Mateo 28

Wanushqanpita Jesús kawarimushqan

Marcos 16.1-8; Lucas 24.1-12; Juan 20.1-10

1Jamay junaq pasarkuptinnami domingu tuta tsaka tsakala María Magdalenawan juknin María aywapäkurqan Jesús pamparashqan sepultüra rikaq. 2Aywarkaykaptinmi Tayta Dios kachamushqan ángel jana patsapita urämuptin patsa fiyupa siksikyarqan. Jesús pamparaykashqan sepultüraman chayaykurmi tsaparaq rumita witirkatsir jananman jamakuykurqan. 3Tsay ángel elquynöraqmi atsikyarqan. Röpanpis rajunöraqmi yoraq karqan. 4Angilta rikaykurmi soldädukuna fiyupa mantsakushpan siksikyar wanushqano rikakurqan.

5Warmikuna chayaykuptinnami ángel kayno nirqan: <<Ama mantsakäriytsu. Musyämi crucificashqan Jesúspa ayanta rikaq shapäkamushqaykita. 6Manami kaychönatsu. Kawarimunanpaq kashqanta nishqannölami kawarimushqa. Shamuy rikay mayman tsutashqantapis. 7Kananqa apurädu aywar discïpulunkunata wilapäkuy Jesús kawarimushqanta. Tsaynöpis wilapäkuy Galileaman nawpaykashqanta y tsaycho paywan tinkunanpaq kashqanta. Tsaytami qamkunata wilaykä>>.

8Ángel tsayno niptinmi warmikunaqa mantsakashqa kaykashqancho fiyupa kushikushpan Jesúspa discïpulunkunata wilaq warakayla aywapäkurqan. [Tsayno aywarkaykaptinmi] 9Jesús yuriparkur winchikurqan. Tsaymi warmikunaqa Jesúspa chakinta makalakurkur adorapäkurqan. 10Jesúsnami kayno nirqan: <<Ama mantsakamaytsu. Aywar wawqïkunata#28.10 Wawqïkunata wilapäkuy nirqa discïpulunkunata wilananpaqmi Jesús nirqan. wilapäkuy Galileaman aywananpaq. Tsaychönami paykunawan tinkushaq>>.

Soldädukuna lulakärinanpaq pägapäkushqan

11Warmikuna kutikuptinmi sepultürata täpaq wakin soldädukunapis Jerusalénman aywar mandaq cürakunata wilapäkurqan ima pasashqantapis. 12Wilaykuptinmi mandaq cürakuna Israel mayor runakunawan juntakaykur wilanakurqan imata rurananpaqpis. Nirkurnami soldädukunata atska qellayta pägar 13kayno nipäkurqan: <<Runakunata nipäkunki Jesúspa discïpulunkuna tsakaypa aywar ayanta apakärishqanta. Tsaynöpis nipäkunki punukashqa kar imatapis mana mayashqaykita. 14Pilato mayaptinqa noqakunami paywan parlashaq mana castigashunaykipaq>>.

15Tsaymi päguta chaskirkur soldädukuna aywashpan mandaq cürakuna nishqannöla runakunata wilapäkurqan. Tsayno wilapäkushqantami Israel runakuna kananyaqpis criyipäkun.

Wilakärinanpaq discïpulunkunata Jesús kachashqan

Marcos 16.14-18; Lucas 24.36-49; Juan 20.19-23; Hechos 1.6-8

16Jesúspa chunka juk discïpulunkunanami Galileaman chayaykur aywapäkurqan#Mat. 26.32; Mar. 14.28. mayninchöpis tinkunanpaq Jesús nishqan jirkaman. 17Tsaychömi Jesúswan tinkur adorapäkurqan. Wakinqa rikaykarpis manami criyirqanraqtsu Jesús kashqanta.

18Discïpulunkunaman witiykurmi Jesús kayno nirqan: <<Kay patsachöpis y jana patsachöpis lapanpaq munayniyuq kanäpaqmi Tayta Dios churamashqa. 19Tsaymi maytsay markakunapapis aywar runakunata yachatsipäkunki discïpulükuna kananpaq.#Hech. 1.8. Paykunata bautizapäkunki Tayta Diospa jutincho, Tsurinpa jutincho y Espíritu Santupa jutincho. 20Tsaynöpis yachatsipäkunki lapan nishqäkunata cäsukärinanpaq. Noqaqa qamkunawanmi imaypis kaykäshaq kay patsa ushakänanyaq>>.

[Amén.]

Currently Selected:

Mateo 28: qvmB

Highlight

Copy

Compare