Ezequiel 39

Gogta vincinanpaq nishqan

1<<Runapa tsurin, jutïcho mandaq Gogpa contran wilakur kayno ninki: <Tayta Diosmi kayno nin: Mesec y Tubal nacionkunapa mandaqnin Gog, qampa contraykimi kaykä. 2Norti kaq lädu karupita qarachashqa apamushpämi Israel jirkakunaman chayatsishayki. 3Tsaychömi itsuq kaq makikicho aptaraykashqayki flëcha jitakunaykita pakirishaq. Alawqa kaq makikicho aptaraykashqayki flëchaykikunatapis jitarishaqmi. 4Soldäduykikunawan y juk nacionkunapita shamuq soldädukunawanmi Israel jirkakunacho lapayki wanupäkunkipaq. Tsaychömi wiskulkuna y jirka uywakuna mikupäkushunaykipaq kamakätsishaq. 5Jäkuq pampakunachömi wanushqa jitarpankipaq. Noqa Tayta Diosmi tsayno nï.

6<< <Tsaynöpis Magog runakuna tarkaykashqan markakunata ninawanmi rupatsishaq. Costacho ali sigurashqa markakunatapis tsaynölami rurashaq. Tsayraqmi Tayta Dios kashqäta musyapäkunqa. 7Kuyashqä Israel runakunata salvaptïmi santu kashqäta pïmaypis tantiyapäkunqa. Mananami imaypis santu jutïta manakaqman churanqanatsu. Tsaynöpami maytsay nacioncho Israel runakunapa santu Tayta Diosnin kashqäta musyapäkunqa. 8Nishqäno kananpaq kaq junaq chayamuptinmi lapan nishqäkuna cumplikanqa>. Tayta Diosmi tsayno nin.

9<< <Tsaymi Israel runakuna markankunapita aywakur contrankunapa escüdunkunata, flëchankunata, taksha lanzankunata y jatun lanzankunata rupatsinanpaq shuntapäkunqa. Tsay shuntashqanmi qanchis wata yanukärinanpaq yanta kanqapaq. 10Tsaymi jirkakunapita yantata mana apamunqanatsu ni muntiman qeru mutuqpis aywanqanatsu. Tsaypa trukanqa shuntashqan armakunami yantan kanqa. Imaykanta qechunanpaq yaykuptinpis kikinkunatami qechupäkunqa. Suwapayta munaptinpis kikinkunatami suwapanqa>. Tayta Diosmi tsayno nin.

11<< <Tsay witsanmi Gog y soldädunkunata pampapäkunanpaq Israelcho juk partita rakishaq. Tsay kanqa Kachi Lamar tsimpan Viajëru jutiyuq pampachömi. Tsaycho mandaq Gog lapan soldädunkunawan pamparaptinmi runakuna tsaypa mana purinqanatsu. Tsaymi tsay partipa jutinta churapanqa Hamón-gog Pampa#39.11 Hamón-gog Pampa nishqanqa Gogpa tsaytsika soldädunkunapa pampan ninanmi. jutin kananpaq. 12Israel runakuna qanchis killataraqmi tsay ayakunata pampayta ushanqa. Tsayraqmi Israel nación pitsashqa quëdanqapaq. 13Israel runakunaqa lapanmi aya pampayman churakashqa kanqa. Munayniyuq kar contrankunata ushakätsishqätami imaypis yarparanqa>. Tayta Diosmi tsayno nin.

14<< <Ayakunata pampayta qalaykushqanpita qanchis killa pasarkuptinmi runakunata kachanqa intëru nacionpa aywar tulukunata ashi ashiykur pampananpaq. 15Rikapakuq aywaqkuna runapa tulunta tarirqa juk señalta churapäkunqa pampaqkuna shuntananpaq. Hamón-gog Pampa nishqanmanmi tsay tulukunatapis pampapäkunqa. 16Tsaynöpami Israel nación pitsashqa quëdanqa.

<< <Tsaynöpis tsay pamparashqan pampachömi juk marka kanqa. Tsay markapa jutintami Hamona#39.16 Hamona ninanqa tsaytsika soldädukuna ninanmi. jutin kananpaq churapanqa> >>.

17 Tayta Dios kaynömi nimarqan: <<Runapa tsurin, wiskulkunata, condorkunata y lapan chucaru jirka uywakunata juntakänanpaq ninki. Maytsaypitapis juntakämutsun kamarishqä mikuyta mikupäkunanpaq.#39.17 Tayta Dios kamarishqan mikuyqa Israel runakunata atacaqkunapa ayankunami kanqa. Israel jirkakunachömi paykunapaq mikuyta kamarishaq. Tsaychömi aytsata mikupäkunqa y yawarta upupäkunqa. 18Basáncho kaykaq wera carnipa, wera uyshapa, wera chïvupa y wera törukunapa aytsanta mikuqno y yawarninta upuqnömi soldädukunapa aytsanta mikupäkunqa y kay patsacho mandaqkunapa yawarninta upupäkunqa. 19Wanutsishqa runakunapa wiranta ajayashqanyaqmi mikupäkunqa. Shinkashqanyaqmi yawarnintapis upupäkunqa. 20Tsaychömi saksashqanyaq mikupäkunqa cawallu aytsakunata, muntädu aywaq runakunapa aytsankunata y lapan soldädukunapa aytsankunata>>.#Apoc. 19.17-18. Tayta Diosmi tsayno nin.

21<< <Tsaynöpami maytsay nación runakuna munayniyuq kashqäta musyapäkunqa. Paykunami rikanqa lutanta rurashqankunapita juzgar castigashqäta. 22Israel runakunapis tsay junaqpita patsami musyapäkunqa paykunapa Tayta Diosnin kashqäta.

23<< <Israel runakunata tsayno salvaptïmi maytsay nación runakunapis musyapäkunqa munayniyuq kashqäta. Manami munayniynaq kaptïtsu Israel runakuna juk lädu nacionkunacho nakarkaykan, sinöqa jutsata rurashqanpita y nishqäta mana cumplishqanpitami. Tsaymi paykunata yanapanäpa trukan contrankunata yanapashqä guërracho wanutsinanpaq. 24Mana cäsukamaypa jutsata rurashqanman tupumi Israel runakunata castigashqä>.

25<<Tsaymi Tayta Dios kayno nin: <Jacobpita miraq Israel runakunata kuyaparmi juk lädu nacionkunacho taykaqta Israel nacionman kutitsimushaq. Tsayno kutitsimuptïmi pïmaypis santu jutïta respitapäkunqa. 26Nacionnincho pipis achäquita mana ashipaptinmi jawkana kawapäkunqa. Tsaymi nawpata conträ sharkur lutanta rurashqanpita pasaypa penqakärinqa.

27<< <Juk lädu nacionkunacho y chikiqninkunapa markankunacho tashqanpitami paykunata shuntamushaq. Tsayno rurashqäta maytsay nacionkunacho taq runakunami rikapäkunqa. Tsaynöpami santu Dios kashqäta musyapäkunqa. 28Jäpa nacionkunaman prësu aywapäkunanpaq noqami kamakätsirqä. Maytsaymanpis qarqushqänölami ni juktapis mana kachaypa markankunaman shuntamushaq. Tsayraqmi Tayta Diosnin kashqäta musyapäkunqa. 29Israel runakunamanmi Espïritüta kachamushaq. Yapayqa manami paykunata kacharishaqnatsu>. Tayta Diosmi tsayno nin>>.

Currently Selected:

Ezequiel 39: qvmB

Highlight

Copy

Compare