Amos 3
3
Oluong joneno mondo ongʼad bura ni jo-Israel
1 Un oganda jo-Israel duto mane agolo e piny Misri, winjuru wach ma an Jehova Nyasaye awachonu:
2 “Un kende ema aseyiero
kuom ogendini duto manie piny;
mano emomiyo abiro kumou
kuom richou duto musetimo.”
3Uparo ni ji ariyo nyalo wuotho kaachiel
kapok giwinjore?
4 Bende sibuor nyalo ruto e thim
ka oonge gi gima ochamo?
Bende nyathi sibuor nyalo ngʼur e gono mare
kapok oyudo gima ochamo?
5Koso winyo nyalo moko e obadho nade
ka ok ochike gi kudni?
Koso obadho dimeki nade
kaonge gima otuge?
6 Bende tungʼ mar lweny nyalo ywak e dala
ma ok omiyo ji otetni?
Koso ere gima nyalo timore e dala
ma ok Jehova Nyasaye ema oyie mondo otimre?
7 Adier, onge gima Jehova Nyasaye Manyalo Gik Moko Duto nyalo timo e dala
ma ok ofwenyo, ne jotichne ma jonabi.
8 Ka sibuor oruto,
to ere ngʼama ok dibed maluor?
Kata ere janabi madilingʼ alingʼa
ma ok ohulo gima Jehova Nyasaye Manyalo Gik Moko Duto onyise?
9 Gouru milome e kuonde mochiel motegno mag Ashdod
kaachiel gi Misri:
“Chokreuru kanyakla e gode molworo Samaria,
mondo uneye timbe mamono matimore e dalano,
kendo kaka isando ji kuno.”
10 Jehova Nyasaye wacho niya, “Jogo ok ongʼeyo timo tim makare
kendo utegi madongogi opongʼ mana gi gik moyaki.”
11 Kuom mano, ma e gima Jehova Nyasaye Manyalo Gik Moko Duto wacho:
“Wasigu biro monjou
maketh kuondeu mochiel motegno,
kendo giyak mwandu magu.”
12 Jehova Nyasaye wacho niya,
“Mana kaka jakwath reso lemo ariyo kata it rombo modongʼ ma sibuor pok ochamo,
e kaka Nyasaye nores,
jo-Israel manok modak Samaria
ka gin e dho kitandagi,
kaachiel gi man Damaski ka gibet e kombegi.”
13Ruoth Nyasaye, ma en Jehova Nyasaye Maratego wacho niya, “Koro chikuru itu mondo usiem nyikwa Jakobo.
14 “Chiengʼ ma abiro kumoe nyithi Israel kuom richogi,
bende e ndalo ma abiro kethoe kende mag misango miwangʼoe liswa man Bethel,
kendo anangʼad tunge kendego mag misango
mi ginipodh piny.
15 Anamuk udi mudakie e ndalo mag chwiri
kaachiel gi mago mudakie ndalo mag oro;
udi ma ukedo igi gi lak liech biro dongʼ gundni
kendo uteu madongo duto abiro ketho,”
Jehova Nyasaye owacho.
Currently Selected:
Amos 3: MLM
Highlight
Copy
Compare
Share
Want to have your highlights saved across all your devices? Sign up or sign in
Muma Maler Mar Nyasaye, Motingʼo Loko Manyien™
Weg Loko © 1980, 2002, 2003, 2020 otim gi Biblica, Inc.
MItiyo kode gi thuolo moa kuom Biblica, Inc. Biblica, Inc. nigi ratiro duto e piny mangima.
Holy Bible, New Luo Translation™
Copyright © 1980, 2002, 2003, 2020 by Biblica, Inc.
Used with permission. All rights reserved worldwide.
