Gálatas 5

Lutan yachatsikuqkunata mana chaskipänanpaq nishqan

1Jesucristo salvamaptintsimi Moisés qelqashqan leykunapa munaynincho kashqantsipita librina kaykantsi.#Juan 8.32-36. Tsayno kaykaptinqa tsay leykunata cumplinaykipaq obligashuptiki ama cäsupäkuytsu. 2Noqa kaynömi nï: Señalakuptikiraq Tayta Dios salvashushqaykita yarpaptikiqa Jesucristuman yärakushqaykipis manakaqlapaqmi kaykan. 3Yapaypis kaynömi nï: Pipis señalakuq kaqqa Moisés qelqashqan leykunata lapantaraqmi cumplinman. 4Tsay leykunata cäsukur pipis salvakuyta munarqa Jesucristupita y Tayta Diospa kuyakuyninpitapis witikärishqami.

5Noqantsimi itsanqa Espíritu Santu tantiyatsimaptintsi musyantsi Jesucristuman yärakur salvakunantsipaq kashqanta. 6Jesucristuta chaskikushqa kaptintsiqa manami señalakushqa kashqantsitsu ni mana señalakushqa kashqantsitsu välin, sinöqa payman yärakur kuyanakur kawashqantsimi.

7Jesucristuman yärakushpaykiqa alimi karqayki. ¿Pitaq shimita jatipäshushqanki rasunpa kaq wilakuyta mana cäsukunaykipaq? 8Paykuna yachatsishqanqa manami qayamaqnintsi Tayta Diospitatsu kaykan. 9Tsay lutan yachatsikuyqa levadüra mäsata jakatsishqannömi kaykan.#1Cor. 5.6. 10Tayta Diostami manakuykä lutan yachatsikuqkunata manana chaskipänaykipaq. Tsay runakunataqa pï kaptinpis Tayta Diosmi juzganqa.

11Wawqi panikuna, señalakärinanpaq yachatsiptïqa manami pipis qatikachaykämanmantsu ni Jesucristo noqantsi rayku cruzcho wanushqanta wilakushqäpita chikimanmantsu. 12<<Señalakurraqmi salvakärinki>> nir yachatsishuqnikikunaqa penqayninta sapipita chipyaq kutsuriykutsun.

Espíritu Santupa makincho kawanantsipaq yachatsishqan

13Wawqi panikuna, Tayta Dios qayashushqanki librina kapäkunaykipaqmi. Librina karpis jutsata ama rurapäkuytsu, sinöqa jukniki juknikipis kuyanakur yanapanakäriy.#Mat. 20.26. 14Diospa leynincho kaynömi niykan: <<Kikiki kuyakushqaykino runa mayikita kuyapäkunki>>.

Tsay nishqanta cäsukurqa lapan leyninkunatami cumplirkaykanki.#Lev. 19.18; Mat. 22.39; Mar. 12.31; Rom. 13.8-10; Stg. 2.8. 15Tsayno kaykaptinqa cuidädu chikinakärinkiman. Chikinakurqa jaqayätsinakur qarqunakunkipaqmi.

16Tsaymi kayno nï: Espíritu Santu tantiyatsishushqaykino kawapäkuy. Tsayno kawarqa manami shonquyki munashqanno jutsata rurapäkunkipaqtsu.#5.16 Wakin castellänu traduccionkunachöqa kaynömi traduciraykan: Espíritu Santu tantiyatsishushqaykino kawapäkuy. Shonquyki lutanta yarpashqanta ama rurapäkuytsu. 17Lutan yarpaykunaqa Espíritu Santupa contranmi kaykan y Espíritu Santunami lutan ruraykunapa contran. Tsaymi ishkan apänakuptin alita rurayta munarpis mana kamäpakärinkitsu.#Rom. 7.15-23. 18Espíritu Santu tantiyatsishushqaykita cäsukurqa manami leykunapa munayninchönatsu karkaykanki.#Rom. 7.5, 8.

19Lutan yarpashqankunata ruraqkunaqa [majanta jarukärin,] fornicación jutsata rurapäkun, melanaypaq kaqkunata rurapäkun, shanaripakur jutsata rurapäkun, 20ïdulukunata adorapäkun, runa mayinta brüjutsipäkun, runa mayinta chikipäkun, rimanakärin, cëlanakärin, imalapitapis rabyakärin, nanaparänakun, qarqunakärin, jaqayätsinakun, 21envidiösu kapäkun, [runa mayinta wanutsipäkun,] upyalaman churakan, shinkakurkur lutankunata rurapäkun y tsaynölami ima jutsatapis rurapäkun. Nawpata nishqänölami kananpis kayno nï: Tsayno kawaqkunaqa Tayta Dios mandaykashqanman manami chayanqatsu.

22Espíritu Santupa munaynincho kawarmi itsanqa kuyanakuntsi, kushikuntsi, jawka kawantsi, pacienciakuntsi, ali shonqu kantsi, yanapakuq kantsi, awnishqantsita cumplintsi, 23humildi kantsi y alilata ruranantsipaq tantiyakuntsi. Tsayno kawarqa manami ima leytapis manakaqman churaykantsitsu.

24Jesucristupana karmi unay kawaynintsita cruzcho wanutsishqantsina.#Mar. 8.34; Rom. 6.3-14; Gál. 2.20; 6.14. Tsaymi jutsa ruraykuna yarpaynintsiman shamuptinpis mana chaskipantsinatsu. 25Espíritu Santupa munaynincho kaykarqa pay tantiyatsimashqantsino kawashun. 26Tsayno kawarqa pitapis rabyanätsir ama runa tukushuntsu ni envidiösu kashuntsu.

Currently Selected:

Gálatas 5: qvmB

Highlight

Copy

Compare