Ezequiel 38

Israel nacionta atacananpaq wilakushqan

1 Tayta Diosmi kayno nimarqan: 2<<Runapa tsurin, Magog particho taykaq Gog lädupa rikäriy. Gogmi Mesec nacionpa y Tubal nacionpa mandaqnin rey kaykan.#Apoc. 20.8. Payta ima pasananpaq kaqtapis wilar 3kayno ninki: <Tayta Diosmi kayno nin: Mesecpa y Tubalpa mandaqnin rey Gog, qampa contraykimi kaykä.

4<< <Shimipita shequrkurmi tsaytsika soldäduntinta y cawallunkuna muntaraqnintinta jorqamushayki. Escüduykita y espädaykita kamarikushqa kaykaqtami Israelman apamushayki. 5Persiapita, Cuspita y Futpitami escüdunkuna aptashqa y cascunkuna jatishqa yanapashunaykipaq shapäkamunqa. 6Qamkunawanmi shapäkamunqa Gomer y Bet-togarma nacionkunapa lapan soldädunkunapis. Paykuna norti kaq lädupita pasaypa karupitami punta punta shapäkamunqa. Maytsaypitami juntakämunqa yanapashunaykipaq. 7Tsay juntakämuq runakunawan shumaq kamarikärinki. Qamqa paykunapa capitanninmi kankipaq.

8<< <Kananpita atska wata pasarkuptinmi Israel nacionman pelyaq yaykunaykipaq nishayki. Tsay witsanqa Israel nación markakuna nawpata guërracho ushakashqa karpis yapay sharkatsishqanami kanqa. Guërracho vincir juk lädu nacionkunaman apashqan runakunapis kutimushqanami kanqa. Israel jirkankuna kashqancho jawkanami tanqapaq. 9Paykunaman aywar löcu tamyanöraq y patsata tsapakurkuq yana pukutaynöraqmi lapan soldäduykikunawan y yanapashuqniki runakunawan chayapäkunkipaq.

10<< <Tayta Diosmi mandaq Gogta kayno nin: Tsay witsanqa lutan yarpaykunalamanmi umayki churakashqa kankipaq. 11Tsaymi kayno ninkipaq: <<Pïninpis yanapananpaq mana kaptinmi tsay nacionman yaykushaq. Jawka y kamariküni kaykaq runakunatami atacashaq. Paykunapa markankunaqa corraläni y marka punkunkunapis trancaynaqmi kaykan. 12Atska nacionkunapita kutimur markankunachöna taptinmi wäkankunapis y imaykankunapis atska kaykan. Tsaykunataqa lapantami apakushaqpaq. Paykunaqa yarpapäkun kay patsapa chawpincho tarkaykashqantami>>.

13<< <Tsayno niptikimi Sabá y Dedán runakuna y Tarsischo taq rantikuq runakuna autoridäninkunawan kayno nipäkushunkipaq: <<¿Suwapämänaykipaqku shapäkamushqanki? ¿Qellaynïkunatapis, qorïkunatapis, uywäkunatapis y imaykäkunatapis apakunaykipaqku tsaytsika runakunawan shamushqanki?>> >

14<<Runapa tsurin, mandaq Gogta noqapa jutïcho kayno ninki: <Tayta Diosmi kayno nin: Tsay witsanmi kuyashqä Israel runakuna jawka kawashqanta musyaykur 15norti kaq lädu karu markaykipita Israel nacionman shapäkamunkipaq. Yupaytapis mana atipaypaq soldädukuna y cawallunkuna muntashqa tsaytsika runakunawanmi 16kuyashqä Israel nacionnïta atacankipaq. Tsaytsika soldädukunawan shamurmi patsa tsapakurkuq yana pukutaynöraq kapäkunkipaq. Shamuq watakunacho tsayno atacanaykipaqmi kamakätsishaq. Tsaynöpami wakin nación runakunapis munayniyuq kashqäta musyapäkunqa.

17<< <Tayta Diosmi kayno nin: Israel nacionta atacanaykipaq kashqantami sirvimaqnï profëtakunawan unaypis wilakatsirqä.

Gogta castigananpaq nishqan

18<< <Tayta Diosmi kayno nin: Israel nacionman mandaq Gog yaykuptinmi fiyupa rabyakushaqpaq. 19Kachkachyayparaq rabyakuptïmi Israel nación fiyupa siksikyanqa. 20Pescädukunapis, pishqukunapis, munti uywakunapis, lätaypa puriqkunapis y runakunapis fiyupa mantsakurmi siksikyanqa. Jirkakunapis juchunqami, qaqakunapis kuchpanqami y marka murällakunapis juchurmi ushakanqa.

21<< <Israel jirkankunachömi mandaq Gogta tukuy niraq desgraciawan castigashaq. Soldädunkunami kikinpura espädankunawan wanutsinakunqa. Tayta Diosmi tsayno nin. 22Pesti qeshyawan y wanutsinakuywanmi castigashaq. Tsaynölami payman, soldädunkunaman y paywan shamuq lapan runakunaman löcu tamyata, ruminöraq runtu tamyata y azufriyuq ninata tamyatsimushaq. 23Tsayno castigarmi munayniyuq y santu kashqäta maytsay nación runakunata musyatsishaq. Tsayraqmi Tayta Dios kashqäta musyapäkunqa> >>.

Currently Selected:

Ezequiel 38: qvmB

Highlight

Copy

Compare