Josué 2

Rikapakamunanpaq Jericóman Josué kachashqan

1Sitimpitami#2.1 Sitimqa Jericó tsimpan Moab pampachömi karqan. Tsaychömi Israel runakuna campamentunta rurapäkurqan. Tsaypita musyanaykipaq liyinki Núm. 33.48-49. ishkay runata rikapakamunanpaq Jordán mayu wak tsimpaman Josué kacharqan kayno nir: <<Jericó marka y tsay kinray wakin markakuna imano kashqantapis rikapakamunaykipaq aywapäkuy>>.

Tsayno niptin aywarmi Rahab#Heb. 11.31; Stg. 2.25. warmipa wayinman chayaykur patsakärirqan. Rahabqa wayrapakuq warmimi karqan.

2Rikapakuqkuna Rahabpa wayinman chayashqanta rikaykurmi juk runa wilarqan Jericó markapa mandaqnin reyta kayno nir: <<Kanan tardimi Israel runakuna kay markaman chayamushqa imano atacamänantsipaqpis rikapakuq>>.

3Tsayno wilaptinmi Rahab kaqman runakunata kacharqan kayno ninanpaq: <<Wayikiman patsakamuq runakunata qarqamuy. Paykunaqa markantsi imano kashqantapis rikapakuqmi shamushqa>>.

4Rey kachashqan runakuna chayananpaqqa maynami rikapakuq runakunata Rahab pakaykurqanna. Tsaymi paykunata kayno nirqan: <<Rasunpami runakuna näqa chayamushqa. Itsanqa maypita kashqantapis manami musyashqätsu. 5Patsa tsakaykaptinna marka yaykuna sawan punkuta wichqananpaqna kaykaptinmi aywakärishqa. Manami musyätsu maypa aywakärishqantapis. Jukla qatiparqa taripankipaqmi>>.

6Tsayno nishpanpis Rahabqa altusnincho qoturaykaq linäza päja rurinmanmi tsay ishkay runakunata pakaykurqan.

7Rahab nishqanta criyirmi rey kachashqan runakunaqa taripayta yarpar Jordán mayu väduyaq aywapäkurqan. Yarqushqalantanami Jericó markaman yaykuna sawan punkuta wichqapäkurqan.

8Nirkurnami ishkay rikapakuq runakuna manaraq punukaptin pakaraykashqan kaqman witsarkur Rahab kayno nirqan: 9<<Qamkuna shamushqaykita musyarmi kaycho taq runakuna pasaypa mantsakur tulunkunapis siksikyanraq. Tsaymi tantiyakü kay markata y wakin markakunatapis Tayta Dios qoykushunaykipaq kashqanta. 10Musyapäkümi Egiptupita qamkuna yarqamuptiki Puka Lamarta pasamunaykipaq Tayta Dios tsakitsishqanta.#Éxo. 14.21. Tsaynöpis musyapäkümi Jordán mayu tsimpan amorreo runakunapa mandaqnin reykuna Sehónta y Ogta soldädunkunatawan wanutsipäkushqaykita.#Núm. 21.21-35. 11Tayta Diosnintsiqa jana patsachöpis kay patsachöpis lapanpaq munayniyuqmi kaykan. Pay yanapashushqaykita musyarmi mantsakushushpayki pipis qamkunawan pelyayta manami almitintsu.

12<<Tsaymi ruwakü: Tayta Diospa jutincho promitipäkamay qamkunata ali rikashqänöla lapan aylükunata ali rikamänaykipaq. Kuyapämänaykipaq kashqanta awnimarqa ima señal-latapis kachapaykalämay. 13Taytäta, mamäta, turïkunata, nanäkunata y paykunawan kaykaqkunataqa ama wanuykatsilankitsu>>.

14Tsayno ruwakuptinmi kayno nipäkurqan: <<Kay parlashqantsita pitapis mana wilapaptikiqa noqakunapis qamkunata tsapäshaykipaqmi. Tayta Dios kay markakunata makïman churamuptinqa imaypis alimi rikashaykipaq>>.

15Tsayno wilanakurkurmi Rahabqa ishkay rikapakuq aywaqkunata waskawan warkuypa ventänanpa urätsirqan. Tsayno urätsirqan marka murälla janancho wayin kaptinmi. 16Manaraq urätsirmi paykunata kayno nirqan: <<Ashiykäshuqniki runakuna mana tarishunaykipaq jalqakunaman aywaykur paykuna kutimunanyaq kimsa junaq pakapäkuy. Tsaypita itsanqa aywakärinkipaq>>.

17Tsayno niptinmi kayno nipäkurqan: <<Noqakunaqa lapan promitishqätami cumplishaq. 18Jericó markaman Israel runakuna yaykamunan junaq urätsimashqayki ventänaman warkunki kay puka waskata. Tsay junaq wayikiman juntakanki taytaykiwan, mamaykiwan, turikikunawan y lapan ayluykikunawan. 19Wayikicho kaqkunataqa manami mayqantapis wanutsinqatsu. Wayikipita yarquq kaqmi itsanqa kikin jutsayuq kanqa wanunanpaq. Kay wayikicho kaykaqta pitapis wanutsiptinqa noqakunami jutsayuq kashaqpaq. 20Kanan parlashqantsita pitapis wilapaptikimi itsanqa kay promitishqäta mana cumplishaqtsu>>.

21Tsaymi Rahabqa kayno nirqan: <<Nishqaykinöchari rurashaq, taytakuna>>.

Tsayno wilanakurkurmi paykunaqa aywakärirqan. Aywakäriptinnami tsay puka waskata ventänaman jukla warkurqan.

22Nirkurnami tsay ishkay rikapakuq aywaqkuna jalqakunaman aywaykur pakararqan kimsa junaqyaq. Pakakuykuptinmi ashiq runakuna maytsaypa ashirpis mana tariykur Jericóman kutikärirqan. 23Tsaynami rikapakuq aywaqkuna jalqakunapita urämur Jordán mayuta pasarqan. Josué kaqman kutiykärirnami ima pasashqantapis 24kayno nir wilaparqan: <<Tayta Diosmi tsay markakunata makintsiman churamushqa. Tsayman yaykunantsipaq kashqanta musyarmi maytsaycho taq runakunapis pasaypa mantsakushpan siksikyarkaykan>>.

Currently Selected:

Josué 2: qvmB

Highlight

Copy

Compare