Kwan Weche Motelo
Weche Motelo
Kitabu mar Kwan dhi nyime gi sigand jo-Israel bangʼ kane gisewuok Misri, kendo owuoyo kuom gigo mane otimore ne jo-Israel e higni piero angʼwen kane gin e thim ka giwuotho gia e Got Sinai ka gidhi Kanaan. Kitabuni iluongo ni Kwan nikech ochakore gi kaka Musa nokwano dhout Israel duto apar gariyo.
Kitabu mar Kwan inyalo pogo nyadidek. Mokwongo, sula 1:1–10:10, Jehova Nyasaye onyiso Musa mondo okwan jo-Israel bangʼe omiyo Musa chike mag gurone jo-Israel hema kod pogo jo-Lawi tijegi. Migawo mokwongoni ogik ka ngʼato ka ngʼato mor e nyasi mar Pasaka kendo ka gitimo misengini ne Jehova Nyasaye.
Mar ariyo, sula 10:11–21:20, otingʼo gik mane otimore kane jo-Israel wuotho kochiko Moab, ma en piny mantiere yo wuok chiengʼ mar Aora Jordan. Ma ne en wuoth matek ahinya mar ngʼado thim, kendo kinde ka kinde jo-Israel ne ngʼur momiyo ne gingʼanyone Musa kendo ne Nyasaye. Jo-Israel notamore donjo Kanaan kane gisewinjo sigand joma nodak kuno, omiyo Jehova Nyasaye nokumo jo-Israel koketogi e thim kuom higni piero angʼwen. Migawo mar ariyoni orumo ka jo-Israel obuoro Moab mantiere machiegni gi Got mar Pisga.
Mar adek, sula 21:2–36:13, ochakore gi jo-Israel ka monjo piny mantiere yo wuok chiengʼ mar Aora Jordan, chakre e kiep Moab mantiere yo milambo nyaka yo nyandwat mar Nam Galili. Eka ruodh Moab nochulo Balaam janabi mondo okwongʼ jo-Israel. To Jehova Nyasaye nonyiso Balaam mondo ogwedh jo-Israel, kendo Balaam notimo kamano.
Jo-Israel noikore mondo gikal Aora Jordan kendo gimonj piny Kanaan, kata obedo ni joma moko kuomgi noneno ni nyaka gidag yo wuok chiengʼ mar Aora Jordan. Ne ochak okwan jo-Israel, eka Jehova Nyasaye noyiero Joshua mondo obed jatend jo-Israel bangʼ Musa, kendo noyiero jotelo mamoko mondo okony Joshua pogo lowo ni dhout Israel. Kitabuni orumo ka Jehova Nyasaye miyo jo-Israel chike mamoko.
Kitabu mar Kwan wuoyo kuom jo-Israel mane ongʼanyo ne Nyasaye, mane chunygi ool kendo joma ne otamore keto genogi kuom Jehova Nyasaye ni biro ritogi. To kitabuni bende nyisowa kaka Jehova Nyasaye noreso jo-Israel e lweny mi omiyogi chiemo kod pi e thim maonge gimoro. Jehova Nyasaye ne dwaro mondo jo-Israel ongʼe ni ne ok odwar mondo tiekgi, to nodwaro gwedhogi, mana kaka Harun nolamo niya:
Jehova Nyasaye mondo ogwedhu
kendo oritu;
Wangʼ Jehova Nyasaye mondo orieny kuomu
kendo omiu ngʼwono mogundho;
Jehova Nyasaye orangu maber
kendo omiu kwe.
(6:24-26)
Jandiko
Musa
Kar Ndiko
Machiegni gi Got Sinai
Kinde Mag Ndiko
Higa mar 1450–1410 kapok onywol Kristo
Weche Manie Kitabuni
Weche kuom Hemb Romo kod wuodh jo-Israel (1:1–10:10)
Wuok Sinai nyaka piny ongoro mar Moab (10:11–21:35)
Balaam gi Balak kod jo-Israel (22:1–25:18)
Wach kuom loyo lweny kendo kawo piny Kanaan (26:1–36:13).
Currently Selected:
Kwan Weche Motelo: MLM
Highlight
Copy
Compare
Share
Want to have your highlights saved across all your devices? Sign up or sign in
Muma Maler Mar Nyasaye, Motingʼo Loko Manyien™
Weg Loko © 1980, 2002, 2003, 2020 otim gi Biblica, Inc.
MItiyo kode gi thuolo moa kuom Biblica, Inc. Biblica, Inc. nigi ratiro duto e piny mangima.
Holy Bible, New Luo Translation™
Copyright © 1980, 2002, 2003, 2020 by Biblica, Inc.
Used with permission. All rights reserved worldwide.