ebiomusango kwobwonooni, yabisambila khushimalilo shiemisango shinga OMWAMI Nyasaye yalachilisia Musa. 11Ne inyama, nende liseelo yabisamba nomulilo elwanyi weikambi.
12Mana Haroni nasinza isolo eyomusangokwe omusambe. Abasianibe nibamuleelera amalasile, nakahanya tsimbeka tsiosi tsiokhushimalilo shiemisango. 13Nibamureerela eshitonye shilala shiashilala shieisolo eyo nende omurwe kwayo naye nabisambila khushimalilo shiemisango. 14Mana niyoosia amala nende ebilenje, ne nabisambila halala nomusango omusambe okwo khushimalilo shiemisango.
15Olunyuma lwako Haroni nareera omusango kwabandu. Nabukula imbusi yomusango kwabandu kwobwonooni, nachisinza, ne nachihaana shinga olwa yali nakholile omusango kwobwonoonibwe omwene. 16Ne nareera isolo yomusango omusambe nachihaana okhulondana nelilako. 17Mana nareera omusango okweimele, ne nafumbarakhwo khubusie obwo ne nabusambila khushimalilo shiemisango. Kuno kwali okwokhumeeta khumusango omusambe okwa buli mumabwibwi.
18 #
Abal. 3:1-11
Haroni khandi nasinza iheyi nende limiiku ebiomusango okwokhureera omulembe khulwa abandu. Nabo abasianibe nibamureerela amalasile, naye nakatsushilila khushimalilo shiemisango tsimbeka tsiosi. 19Ne nara amasinya aka iheyi nende aka limiiku, aka isembe, nende amasinya kafwiimbanga khumala, nende tsifuko, nende akali khushiini, 20nende khu itakata, ne nabiyila biosi khushimalilo shiemisango nabisambilakhwo. 21Ne nahaana tsitakata nende ebiatakho biebilenje bisaatsa shinga omusango kwokhuchelwa imbeli wa OMWAMI Nyasaye, shinga olwa Musa yali nalachilisiye.
22 #
Obub. 6:22-26
Mana Haroni nachinguula amakhonoke ikulu nalenjesiye khubandu mana nabalamila ikhabi. Niyakhamala okhukhola omusango okwobwonooni nende omusambe nende okwokhureera omulembe yekha hasi okhurula khushimalilo shiemisango. 23Mana Musa nende Haroni nibenjila mwiheema litakatifu; ne olwa barulamwo balamila abandu ikhabi, ne oluyali olwa OMWAMI Nyasaye niluloleshela abandu boosi okhubirira mubulafu obukhongo muno. 24Ne bwangu omulilo nikurula khu OMWAMI nikusamba omusango nende amasinya akali khushimalilo shiemisango, ne olwa abandu boosi balola ako, bayula, nibakwa hasi mafumama nibenamila OMWAMI Nyasaye.
Currently Selected:
ABALAWI 9: OLUPR
Highlight
Copy
Compare
Share
Want to have your highlights saved across all your devices? Sign up or sign in
