ABALAWI 8
8
Okhwahulwa khwa Haroni nabasinibe okhuba abesaaliisi
(Okhur. 29:1-37)
1OMWAMI Nyasaye naboolela Musa ari, 2“Bukula Haroni nende abasianibe, nende ebifwalo biobwisaaliisi ebio, nende amafura kokhutsushilila ako, nende Ihunwa yomusango kwobwonooni eyo, nende amamiiku kabili ako nende eshimwelo nishilimwo emikaate chibulamwo limela eshio. 3Mana olanje abomukhung'ano boosi betse hamuliango weliheema litakatifu.”
4Mana Musa nakhola shinga olwa OMWAMI Nyasaye yamulachilisia, nabo abomukanda nibakhung'ana hamuliango weliheema elo. 5Mana Musa naboolela abomukhung'ano abo ari, “Kano niko aka OMWAMI Nyasaye alachilisiye mbu kaholwe.”
6Mana Musa nareera Haroni nabasianibe imbeli womukhung'ano, nabo nibeyosia namaatsi okhwilafia. 7Musa nafwala Haroni lishati nende ikanzu, namuboya omushipi mushishienjeshie. Musa namufwala ifoti#8:7 ifoti: ingubo yomukari eyafwalungwa nabesaaliisi., Ne namuboha mushishienje obutinyu nomushipi okwanyukhwa khuifoti eyo. 8Mana Musa namufwala iloloti eyo khushilifu, ne mukari mwayo naramwo amachina kabili aka Urimu nende Tsumimu#8:8 Urimu nende Tsumimu: Amachina kabili aka omwisaaliisi yekhoonyelanga okhumanya akokhwenya khwa Nyasaye.. 9Musa namufwala eshilemba khumurwe, ne imbeli washio, nashirakhwo eshimuli shieitsahabu, eshili olusimbi olutakatifu, shinga olwa OMWAMI Nyasaye yali namulachilisia.
10Mana Musa nabukula amafura kokhutsushilila, natsushilila liheema litakatifu, nende biosi ebiali mulio; ne munjila eyo nabiahula okhuba ebia OMWAMI Nyasaye. 11Mana Musa nabukulakhwo khumafura ako nakahanya okhuula musafu khushimalilo shiemisango nende ebimanulwa biashio, nende khwibeseni neshichibi shalio, khulwa okhubiahula khu OMWAMI Nyasaye. 12Mana niyahula Haroni khulwa okhumutsushilila amafura ako khumurwe. 13Olunyuma Musa nareera abasiani ba Haroni imbeli womukhung'ano, nabafwala amashati, nababoha omushipi mubishienje biabwe nende okhubaboha tsikofia kumirwe chiabwe, shinga OMWAMI Nyasaye yali nalachilisiye.
14Mana Musa nareera ihunwa yomusango kwobwonooni; Haroni nabasianibe nibatiila emikhono chiabwe kumurwe kweihunwa eyo. 15Musa nachisinza, nabukula khumalasile kayo nolwalalwe nakabakha khutsinzika tsieshimalilo shiemisango tsimbeka tsiosi khulwa okhushisiiya. Ne nasundula amalasile katong'a hasi weshimalilo shiemisango. Kho munjila eyo nashiahula nende okhushitisa. 16Ne Musa nabukula amasinya koosi akali khumala, nende khushitakhaliira, netsifuko tsiombi, namasinya katsio; mana nabisambila khushimalilo shiemisango eshio. 17Nebutswa yasamba nomulilo ihunwa, neliseelo liayo, neinyama yayo, nobuse bwayo yasamba nomulilo, elwanyi weikambi shinga olwa OMWAMI Nyasaye yali namulachilisiye.
18Mana Musa nareera khandi limiiku eliomusango okwokhusambwa. Haroni nabasianibe nibara nibatila emikhono chiabwe khumurwe kwalio. 19Naye Musa nalisinza, namiitsa amalasile kalio khushimalilo misango tsimbeka tsiosi. 20Ne olwa limiiku elo liatonywamwo ebitonye, Musa yasamba omurwe kwalio, nende ebitonye bialio namasinya kalio. 21Mana niyosia amala nende ebilenje bialio namaatsi. Ne nasamba limiiku liosi khushimalilo shiemisango shinga omusango okwokhusambwa, okwa isakakha, eyomusango kukholilwe nomulilo khu OMWAMI Nyasaye, shinga olwa OMWAMI Nyasaye yali nalachilisiye Musa.
