Deuteronomio 19

Runakuna amparakunapaq markakunata akrananpaq tantiyatsishqan

Números 35.9-28; Josué 20.1-9

1<<Qoykushunaykipaq kaq nacioncho taq runakunata Tayta Dios ushakarkatsiptin paykunapa markankunacho y wayinkunacho qamkunanami tankipaq. 2Tsay nacioncho tashpayki kimsa markakunata akrapäkunki.#Jos. 20.1-9. 3Tsay markakuna kanqa runa mayinta wanutsiq runa qeshpir amparakunanpaqmi. Tsay kimsa markakunata akranaykipaqqa Tayta Dios qoykushunaykipaq kaykaq nacionnikita kimsaman rakinki. Nirkur cada particho juk markata akrapäkunki. Tsay markakunaman aywaq nänikunatapis shumaq altsapäkunki.

4<<Contran mana kaykar wanutsiq runa amparakuna markaman qeshpiptinmi venganzata ashirpis payta mana wanutsinqatsu. 5Tsayno kaptinqa yantata mutuykaptin makinpita hächa yarqukar runata wanutsiptinqa amparakuna markaman qeshpir aywakunqa.

6<<Amparakuna markaqa manami aläpa karuchötsu kanman. Aläpa karu kaptinqa wanuq runapa aylunkuna rabyashqa taripaykur wanutsinqapaq. Mana yarpaypa wanutsiq runakunataqa ama wanutsipäkutsuntsu. 7Tsayno mana wanutsipäkunanpaq kimsa markakunata akrapäkunki amparakunanpaq.

8-9<<Lapan tantiyatsishqä mandamientunkunata cumplir Tayta Diosta kuyar munashqanno imaypis kawaptikimi unay ayluntsikunata promitishqanno nacionnikipa lindërunta jatunyätsinqa. Tsayno jatunyätsiptinqa kimsa amparakunan markakuna kaykashqan jananman kimsa masta akrapäkunki. 10Amparakuna marka soqta kaptinmi runa mayinta mana yarpaypa wanutsiq runa mayqan markamanpis qeshpikunanpaq cerca kanqa. Tsaynöpami Tayta Dios qoykushunaykipaq kaq nacioncho tsay qeshpiq runata mana wanutsipäkunqatsu. Payta wanutsirqa jutsayuqmi kanqapaq.

11<<Pipis runa mayinta chikipashpan wanurkatsir amparakuna markaman qeshpiptinqa 12tsay runapa markanpita mayor runakuna aywaykurmi apatsimunqa. Nirkurmi wanuq runapa aylunkunaman entreganqa wanutsipäkunanpaq. 13Tsay niraq runataqa mana kuyapaypa wanutsipäkunqa. Tsaynöpami Israel nacioncho runakuna tantiyakur runa mayinta mana wanutsipäkunqatsu. Wanutsikuq runa manana kaptinqa jawkanami kawapäkunkipaq.

14<<Tayta Dios qoykushunaykipaq kaykaq nacioncho tashpayki vecïnuykipa lindërunkunata respitapäkunki. Unay ayluykikuna posisionta chaskir mujunninpaq jawishqan wankakunataqa ama wititsinkitsu.#Deut. 27.17; Job 24.2; Prov. 22.28; Ose. 5.10.

Testïgukuna ishkay o kimsa kananpaq nishqan

15<<Ishkay o kimsa testïgukuna careaptinraqmi pipis jutsayuq kashqan musyakanqa. Runata wanutsishqanta o imatapis lutanta rurashqanta juk runala niptinqa manami välinqatsu.#Núm. 35.30; Deut. 17.6; Mat. 18.16; 2Cor. 13.1; 1Tim. 5.19; Heb. 10.28.

16<<Pipis chikipashpan imatapis manakaqta jitapaptinqa 17jitapaqpis y jaqatsashqan runapis ishkanmi aywapäkunqa Tayta Diospa nawpancho kaykaq cürakunaman y juezkunaman. 18Tsaychömi juezkuna shumaq tapupakunqa#19.18 Wakin runakunaqa tapunqa nipäkun. rasunpa kashqanta o mana rasunpa kashqantapis musyananpaq. Testïgu lulakushqanta tariparqa 19jitapaq runa castigatsiyta yarpashqannölami kikintapis castigapäkunqa. Tsaynöpami mana ali ruraykuna qamkunacho mana kanqatsu.#Deut. 13.5; 17.7; 1Cor. 5.13. 20Manakaqta jitapaykaq runata castigashqanta musyarmi wakin runakunapis mantsakur manakaqta pitapis mana jitapanqanatsu.

21<<Jutsayuq kaqtaqa mana kuyapaypa castigapäkunki. Pipis runa mayinta wanutsiptinqa kikintapis wanutsipäkunki. Nawinta jorquptinqa kikinpa nawintapis jorqapäkunki. Kirunta jorquptinqa kikinpa kiruntapis jorqapäkunki.#Éxo. 21.23-25; Lev. 24.19-20; Mat. 5.38. Makinta pakiptinqa kikinpa makintapis pakipäkunki. Tsaynöla chakinta pakiptinqa kikinpa chakintapis pakipäkunki.#19.21 Nawpataqa runa mayinpa contran imatapis ruraptin runakuna aläpami castigapäkuq. Tsayno kaptinmi Moisés qelqashqan leykunacho nirqan pipis jutsata rurashqanman tupu castïguta chaskinanpaq kashqanta.

Currently Selected:

Deuteronomio 19: qvmB

Highlight

Copy

Compare