Ezekiel Weche Motelo
Weche Motelo
Ezekiel ne en jadolo kendo janabi. Nogole e od twech Babulon kama notere kaka misumba, kama nodakie gi joma moko mane oter e twech kaka wasumbini koa Juda. Ruoth Nyasaye noyiero Ezekiel kaka janabi mare mondo oyal wach maber, ok ni joma noter e twech kende, to oyal bende ni joma ne pod odak Jerusalem. Injili mar Ezekiel nochakore e higa mar 593 kapok onywol Kristo, magin higni mogik mag pinyruodh Juda, kendo notieko e higa mar 570 kapok onywol Kristo, ma mano ne en bangʼ higni mangʼeny ka Jerusalem nosekethi e higa mar 586 kapok onywol Kristo. Ezekiel nosebedo ka yalo Injili, to bangʼ ka masira malichni nosetimore, jomoko notamore Injili mane oyalo, to jomoko to nojiwe.
Kitabu mar Ezekiel inyalo pog nyadibich. Mokwongo, sula 1–3, wuoyo kuom fweny mar duongʼ Ruoth Nyasaye mane Ezekiel oneno kendo onyisowa kaka Ruoth Nyasaye noyiero Ezekiel mondo obed janabi mare. Mar ariyo, sula 4–24, otingʼo weche mangʼeny mag chiwo siem ni jo-Juda ni machiegnini ibiro kumgi nimar gisejwangʼo Ruoth Nyasaye. Ezekiel notero ote duto mag siem mane omiye. Mar adek, sula 25–32, wuoyo kuom ngʼado bura ma Ruoth Nyasaye ne biro timo ni ogendini modak machiegni gi Jerusalem.
Mar angʼwen, sula 33–39, otingʼo weche Ezekiel bangʼ kane osewinjo ni Jerusalem osemonji. Mago ne gin weche mag bedo gi geno kuom ndalo mabiro. Ruoth Nyasaye nosingore ni obiro wene joge richogi kendo oduoggi Juda kod Jerusalem. Mogik, migawo mar abich mar kitabuni, sula 40–48, otingʼo fweny mane Ezekiel oneno mar hekalu manyien Jerusalem, chike moketi mar bedo gi lamo makare, kendo lop jo-Israel mane oduognigi ibiro pogi ni dhout Israel.
Kane Ruoth Nyasaye nowuoyo gi Ezekiel, noluonge ni “wuod dhano.” Kata obedo ni luongo Ezekiel kamano, nyiso ni en mana dhano, mano nyiso bende ni noseyiere mondo oyal Injili mar Ruoth Nyasaye ni jo-Juda kod jo-Jerusalem.
Achiel kuom thoro mongirore e kitabuni en fweny mane Ezekiel oneno mar holo mopongʼ gi choke jomotho. Ezekiel neno kaka Roho mar Ruoth Nyasaye miyo choke mag joma othogo bedo mangima kendo. Kuom mano, Ruoth Nyasaye wachone Ezekiel niya:
Eka nowachona niya, “Wuod dhano, jo-Israel chalo gi chokegi. Giwacho ni, ‘Chokewa otwo kendo genowa orumo; osengʼad karwa oko.’ Emomiyo kor wach kendo iwachnegi ni: Ma e gima Jehova Nyasaye Manyalo Gik Moko Duto wacho: Yaye un joga, abiro elo lieteu mi agolu oko kendo aduogu e piny Israel. Eka un, ma un joga, unungʼe ni An e Jehova Nyasaye, ka anael lieteu mi agolu oko kuomgi. Abiro keto Roho mara kuomu mi udok mangima, kendo abiro miyo udag e pinyu uwegi. Eka unungʼe ni an Jehova Nyasaye ema asewuoyo kendo asetimo kamano. Jehova Nyasaye ema owacho.”
(37:11-14)
Jandiko
Ezekiel
Kar Ndiko
Babel
Kinde Mag Ndiko
Higa mar 593–571 kapok onywol Kristo
Weche Manie Kitabuni
Luong mar Ezekiel (1:1–3:27)
Richo mar Jerusalem kod kum mabiro (4:1–24:27)
Wach mokor kuom ogendini mag pinje mamoko (25:1–32:32)
Bedo gi geno kuom ber mabiro bangʼe (33:1–39:29)
Jo-Israel ibiro duogo e pinygi (40:1–48:35)
Currently Selected:
Ezekiel Weche Motelo: MLM
Highlight
Copy
Compare
Share
Want to have your highlights saved across all your devices? Sign up or sign in
Muma Maler Mar Nyasaye, Motingʼo Loko Manyien™
Weg Loko © 1980, 2002, 2003, 2020 otim gi Biblica, Inc.
MItiyo kode gi thuolo moa kuom Biblica, Inc. Biblica, Inc. nigi ratiro duto e piny mangima.
Holy Bible, New Luo Translation™
Copyright © 1980, 2002, 2003, 2020 by Biblica, Inc.
Used with permission. All rights reserved worldwide.