22Mana Musa nareera limiiku liakhabili elia okhwahulwa. Naye Haroni nabasianibe nibatila emikhono chiabwe khumurwe kwalio. 23Musa nalisinza, nabukula khumalasile kalio nakabakha khubutsunzu bweshirwi shia Haroni shiomukhono musaatsa, nende khulwala lukali lwomukhono musaatsakwe nende olwala olukali lweshilenje eshisaatsashie. 24Nareera abasiani ba Haroni nababakha namala khumalasile ako khubutsunzu bwebirwi biabwe, tsinzala tsingali tsiemikhono misaatsa chiabwe nende tsinzala tsingali tsiebilenje biabwe ebisaatsa. Ne Musa nahanya amalasile katong'a tsimbeka tsiosi tsieshimalilo shiemisango. 25Ne nabukula amasinya nende isembe nende amasinya koosi akali khumala, nende akali khushitakhaliira, netsifuko tsiombi namasinya katsio neshiatakho eshisaatsa. 26Khandi nabukula omukaate okhurula mushimwelo shiemikaate chibulamwo limela, echiahulilwa OMWAMI Nyasaye, nabukula eliandasi libulamwo limela, nende liandasi limukate okwakasibwa namafura nende eshisikuti shilala mana nabira biosi khumasinya nende khushiatakho eshisaatsa eshio. 27Mana nara ebindu ebio biosi mumikhono chia Haroni nende abasianibe, ne nabichela shinga omusango kwokhuchelwa imbeli ewa OMWAMI Nyasaye. 28Mana Musa nabibukula okhurula mumikhono chiabwe, nabisambila khushimalilo shiemisango nende omusango omusambe shinga omusango okwa okhwahulwa, kube isakakha indayi, eyomusango omusambe khu OMWAMI Nyasaye. 29Ne Musa nabukula itakata nachichela shinga omusango kwokhuchelwa imbeli ewa OMWAMI Nyasaye, nishio eshiali eshitonye shia Musa shielimiiku liomusango okwokhwahulwa. Mana Musa nakhola ebindu biosi shinga OMWAMI Nyasaye yamulachilisia.
30Mana Musa nabukula khumafura akokhutushilila nende khumalasile akali khushimalilo shiemisango, nakahanya khu Haroni nende ebifwalobie nende khubasianibe halala nebifwalo biabwe. Mana munjila eyo nabahula bo abeene halala nebifwalo biabwe khu OMWAMI Nyasaye.
31Ne Musa naboolela Haroni nabasianibe ari, “Muteshele inyama yino hamuliango kweliheema litakatifu, mana muchilileho nende omukaate okuli mushimwelo shiomusango okwokhwahulwa shinga olwa OMWAMI Nyasaye yalachilisia. 32Ne ebitong'a khumukate nende inyama, mubisambe nomulilo. 33Ne khulwa tsinyanga musafu shimularula elwanyi womuliango okwa liheema elo tawe, okhuula olwa tsinyanga tsiokhwahulwa khwenywe tsilaba nitsihwele. 34OMWAMI Nyasaye yakhulachilisia okhukhola shinga olwa khukholile olwa leelo khulwa okhumutisa inywe. 35Mulatong'a hamuliango weliheema litakatifu khulwa tsinyanga musafu eshiteere neshilo nimukholanga aka OMWAMI Nyasaye alachilisiye okhukhola. Ne nimulakhola murio ta, mulafwa. Ako niko aka OMWAMI Nyasaye yandachilisiye.” 36Mana Haroni nabasianibe nibakhola koosi aka OMWAMI Nyasaye yabalachilisia okhubirila khu Musa.
Currently Selected:
ABALAWI 8: OLUPR
Highlight
Copy
Compare
Share
Want to have your highlights saved across all your devices? Sign up or sign in
