Éxodo 19

Israel runakuna Sinaí chunyaq jirkaman chayashqan

1Egiptupita yarqushqanpita kimsa killatami Sinaí chunyaq jirkaman Israel runakuna chayapäkurqan. 2Tsayman chayananpaqmi Refidimpita yarqupäkamurqan. Sinaí chunyaq jirkaman chayaykurmi punta chakincho toldunkunata ichitsipäkurqan patsakärinanpaq. 3Tsaypitami jirkaman Moisés witsarqan Tayta Dioswan tinkunanpaq. Tsay jirka puntapitami Moisésta qayakamur Tayta Dios kayno nirqan: <<Israel runakunata kayno wilanki: 4<Qamkuna rikashqankimi Egipto runakunata imano ushakätsishqätapis. Musyapäkunkimi makïcho kanaykipaq qamkunata imano shuntakushqätapis. Wawankunata anka apashqannömi qamkunatapis Egiptupita apamushqä.

5<< <Tsaymi nishqäkunata cäsukamar qamkunawan pactu rurashqäta cumpliptikiqa wakin runakunapitapis mas qamkunata kuyashayki. Intëru kay patsacho taq runakunata noqa kamashqa karpis qamkunatami mas kuyashayki.#Deut. 7.6; 14.2; 26.18; Tito 2.14. 6Qamkunataqa nacionninpami churashayki sirvimaq cürakunano kanaykipaq. Tsaymi santu kar noqalatana sirvipäkamankipaq>.#1Ped. 2.5, 9; Apoc. 1.6; 5.10. Tsayno nishqäta Israel runakunata wilanki>>.

7Tsaymi Moisés kutiykur mayor runakunata shuntaykur wilarqan Tayta Dios nishqankunata. 8Wilaptinmi Israel runakuna kayno nirqan: <<Tayta Dios nishqantaqa lapantami rurapäkushaq>>.

Paykuna tsayno nishqantami puntaman kutiykur Tayta Diosta Moisés wilarqan.#Éxo. 24.3; Deut. 5.27.

9Tsayno wilaptinmi Moisésta Tayta Dios kayno nirqan: <<Israel runakuna mayananpaq yanawyaykaq pukutay rurinpitami parlapäshayki. Tsaynöpami paykuna imaypis criyipäkunqa qamta parlapashqäta>>.

Israel runakuna awnishqanta Tayta Diosta Moisés wilaptinmi 10Tayta Dios kayno nirqan: <<Aywaykur runakunata wilanki kanan junaq y wara junaq purificakunanpaq#Éxo. 19.14-15. y röpankunata taqshakärinanpaq. 11Kananpita kimsa junaqtami lapan rikaykämaptin Sinaí puntaman urämushaq. Tsaypaq kamarikushqala shuyarpaykämätsun.

12<<Runakuna puntaman mana witsämunanpaq punta chakinman señalta tumaypa churanki. Nirkur wilanki tsayman pipis mana witimunanpaq. Tsay señalta pasaq kaqtaqa wanutsipäkunki. 13Runa kaptinpis o uywa kaptinpis karulapita saqmaypa o flëchaypa wanutsipäkunki. Cornëtata tukamushqanta mayarraqmi runakunaqa tsay señal kashqanyaq witsämunqa>>.#Heb. 12.18-20.

14 Tayta Dios tsayno niptinmi Sinaí jirkapita Moisés urarqan runakunata kamarikatsinanpaq. Tsaymi runakuna kamarikur röpankunata taqshakärirqan. 15Tsaychömi runakunata Moisés kayno nirqan: <<Kananpita kimsa junaqpaq lapayki kamarikäriy. Tsay paqaskunaqa warmikitapis ama yatapankitsu>>.

16Tsaypita kimsa junaqta patsa wararkuptinnami elquypis räyupis#Apoc. 4.5. fiyupa karqan. Yanawyayparaqmi jirkatapis pukutay tsapakurkurqan. Cornëtata tukamushqanpis mayakämurqanmi. Tsaymi lapan Israel runakuna mantsarishpan pasaypa siksikyarqan. 17Tsaypita Tayta Dioswan tinkunanpaq runakunata Moisés pushaptinmi jirka chakinman chayaykur shuyarparqan. 18Sinaí jirkaman nina chawpincho Tayta Dios urämushqa kaptinmi hornupitanöraq yanawyayparaq qoshtay sharkurqan.#Deut. 4.11-12; 5.4. Jirkapis fiyupami siksikyarqan. 19Cornëtata tukamushqanpis mas fuerti mas fuertimi mayakämurqan. Tsaychömi Moisés parlapaptin räyuno Tayta Dios contestamurqan. 20Sinaí jirka puntaman Tayta Dios urämurmi tsayman witsänanpaq Moisésta qayarqan. Tsaymi Moisés witsarqan jirka puntaman.

21Tsaychömi Tayta Dios kayno nirqan: <<Kutiykur runakunata wilanki rikamayta munarpis señalpita mana pasamunanpaq. Señalta pasamuq kaqqa lapanmi wanunqa. 22Nawpäman shamuq cürakunapis purificakutsun. Mana purificakuptinqa paykunatapis ushakätsishaqmi>>.

23Tsayno niptinmi Tayta Diosta Moisés kayno nirqan: <<Kikikimi nimashqanki señalta pipis mana pasamunanpaq. Tsaymi kay sagrädu Sinaí puntaman runakuna mana witsämunqatsu>>.

24Tsawraqa Tayta Dios kayno nirqan: <<Ayway wawqiki Aarónta pushakurkur kutimunaykipaq. Cuidädu cürakunapis y runakunapis señal churashqaykita pasamur noqa kaykashqäman witsämunman. Pasamuq kaqtaqa lapantami ushakätsishaq>>.

25Tsaymi puntapita Moisés urarpur runakunata wilarqan Tayta Dios nishqankunata.

Currently Selected:

Éxodo 19: qvmB

Highlight

Copy

Compare