OKHURULA 22

Amalako khukemirungo

1“Omundu niyeba ing'ombe kata likondi mana yeere noho akusie, okhuula arunje tsing'ombe tsirano khulwa ing'ombe eya yebile eyo, khandi arunje amakondi kane khulwa likondi lia yebile elo. 2Omwifi nanyoolekha nafunakanga inzu mushilo, mana akhupwe afwe, oumwirire oyo shiali neshikha tawe. 3Nebutswa omwifi nanyoolekha niyebanga mushiteere mana yeerwe, oumwirire oyo ali neshikha. Omwifi oyo akhoyile okhurunga eshiayebile eshio. Ne naba nabula eshiokhurunga, kho omwene alakusibwa khulwa okhurunga eshia aba niyebile eshio.

4“Ne omuruko okuba nikwibilwe nikunyoolekha ewa omwifi oyo nikushili omulamu, omwifi oyo okhoyile okhurunga akhandi khabili khulwa okwa aba niyebile okwo, kata niyiba ing'ombe, isishili noho likondi.

5“Omundu naba niyayanga mana aleshe emirukochie chilie emitsabibu mumukunda kwabeene, noho aleshe emirukochie chilie ebiraache mumukunda kwabeene, okhuula arunje ebisasiibwe ebio nende ebindi ebilayi okhurula khubiomumukundakwe, okhurula khumitsabibuchie.

6“Omundu naba nahafia omulilo mumukundakwe mana kulandaale mwiswa nikutsia mumukunda kwowashie mana kusambe obule obushiraachilwe noho obushili okhucheswa noho omulilo kumulule omukunda kwosi, ouba narubuule omulilo okwo okhuula arunje ebisasiishe ebio.

7“Omundu naleshela owashie amapesa noho emiandu chindi mbu amubiishile, mana chiibwe okhurula munzumwe, omwifi oyo nanyoolekha akhoyile okhurunga akhandi khabili. 8Nebutswa omwifi naba nalanyoolekha ta, owali niyahebwa okhubikha ebindu ebio akhoyile okhureerwa imbeli weshimalilo shiemisango mana yetsube mbu, shiyayeba ebindu ebio tawe.

9“Ne obuyingani niburulila bwosi bwosi khumiandu kata khung'ombe, tsisishili, amakondi, tsingubo noho khushindu shindi shiosi shiosi eshiakora, abandu babili ababa nibayinganilanga khumwandu okwo, okhuula bareerwe imbeli weshimalilo shiemisango. Mana omundu wa Nyasaye alarumbula mbu, niye ouli neshikha, okhuula arunje owashie wayinganenje ninaye oyo akhandi khabili.

10“Omundu niyechekha owashie isishili, ing'ombe, likondi noho omuruko kundi kwosi kwosi, mana omuruko okwo kufwe, noho kusaalisibwe noho kwibwe omundu yesi yesi nalamanyile ta, 11owechekhwa oyo okhuula atsie imbeli weshimalilo shiemisango mana yetsube mbu, shiyayebakhwo omuruko kwomundu wamwechekha okwo tawe. Nikaba mbu omuruko okwo shikwayebwa nende owechekhwa oyo ta, omwenekwo akhoyile okhufuchilila mbu, omurukokwe kwakora, naye owechekhwa oyo shiakhoyile okhumurunga eshindu tawe. 12Nebutswa nikaba mbu owechekhwa niye oweba, okhuula arunje mwenekwo eshindu. 13Ne nikaba mbu, omuruko okwo kwerwa nende tsisolo nabulimo, owechekhwa oyo okhuula areerekhwo eshitonye shialibwa nishitoong'a, shibe eshimanyia mbu, tsisolo tsiali omuruko kwa yechekhwa okwo. Shiakhoyile okhurunga omuruko kwaliibwa nende tsisolo okwo tawe.

