Bar. 7

1Bawandaayase, ng'ali mulamanya nilio ndi siimbi khuboola, sikila enywe mweesi mumanyile ke lilaka. Lilaka liamianga khu baandu ne basiili balamu. 2Lolela khu mukhasi owabeela, abowa ne lilaka khu museecha wewe nga nilwo omuseecha wewe oyo nasiili omulamu, ne nafwiile, nono aba alekhuulilwe khukhwama mu Lilaka liliamuboa khu museecha wewe. 3Nono, aaba namenya no mundu okundi omuseecha wewe nasiili omulamu, aba alalaangwa omukhobani, ne kakhali omuseecha wewe nafwa, aba ali omukhasi omulekhuule khu lilaka, mala ne acha khu mundu okundi aba sakhola bukhobani tawe. 4Bawandaayase, kali busa kario khwinywe. Nga khulwe khuloondekhana ne lilaka nga lili, enywe mwesi mwafwa sikila muli sitonyi sie kumubili kwa Kristo, mala luno muli booyo owalamusibwa khukhwama mu lifwa nio khwole khuba be bukhala mu bukhalabani bwa Wele. 5Sikila nga nilwo khwamenyanga khuloondekhana khu liba liefwe lio mundu lilaka liakholeelesia, liliekoomba lie bubwoni mu mibili kiefwe, mala fweesi khwamaliilisila mu lifwa. 6Kakhaba kario, luno, khuli balekhuule khukhwama mu Lilaka, sikila khwafwa khwilio liliakhwikalilila efwe khwaba baboe. Se khurumikha lundi mu ngila ekhale eye lilaka liliaandikwa tawe, ne kakhali khurumikha mu ngila embia eya Roho.

Lilaka ne bubwoni

7 # Khur. 20.17; Likh. 5.21 Nono, khulome khuli, Lilaka lili lie bubwoni ku? Ng'ali se kali kario tawe! Ne kakhali liaba Lilaka nilio liliakhola ese namanya bubwoni buli siina. Kaaba bali Lilaka se liaboola lili, “Okhekoomba sio omundu okundi tawe,” andi se namanya liliekoomba nga elio tawe. 8Ne mu ngila eye lilaka elio bubwoni bwanyoola bubweyaangu khukholeelesia liliekoomba lie khukhweyenyela bibiindu chingano choosi mwise. Lilaka ne likhaliio tawe, bubwoni buli sisiindu sisiafwa. 9Ese samwene lulala, naba omulamu ne khali ne Lilaka tawe, ne nga Lilaka liecha, bubwoni bwalamukha, 10mala nafwa. Ne Lilaka lilienyekha lireere bulamu mwise, liareera lifwa. 11#Lir. 3.13 Bubwoni bwanyoola bubweyaangu bwabwo, ne mu ngila eye Lilaka bwambea mala bwanjira.

12Nono, Lilaka liliene lili litakatifu, liluungi, lundi lilayi. 13Ne lino aba liboola lili, Lilaka liaba lilayi mala liareera lifwa liase? Se kali kario tawe! Bubwoni nibwo bubwakhola kano, bwandeerera lifwa khulwe khurumikhira Lilaka lili lilayi, nio liba liabwo liang'ali nga bubwoni liole khubuulwa. Khwako, khulwe engila eye lilaka bubwoni bwekesibwa khuba bubwoni bumayaanu khukhila.

Liie mu mundu

14Khumanyile khuli Lilaka lili lie buroo, ne ese se ndi omundu we buroo tawe nakusibwa nga nasioobi khu bwoni. 15#Bakal. 5.17 Se manyilisianga nisio kholanga tawe, sikila se kholanga nisio nenya khukhola tawe, ne kakhali kholanga nisio nabiila. 16Sikila nisio kholanga sili nisio khenyanga khukhola tawe, lino liekesia lili fukiilila ndi Lilaka lili liluungi. 17Nono ng'ali se ndi ese okholanga sisiindu sino tawe, ne kakhali bubwoni bumenyanga mwise nibwo bukholanga. 18Manyile ndi bulayi se bumenyanga mu liba liase nga omundu busa tawe. Sikila akhaba liliekoomba lie khukhola bulayi ne lindimo, se nyala khulikhola tawe. 19Se kholanga lilayi nilio nenya khukhola tawe, ne kakhali, kholanga limayaanu nilio kheenya khukhola tawe. 20Naaba ne kholanga niko kheenya khukhola tawe, lino liekesia lili aba se ndi ese okholanga tawe, ne kakhali, bubwoni bubumenyilemo nibwo bukholanga. 21Nono aba lino liba lilaka, sikila ne nenya khukhola lili liluungi, libi liosi aba lili siimbi. 22Liba liase lie mukari lisangaalilanga Lilaka lia Wele. 23Ne kakhali mbona Lilaka lie lukano luluundi mu mubili kwase Lilaka likhupana ne lilaka nilio kamebaasio kase kafukiilila, likholanga mba omuboe khu lilaka lie bubwoni lili mu mubili kwase. 24Ese ndi omundu we bubeeleli lukali! Naanu olimbonia ese khukhwama mu mubili kulikho ne kumbila mu lifwa kuno? 25Orio ebe khu Wele, okholanga kano khubirira mu Mwami wefwe Yesu Kristo!

Nono, lino, lili liiba liase. Khwise samwene nyala naria Lilaka lia Wele mu mebaasio mwong'ene, ne liba liase nga omundu busa ndumikhirwa khu lilaka lie bubwoni.

Bulamu mu Roho

Currently Selected:

Bar. 7: LUBUKUSU

Highlight

Copy

Compare