ABALAWI 17

Amalako kamalasile kemisango

1OMWAMI Nyasaye nalachilisia Musa mbu, 2aboolele Haroni nabasianibe nende abandu boosi aba Isiraeli mbu, balinde amalako kaloondakhwo kano. 3“Omuisiraeli yesi yesi naba niyasinzila ing'ombe kata likondi kata imbusi mukambi, noho elwanyi weikambi, 4ne nalachireera habwinjililo weliheema lianje litakatifu khulwa okhuchihana shinga eshihaanwa khwisie ta, omundu oyo aba neshikha eshiamalasile akaraatsiye; okhuula omundu oyo arusibwe mubaisiraeli. 5Eshisina shielilako elo shili mbu, abandu ba Isiraeli okhuula bandeerere emisango chiabwe chiabaasinzila mushikuri habulafu. Bulano okhuula bachireerenje, khumwisaaliisi habwinjililo weliheema litakatifu nende okhuchisinza shinga emisango echiokhureera omulembe. 6Mana omwisaaliisi okhuula ahaanye amalasile tsimbeka tsiosi tsieshimalilo shiemisango eshili habwinjililo weliheema litakatifu, nende okhusamba amasinya akareera isakakha eyinjamisia isie OMWAMI Nyasaye. 7Kho balabakhwo abakhayi khwisie khulwa okhwirira emiruko chiabwe ebulafu mushibakala okhuba shinga emisango khubanyasaye bandi tawe. Abandu ba Isiraeli okhuula balinde lilako lino buli lwosi.

8“Omuisiraeli yesi, kata abe omurende oumenyanga mubo, oukholela omusango omusambe kata omusango kweshihanwa shiosi shiosi ebulafu mushibakalo, 9ne nalakureera habwinjililo weliheema lianje litakatifu ta, omundu oyo okhuula aloondwe okhurula muluyia olwa Abaisiraeli.

10 # Obucha. 9:4; Abal. 7:26,27; 19:26; Okhuk. 12:16,23; 15:23 “Omundu yesi omuisiraeli noho omurende oumenyanga mubo ouliakhwo amalasile, ndalamuhelesia eshinyasio khandi shialabasilibwa mubandu banje tawe. 11#Abaheb. 9:22Obulamu bweshilonje shiosi shiosi buli mumalasile, niko akachila isie OMWAMI Nyasaye ndalachilisia mbu, amalasile kaleerungwe khushimalilo shiemisango okhuyiniaho obwonooni bwabandu. Shichila amalasile niko akayininjiaho obwonooni. 12Niko akachila nelachilisia abandu ba Isiraeli mbu, omundu yesi khubo kata omurende oumenyanga mubo alaliakhwo inyama eyilarusibwemwo amalasile tawe.

13“Omundu yesi omuisiraeli kata abarende bamenya mubo, ouyiima isolo yosi yosi, kata linyonyi liokhulibwa, okhuula asinze nataatsia amalasile kalio elwanyi nakabuka neliloba. 14Obulamu bwa buli eshilonje buli mumalasile kashio, niko akachila nendachilisia abandu ba Isiraeli mbu balaliakhwo inyama eyilarusibwemwo amalasile tawe. Ne omundu yesi oulia amalasile ako, shialaba mulala khubandu banje tawe.

15“Ne Omuisiraeli yesi noho omurende oulia eshindu shiosi eshifwile butswa noho eshirirwe neyisolo, okhuula yosie ebifwalobie khandi yesinje omubilikwe mumaatsi, ne alaba owomusilo okhuula khungoloobe inyanga eyo. 16Nebutswa naba nalosia ebifwalobie ta, khandi nalesiinga omubilikwe ta, okhuula alanyoola eshinyasio.”

Currently Selected:

ABALAWI 17: OLUPR

Highlight

Copy

Compare