14“Khandi omundu niyehola omuruko khuwashie mana kusaalisibwe noho kufwe omwenekwo nabulaho, okhuula owehola oyo arunje. 15Nebutswa omuruko okwo nikuba nikufwa mwenekwo naliho, owehola oyo shiakhoyile okhurunga tawe. Ne omuruko okwo nikuba nikweholwa khulwa amapesa, owahosia oyo shiakhoyile okhureeba omurungo kundi khandi tawe.

Amalako kebiima nende akeidiini

16 # Okhuk. 22:28,29 “Ne omundu naba naselela omukhaana omushisila owa omundu yesi yesi ashili okhuchaaka okhurunga ikhwe khulwa okhumuteeshia, mana akone ninaye, okhuula omundu oyo ateeshie omukhaana oyo. 17Nebutswa samwana omukhaana oyo naba naloba mbu, oukonile nomukhaanawe oyo shiamuteeshia ta, kho omundu oyo okhuula arunje samwana omukhaana oyo amapesa akahela nende ikhwe yomukhaana omushisila.

18 # Okhuk. 18:10,11 “Okhuula mwire omukhasi yesi yesi oukhola obufumu.

19 # Abal. 18:23; 20:15,16; Okhuk. 27:21 “Okhuula mwire omundu yesi yesi oukona nomuruko.

20 # Okhuk. 17:2-7 “Omundu yesi yesi oukholela omunyasaye undi omusango ne nalaakholela isie OMWAMI Nyasaye ta, okhuura yerwe.

21 # Okhur. 23:9; Abal. 19:33,34; Okhuk. 24:17,18; 27:19 “Shimulakholelakhwo omundu omureenda ouli mwinywe likhuwa libi, kata okhumusandia ta, shichila mwesi mwali abareenda mushialo shia Misiri. 22Shimulakholelekhwo omukhasi omulekhwa amakhuwa amabi kata okhusandia omwana omubisandu tawe. 23Ne nimubasandia, isie OMWAMI Nyasaye ndalahulila amasaayo kabwe olwa baahabila. 24Nasi ndalasinyikha ne ndalalekha inywe mwirwe mwihe, ne abakhasi benywe balatong'a abalekhwa nabo abaana benywe balatong'a ababisandu.

25 # Abal. 25:35-38; Okhuk. 15:7-11; 23:19,20 “Nimuhosia amapesa khu mulala wokhubandu banje bano, ouli omumanani, shimulamubanza noho okhwenya mbu, akalusie inganga niyilikhwo tawe. 26#Okhuk. 24:10-13Owashio nakhuhelesia inguboye shinga omusingo khushindu shiaba niyeholile khwiwe mbu, nakhukalusilie, okhoyile okhumukalusilia bwangu bwangu eshialo nibushili okhwila, 27okhuba niyo ingubo eya ali ninayo yonyene khulwa okhwifimba omunyiri. Kho notong'a ninayo, naye aba niyefimbe shiina? Olwa ahabila isie niyenya obukhoonyi, ndalamuhabina shichila isie endi owetsimbabasi.

28 # Ebikh. 23:5 “Shiolafwola Nyasaye kata okhulaamila omwimilisi wabandubo eshilaamo shiobubi tawe.

29“Shiolashiinda okhundeerera ebihaanwa okhurula khubichesebio nende khu idivaiyo tawe.

“Ukholele isie omusango kwabasiani abekulanda bokhubaanabo. 30Khandi muhaanile isie ebikulanda biotsing'ombe tsienywe nende ebiokhumakondi kenywe. Olwa omuruko omwikulanda kwibulwa, muleshenje kuba nende nyina khulwa tsinyanga musaafu, ne khunyanga yomunane mulahaanila.

31 # Abal. 17:15 “Inywe muli abandu banje abatakatifu, khulweshio shimulaliekhwo inyama yeisolo eyirirwe neisolo nabulimo tawe. Musukunilenje tsimbwa inyama eyo.

Currently Selected:

OKHURULA 22: OLUPR

Highlight

Copy

Compare