Josué 3

Jordán mayuta tsimpashqan

1Tsaypita jukaqnin tuta tsaka tsakala Josué y lapan Israel runakuna Sitimpita aywarmi Jordán mayu kuchunman chayapäkurqan. Mayuta manaraq tsimpar jinalanchömi patsakärirqan. 2Tsaypita kimsa junaq pasarkuptinnami Israel autoridäkuna intëru campamentupa purir 3kayno nipäkurqan: <<Tayta Diosnintsipa Pactu Babulninta Leví trïbu cürakuna apaykaqta rikar noqantsipis qepalanta aywapäkushun.#Núm. 10.33. 4Mayu tsimpa nänitaqa manami reqintsitsu. Tsaymi mana pantakänantsipaq paykunapa karu qepalanta aywashun. Itsanqa apaykashqan babulmanqa ama aläpa witipäshuntsu. Tsaypa trukanqa waranqa (1,000) metrutano qepanta aywashun>>.

5Nirkurnami runakunata Josué kayno nirqan: <<Wara junaqmi rikaykaptintsi Tayta Dios milagruta ruranqa. Tsayno kananpaq kaykaptinqa purificakäriy>>.

6Tsaypita jukaqnin junaq cürakunata Josué kayno nirqan: <<Tayta Diospa Pactu Babulninta runakunapa puntanta apapäkuy>>.

Tsaymi Josué nishqanno babulta apapäkurqan runakunapa puntanta.

7Tsaypitami Josuéta Tayta Dios kayno nirqan: <<Kanan junaqpitami Israel runakuna musyapäkunqa Moisésta yanapashqänöla qamtapis yanapaykashqäta. Tsayno yanapaykashqäta tantiyarmi cäsukushunkipaq. 8Qamnami Pactu Babulta apaykaq cürakunata ninki Jordán mayuman yaykuykur ichinanpaq>>.

9Tsayno niptinmi Israel runakunata Josué kayno nirqan: <<Shapäkamuy Tayta Diosnintsi imata nimashqantapis wilanäpaq>>.

10Juntakaptinmi kayno nirqan: <<Kanan junaqmi qamkuna tantiyankipaq imayyaqpis kawaq Tayta Dios noqantsiwan kaykashqanta. Paymi yanapamäshun tsimpacho taq runakunata ushakätsinantsipaq. Tsay runakuna kaykan cananeo runakuna, heteo runakuna, heveo runakuna, ferezeo runakuna, gergeseo runakuna, amorreo runakuna y jebuseo runakunami. 11Tsaynöpis kay patsata munaynincho tsararaq Tayta Diospa Pactu Babulnintami puntantsita Jordán mayuta pasatsinqa. 12Kanan akrapäkuy chunka ishkay runakunata cada trïbupita jukta.#Jos. 4.2-3. 13Kay patsata munaynincho tsararaq Tayta Diospa Pactu Babulninta apaq cürakuna yakuman yaykuriptinmi mayu tsapakanqa tsakilapana pasanantsipaq>>.

14Tsaymi Jordán mayuta tsimpananpaq Israel runakuna toldunkunata shuntarkuptin cürakuna Pactu Babulta umrushqa puntata aywapäkurqan. 15Cosëcha tiempu kaptinmi Jordán mayu pasaypa cargashqa aywaykarqan. Tsayno kaptinpis Pactu Babulta apaq cürakuna Jordán mayuman yaykuyta qalaykuptinmi 16Saretán particho kaykaq Adam markapita janaman yaku tsapakäkurqan. Tsaymi tsay markapita uramanpana hasta Arabá Lamaryaq tsakina karqan. Arabá Lamarqa Kachi Lamarmi kaykan. Jordán mayu tsayno tsakiptinnami Israel runakuna Jericó marka lädupa tsimpapäkurqan. 17Israel runakuna pasananyaqmi Tayta Diospa Pactu Babulninta umrushqa cürakuna tsakishqa mayu chawpincho ichirparqan. Tsaymi Israel runakuna lapanpis tsakilapana pasapäkurqan.

Currently Selected:

Josué 3: qvmB

Highlight

Copy

Compare