Bar. 6

1Nono khuboole khuli siina? Khuchiililile khumenya mu bwoni nio kumwalaalo kwa Wele kutasikhe? 2Ng'ali se kali kario tawe! Efwe khwafwa khu bwoni khunyala nono khwachiililila khubumenyamo khuriena? 3Sikila ng'ali mumanyile muli nga ne khwabatiisibwa mu buambaani ne Yesu Kristo, khwabatiisibwa mu buambaani ne lifwa liewe. 4#Bakol. 2.12 Nono, khulwe libatiisibwa liefwe, khwasiikhwa ne naye mala khwasaanga mu lifwa liewe, nio bulayi bwene nga Kristo alamusibwa khukhwama mu lifwa khulwe bunyali bwe luyali lwa Paapa, nio akhaba efwe fwesi khwole khumenya bulamu buyia.

5Sikila khwekela mulala ne naye mu lifwa nga niye ne afwa, mu ngila eyo khuliba nga omundu mulala ne naye khulwe khulamusibwa khube ne bulamu nga niye ne alamusibwa. 6Ne khumanyile khuli liba liefwe likhaale lieriirwe ne Kristo khu musalaba kwewe, nio bunyali bwe kumubili kwe bubwoni bwonakwe, mala khukhabakho lundi barumwa be bubwoni tawe. 7Sikila nga omundu ne afwa aba akholiilwe omulekhuule khukhwama mu bunyali bwe bubwoni. 8Ne sikila khwafwiile ne Kristo khusuubila khuli akhaba fwesi khukhamenye naye. 9Sikila khumanyile khuli Kristo alamusibwe khukhwama mu lifwa ne salifwa lundi tawe, mala lifwa se lilimwamiakho lundi tawe. 10Nono, sikila afwa, bubwoni se buli ne bunyali khu niye tawe, mala luno amenyanga bulamu bwewe mu busaanganilo ne Wele. 11Mu ngila ng'eneyo, mukhoyela mweyibaasie mwabeene nga bafu, khuloondekhana ne bubwoni nga buli, mala mumenye mu busaanganilo ne Wele khubirira mu Yesu Kristo.

12Bubwoni bukheecha bwamiia lundi mu mibili kienywe nio murie liliekoomba lie liba lienywe lie khukhweyenyela tawe. 13Namwe khukhwola mukhaanakho sitonyi sienywe siosi siosi khu bwoni sirumikhirwe khulwe bifuno bie bumayaanu ne bubwoni tawe. Ne kakhali, khemwiaane mwabeene khu Wele, nga balamusibwe khukhwama mu lifwa khucha mu bulamu, mala mwiaane mwabene mu bwichufu khu niye khulwe khurumikhirwa khulwe bifuno biluungi. 14Khukhwola bubwoni bukhaba omwami wenywe tawe, sikila se mumenyile aasi we Lilaka tawe, ne kakhali mu menyile aasi we kumwalaalo kwa Wele.

Nasioobi be buluungi

15Nono, siina? Khukhole bubwoni sikila se khuli aasi we Lilaka tawe, ne kakhali khuli aasi we kumwalaalo kwa Wele? Se kali kario tawe! 16Ng'ali mu manyile muli ne mwiaana mwabeene nga nasioobi khuria omundu okundi, aba ng'ali muli busa nasioobi bo mwami niye muria oyo, bunyala bwaba bubwoni, bureera, lifwa, namwe buriaani bukhola mwaba baluungi ne Wele. 17Ne orio echa khu Wele! Sikila akhaba a siise silala ne mwaba nasioobi khu bwoni, mwaria ne kumwoyo kwenywe kwoosi bung'ali bunyoolekha mu mekisio niko mwanyoola. 18Mwakholwa balekhuule khukhwama khu bwoni mala mwekela nasioobi be buluungi. 19(Ndumikhira lulomo lwa buli ndaalo sikila butekhele bwe liba lienywe lie kumubili.) A siise silala mweana mwabene elala nga nasioobi khu bunyaalu ne bumayaanu khulwe bifuno bimayaanu. Mu ngila ng'eneyo khukhwola luno mweane mwabeene elala nga nasioobi be buluungi khulwe bifuno bitakatifu.

20Nga ne mwaba nasioobi be bubwoni chana, mwaba balekhuule khukhwama mu buluungi. 21Mwanyoola bukhala siina khukhwama mu khukhola bibiindu nibio luno munyolelakho chisoni? Ekhumaliilikha we bibiindu ebio lili lifwa! 22Ne luno mwakholiilwe balekhuule khukhwama khu bwoni mala muli nasioobi ba Wele. Bukhala bwenywe buli limenya lie khukhwirusira elala khu niye ne ekhumaliilikha wayo buli bulamu bwa mindali. 23Sikila kumuruungo kwe bubwoni kuli lifwa, ne siianwa sia busa sia Wele sili bulamu bwa mindali mu buambaani ne Yesu Kristo Omwami wefwe.

Silolelo khukhwama mu lireerana

Currently Selected:

Bar. 6: LUBUKUSU

Highlight

Copy

Compare