Deuteronomio 9
9
Canaánman yaykuptin Tayta Dios yanapananpaq promitishqan
1Tsaypita mastapis Moisés kayno nirqan: <<Israel runakuna, shumaq mayapäkamay. Qamkunaqa Jordán mayuta tsimpashpayki munayniyuq runakuna tashqan nacionmanmi yaykapäkunkipaq. Tsay runakunaqa qamkunapita mas atskami karkaykan. Markankunapis jatunmi y altuyaq murallashqami kaykan. 2Musyashqaykinöpis paykuna Anacpita miraq karmi jatusaq runakuna karkaykan. Tsaymi paykunapaq runakuna kayno nipäkun: <¿Piraq ichipanman Anacpita miraq jatusaq runakunata?>
3<<Tsayno kaptinpis Tayta Dios nawpaykitami aywanqa nina ushaqno paykunata ushakätsinanpaq. Promitishqannölami yanapashunkipaq paykunata vincir asulanaykipaq. 4Tsayno yanapashuptiki shonqulaykichöpis kayno nir ama yarpapäkunkitsu: <Cäsukuq kashqantsipitami Tayta Dios tsay runakunata ushakätsishqa>. Manami cäsukuq kashqaykipitatsu ushakätsinqa, sinöqa tsay runakuna jutsata rurapäkushqanpitami. 5Yapaymi qamkunata kayno nï: Manami cäsukuq kashqaykipitatsu tsay nacionta Tayta Dios qoykushunkipaq, sinöqa tsaycho taq runakuna jutsasapa kashqanpitami. Tsaynöpami cumplinqa unay ayluntsikunata promitishqanta. 6Shumaq tantiyapäkuy. Manami cäsukuq kashqaykipitatsu tsay ali nacionta Tayta Dios qoykushunkipaq, sinöqa tsay runakuna jutsasapa kashqanpitami. Qamkunaqa mana cäsukuq runakunami karkaykanki>>.
Qoripita turituta rurapäkushqan
Éxodo 31.18—32.35
7<<Tayta Diosta chunyaq jirkacho rabyanätsiptiki castigashushqaykita imaypis ama qonqapäkuytsu. Egiptupita yarqamushqaykipita patsa kayman chayamushqaykiyaq qamkunaqa payta manami cäsukärirqaykitsu. 8Horeb jirkachöpis rabyanätsiptikimi ushakätsishunaykipaqna kaykarqan. 9Tsayno rabyanätsirqayki puntacho kashqäyaqmi.
<<Tsay puntamanmi witsarqä Tayta Dios qamkunawan pactu rurashqanta läja rumikunacho qelqaraykaqta chaskimunäpaq. Tsaychömi qoyämurqä chusku chunka (40) junaq y chusku chunka paqas mikuyta mana yawaypa y yakutapis mana upuypa.#Éxo. 24.18. 10Tsay punta chakincho juntakashqa kaykaptikimi nina rataykaqpita Tayta Dios parlamurqan. Lapan parlamushqankunatami ishkay läja rumikunaman dëdunwan qelqarkur tsay puntacho entregamarqan. 11Tsaycho entregamarqan chusku chunka junaq y chusku chunka paqas cumplirkuptinmi. Tsay ishkay läja rumikunachömi qamkunawan pactu rurashqan qelqaraykarqan. 12Entregamarmi kayno nimarqan: <Punta chakinman jukla kutiy. Egiptupita jorqamushqayki Israel runakuna jutsatami rurarkaykan. Paykunaqa manapis aykälatami qonqaykamar qoripita ïduluta ruraykur adorarkaykan>.
13<<Mastapis Tayta Dios kayno nimarqan: <Noqa rikashqämi Israel runakuna pasaypa mana cäsukuq kashqanta. 14Paykunapa favornin ama sharkuynatsu. Jutinkunapis qonqakänanpaqmi paykunata kanan ushakätsishaq. Qamlapitanami miranqa jatun nación rikakunanyaq. Qampita miraqkunaqa Israel runakunapitapis mas atskami kanqapaq>.
15<<Tsayno nimaptinmi Tayta Dios rurashqan pactu ishkay läja rumikunacho qelqaraykaqta apakurkur rupaykaq puntapita urämurqä. 16Qamkuna kaqman chaykamurmi tarirqä Tayta Diosnintsita rabyanätsir qoripita rurashqa turituta adorarkaykaqta. Tsayno rurar qamkunaqa manaraqpis aykätami pay nishqanta qonqaykärirqayki. 17Tsaymi rabyashpä tsay ishkay läja rumikunata qamkunapa nawpaykicho pasaypa aqulaqpaq saqtariykurqä.
18<<Tsaypitanami puntaman yapay kutiykur Tayta Diospa nawpanman lätakuykur lakishqa manakurqä. Puntata qoyämushqänölami chusku chunka junaq y chusku chunka paqas mikuyta mana mikuypa ni yakutapis mana upuypa qoyämurqä. Tsayno qoyämurqä payta rabyanätsir jutsata rurapäkushqaykipitami. 19Tayta Dios rabyakur ushakätsishunaykipaq kashqanta yarparmi pasaypa mantsakurqä. Tsayno kaptinpis manakuptïmi ushakätsishunaykipa trukanqa kuyapäshurqayki. 20Tayta Dios pasaypa rabyakur Aaróntapis wanutsiytami munarqan. Mana wanutsinanpaq manakuptïmi paytapis kuyaparqan. 21Qoripita turituta rurapäkushqaykitapis ninaman qaykurqä. Tsaypita ñutqu aqarkur Horeb puntapita urämuq yakuman winarqä.
22<<Tsaynölami Tayta Diosta rabyanätsirqayki Taberacho#Núm. 11.1-3., Masahcho#Éxo. 17.1-7. y Kibrot-hataavachöpis.#Núm. 11.31-34. 23Cades-barneaman#Núm. 13.25—14.38. chayaykurpis Tayta Diosnintsi nishqanta#Deut. 1.21. mana criyishpaykimi payta cäsukärirqaykitsu. Tsaymi mana yaykapäkurqaykitsu qoykushunaykipaq kaykaq nacionman.#Núm. 13.31; Deut. 1.26; Heb. 3.16. 24Qamkunaqa reqishqäpita patsami Tayta Diosta mana cäsukuq runakuna karkaykanki. 25Tsaymi mana ushakätsishunaykipaq ruwakur chusku chunka junaq y chusku chunka paqas Tayta Diospa nawpancho lakishqa lätararqä. 26Ruwakur kaynömi nirqä: <Tayta Dios, herenciaykipaq akrashqayki runakunata ama ushakaykatsilaytsu. Munaynikiwanmi Egiptupita pushamushqanki. 27Sirvishuqniki Abrahamta, Isaacta y Jacobta promitishqaykita yarpashpayki Israel runakuna jutsata rurashqanpita perdonaykulay. 28Mana perdonaptikiqa Egipto runakuna musyashpan kaynömi nipäkunqa: <<Promitishqan nacionman chayatsiyta Tayta Dios manami kamäpakushqatsu>>.
<< <Tsaynölami kaynöpis nipäkunqa: <<Israel runakunapa contran kashpanmi chunyaq jirkaman pushaykur ushakätsishqa>>.
29<< <Imano karpis Israel runakunaqa kuyashqayki herenciaykimi karkaykan. Kikikimi Egiptucho nakarkaykaptin podernikiwan jorqamushqanki> >>.
Currently Selected:
Deuteronomio 9: qvmB
Highlight
Copy
Compare
Share
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
