Éxodo 20

Chunka mandamientukuna

Deuteronomio 5.6-21

1Tayta Diosmi kayno nirqan:

2<<Noqaqa Tayta Diosnikimi kaykä. Egiptucho ashmay kashqaykipitami jorqamushqä.

3<<Juk dioskunamanqa ama yärakunkitsu.

4<<Ima ïdulutapis ama rurankitsu jana patsacho kaykaq niraqta, kay patsacho kaykaq niraqta ni lamar rurincho kaykaq niraqtapis. 5Tsaykunamanqa ama qonqurpakunkitsu ni adorankitsu.#Éxo. 34.17; Lev. 19.4; 26.1; Deut. 4.15-18; 27.15. Noqalami [munayniyuq] Tayta Diosniki kaykä. Noqalata adoramänaykitami munä. Tsaymi mana cäsukamar ïdulukunata adoraqkunataqa castigashaq kikinta, tsurinta, wilkanta y wilkanpa tsurintapis. 6Noqata kuyamar mandamientükunata cumpliqkunatami itsanqa waranqa (1,000) generación kashqanyaq kuyapar yanapashaq.#Éxo. 34.6-7; Núm. 14.18; Deut. 7.9-10.

7<<Tayta Diosnikipa jutinta lutalaqa ama joqarinkitsu. Jutinta lutala joqariq kaqtaqa castiganqami.

8<<Jamay junaq sagrädu kashqanta ama qonqankitsu.#Éxo. 16.23-30; 31.12-14. 9Semänacho soqta junaq arushpayki lapan ruranaykipaq kaqkunata ruranki. 10Qanchis kaq junaqchöqa Tayta Diosnikita adorashpayki ama arunkitsu.#Éxo. 23.12; 31.15; 34.21; 35.2; Lev. 23.3. Tsaynöpis ama arutsinkitsu tsurikikunata olqutapis warmitapis, ashmaynikikunata olqutapis warmitapis, uywaykikunata ni nacionnikicho jäpa runakunatapis. 11Tayta Diospis jana patsata, kay patsata, lamarta y lapan imaykatapis soqta junaq kamarkurmi qanchis kaq junaqcho jamarqan. Tsayno jamashqanpitami tsay junaqta bendicionninta churashpan sagrädu junaq kananpaq nirqan.#Gén. 2.1-3; Éxo. 31.17.

12<<Mamaykita y taytaykita respitanki.#Deut. 27.16; Mat. 15.4; 19.19; Mar. 7.10; 10.19; Luc. 18.20; Efe. 6.2. Tsaynöpami Tayta Diosniki qoykushunaykipaq kaq nacioncho atska wata kawankipaq.#Efe. 6.3.

13<<Runa mayikita ama wanutsinkitsu.#Gén. 9.6; Lev. 24.17; Mat. 5.21; 19.18; Mar. 10.19; Luc. 18.20; Rom. 13.9; Stg. 2.11.

14<<Majaykita ama jarukunkitsu.#Lev. 20.10; Mat. 5.27; 19.18; Mar. 10.19; Luc. 18.20; Rom. 13.9; Stg. 2.11.

15<<Ama suwakunkitsu.#Lev. 19.11; Mat. 19.18; Mar. 10.19; Luc. 18.20; Rom. 13.9.

16<<Manakaqtaqa pitapis ama tumpankitsu.#Éxo. 23.1; Mat. 19.18; Mar. 10.19; Luc. 18.20.

17<<Runa mayikipa wayinta ama munapankitsu. Tsaynöpis ama munapankitsu warminta, olqu ashmayninta, warmi ashmayninta, törunta, bürrunta ni imaykankunatapis>>.#Rom. 7.7; 13.9.

Israel runakuna mantsakushqan

Deuteronomio 5.22-33

18Tsay hörami Israel runakuna mayarqan räyu bunrurushqanta y cornëtata tukamushqantapis. Tsaynöpis rikarqan elqümushqanta y jirka qoshtamushqanta. Tsaymi fiyupa mantsakärishpan karulapita rikarparqan. 19Tsaychömi Moisésta kayno nipäkurqan: <<Qamla ayway Tayta Dioswan parlamunaykipaq. Tayta Dios nishushqaykita wilamaptiki lapantami cäsukärishaq. Noqakunata Tayta Dios parlapämaptinqa wanupäkushaqchari>>.#Heb. 12.18-19.

20Tsawraqa Moisés kayno nirqan: <<Ama mantsakäriytsu. Tayta Dios shamushqa munayniyuq kashqanta tantiyar jutsata mana rurapäkunaykipaqmi>>.

21Tsaypitanami runakuna karulapita rikarpaykaptin Tayta Dios kaykashqan yanawyaykaq pukutay rurinman Moisés witsarqan.

Altarta imano rurananpaqpis tantiyatsishqan

22Tsaypitanami Moisésta Tayta Dios kayno nirqan: <<Israel runakunata kayno niy: <Tayta Diosmi nin: Jana patsapita parlamushqätami qamkuna mayashqanki. 23Adorapäkunaykipaq ima diostapis qoripita ni qellaypita ama rurapäkunkitsu.

24<< <Altarta noqapaq alpapita rurapäkuy. Tsaycho rupatsina sacrificiuta y jawka kawakuy sacrificiuta rupatsipäkunki uyshata karpis, cabrata karpis, wäkata karpis o töruta karpis. Maycho adoramänaykipaq nishqä kaqcho tsayno ruraptikimi noqa shamur bendicionnïta qoshaykipaq. 25Noqata adoramänaykipaq altarta perqarqa laqläni rumikunalawan perqapäkunki.#Deut. 27.5-7; Jos. 8.31. Laqlashqa rumiwan perqapäkuptikiqa manami alitsu kanqa. 26Tsaynöpis ama rurapäkunkitsu grädayuqtaqa. Grädayuqta rurarkur witsaptiki penqaynikimi rikakanqa> >>.

Currently Selected:

Éxodo 20: qvmB

Highlight

Copy

Compare