Deuteronomio 20

Guërrata imano rurananpaq nishqan

1<<Guërraman aywashpayki contraykikunapa soldädunkuna, cawallunkuna y carrëtankuna atska kaptinpis ama mantsakärinkitsu. Egiptupita jorqamaqnintsi Tayta Diosmi yanapashunki paykunata vincinaykipaq. 2Pelyayta qalaykunaykipaqqa cürami lapan runakunata shakyätsir 3kayno ninqa: <Israel runakuna, mayapäkamay. Contrayki soldädukunawan kanan junaq pelyashpayki mana mantsakuypa y mana desvaloraypa pelyapäkuy. 4Qamkunawanmi Tayta Diosnintsi kaykan. Contraykikunawan kikin pelyashpanmi salvashunkipaq>.

5<<Tsayno nir cüra shakyarkatsiptin mandaq runakunapis kayno ninqa: <Mayqaykipis wayi rurayta tsayraq ushashqa karqa wayikiman kutikuy tänaykipaq. Guërracho wanuptiki imaptikiqa wayikicho juknami tanqapaq. 6Mayqaykipis plantashqayki üvapa wayuyninta manaraq shuntarqa wayikiman kutikuy. Guërracho wanuptiki imaptikiqa juknami üvaykita cosechakunqapaq. 7Mayqaykipis jipashwan tänaykipaq parlakushqa karqa wayikiman kutikuy paywan tänaykipaq. Guërracho wanuptiki imaptikiqa juknami tsay jipashwan tanqapaq>.

8<<Tsaypitanami mandaq runakuna yapay kayno nipäkunqa: <Mayqaykipis jaka shonqu karqa wakin kaqta mana qelanätsinaykipaq wayikipa kutikuy>. 9Mandaqkuna tsayno parlayta usharkur runakunapa puntanta guërraman aywapäkunqa.

10<<May markamanpis atacanaykipaq chayashpayki puntataqa paykunawan parlakärinki mana pelyanaykipaq. 11Nishqaykita chaskikushpan markanman yaykunaykipaq kachapäshuptikiqa paykunawan ama pelyapäkunkitsu. Tsaypa trukanqa paykunata churanki faynacho imaypis arupäshunaykipaq. 12Qamkunata mana chaskipäshushpayki atacashunaykipaq yarqamuptinqa tsay markata jiruruypa tsaparkur jukla atacapäkunki. 13Qamkunapa makikiman tsay markata Tayta Dios churamuptinqa tsaycho taq olqukunata chipyaq espädawan wanutsipäkunki. 14Warmikunata, wamrakunata, uywakunata y imaykankunatapis kikikipaqna apakärinki. Tsay runakunapa mikuynintapis Tayta Dios kamaripaykäshuptikiqa apakärinki.

15<<Manami yaykunaykipaq nacioncho kaykaq markakunata tsayno rurapäkunaykipaqtsu niykä, sinöqa mas karucho kaykaq markakunata tsayno rurapäkunaykipaqmi. 16Tayta Dios qoykushunaykipaq kaykaq nacionman yaykurqa pitapis kawaykaqta ama kachaykunkitsu. 17Tsaypa trukanqa Tayta Dios nishushqaykinöla heteo runakunata, amorreo runakunata, cananeo runakunata, ferezeo runakunata, heveo runakunata y jebuseo runakunata lapanta ushakätsinki. 18Mana ushakätsiptikiqa diosninkunata adorar lutanta rurapäkunaykipaqmi inkitapäkushunki. Tsayno rurarqa Tayta Diosnintsitami pasaypa rabyanätsinkipaq.#Deut. 13.15-16; Jos. 6.17.

19<<May markatapis pelyanaykipaq atska killa atacarqa wayuq yörakunata ama mutupäkunkitsu. Tsay yörakunata mutuptikiqa wayuynin mikupäkunaykipaq manami kanqatsu. Tsaynöpis yörakunaqa manami runatsu kaykan atacashunaykipaq. 20Mana wayuq yörakunatami itsanqa mutupäkunki escalërakunata ruraykur markaman pelyaq yaykapäkunaykipaq.

Currently Selected:

Deuteronomio 20: qvmB

Highlight

Copy

Compare