Deuteronomio 18

Levitakunapa derëchun kananpaq nishqan

1<<Cürakunapa y lapan Leví trïbu runakunapapis manami chakrankuna kanqatsu. Tsaymi levitakunaqa Israel mayinkuna Tayta Diospaq apashqan sacrificiukunalawan y ofrendakunalawan kawapäkunqa. 2Israel nacioncho chakrata chaskinanpa trukanqa kikin Tayta Diosmi paykunata promitishqanno herencian kanqa.#Núm. 18.20.

3<<Törukunata, carnishkunata y cabrakunata sacrificiupaq apapäkushqanpitami cürakunapa derëchun kanqa palitillan, chakawshan y cuwäjun. 4Tsaynöpis paykunapaq kanqa primiciata apapäkushqan trïgu, vïnu, aceiti y uyshakunapa punta kaq rutushqan milwan. 5Tsayno chaskipäkunqa imaypis sirvipäkunanpaq Tayta Dios Israel trïbukunapita akrashqanpitami.

6<<Mayqan levitapis tashqan markapita Tayta Dios akrashqan sitiuman aywarqa 7levita mayinkunanöla Tayta Diosta tsaycho sirvinqa. 8Mikuytapis chaskinqa wakin chaskishqannölami. Taytan kamaripashqan jananmanmi tsaykunata chaskinqa.

Mana ali costumbrikunata mana rurananpaq nishqan

9<<Tayta Dios qoykushunaykipaq kaykaq nacionman chayashpayki tsaycho taq runakunapa mana ali costumbrinkunata ama yachakärinkitsu. 10Mayqaykipis olqu tsurikita ni warmi tsurikita sacrificiupaq ama rupatsipäkunkitsu. Ama adivinapakuq ni brüju ni rikakuqpis kapäkunkitsu.#Éxo. 22.18; Lev. 19.26, 31. 11Majiquërupis ni chaqchapakuqpis ama kapäkunkitsu. Wanushkunapa almanta ama manakunkitsu ni tapukunkitsu. 12Tsaykunata ruraqkunaqa Tayta Diosta fiyupami rabyanätsin. Yaykunaykipaq kaq nacioncho taq runakuna tsayno rurashqanpitami Tayta Dios paykunata qarqur ushakätsinqa. 13Qamkunaqa Tayta Dios munashqanno jutsaynaq kawapäkuy.#Mat. 5.48. 14Yaykunaykipaq nacioncho taq runakuna brüju y adivinakuq kaptinpis Tayta Dios manami munantsu qamkuna tsayno kapäkunaykita.

Moiséspa trukan juk profëtata Tayta Dios churananpaq nishqan

15<<Tayta Diosmi qamkunapita juk runata churanqa noqano profëta kananpaq. Payta cäsukärinki.#Hech. 3.22; 7.37. 16Yarpapäkuy Horeb jirkacho juntakaykur Tayta Diosta manakärishpayki kayno nishqaykita: <Tayta Dios nina rupaykaqpita rimamushqanta mayayta mantsakärïmi. Rimamushqanta mayarqa wanupäkushaqchari>.#Éxo. 20.19.

17<<Tsayno nipäkuptikimi Tayta Dios kayno nimarqan: <Paykuna nishqanqa alimi kaykan. 18Tsayno kaykaptinqa Israel mayinkunapitami juk runata churashaq qamno profëta kananpaq. Wilakuynïta shiminman churaptïmi lapan nishqäkunata wilakunqapaq. 19Tsay profëta noqapa jutïcho wilakushqanta pipis mana cäsukuptinqa kikïmi juzgashaqpaq>.

20<<Mayqan runapis profëta tukushpan <Tayta Diospa jutinchömi wilakuykä> nir manakaqkunata wilakuptin o juk dioskunapa jutincho wilakuptinqa wanutsipäkunki. 21Tsayno kaptinqa qamkuna capaz kayno nipäkunkipaq: <¿Imanöpataq musyashwan juk runa wilakushqan Tayta Diospita kashqanta o mana kashqantapis?> 22Juk wilakuq runa ima pasananpaq kashqanta Tayta Diospa jutincho wilakuptinpis nishqanno mana pasaptinqa musyapäkunkipaq Tayta Diospita mana kashqanta. Kikinpa yarpaynilanpita wilakushqanta tantiyashpayki ama cäsupankitsu.

Currently Selected:

Deuteronomio 18: qvmB

Highlight

Copy

Compare