Deuteronomio 17

1<<Töruta karpis uyshata karpis däñashta o mana alitaqa Tayta Diospaq altarcho ama rupatsipäkunkitsu. Tsayno kaqkunata ruraptikiqa pasaypami rabyakun.

2<<Tayta Dios rurashqan pactuta manakaqman churashpan qoykushunaykipaq kaykaq markakunacho olqupis o warmipis 3juk dioskunata adorar qonqurpakuptin o intita, killata o qoylarkunata adoraptinqa 4shumaq tapukärinki rasunpa adorashqanta o mana adorashqantapis. Israel nacioncho rasunpa tsayno adoraykashqanta musyarqa 5tsay runata o warmita marka yarqunancho saqmaypa wanutsipäkunki.#Éxo. 22.20.

6<<Tsayno wanutsipäkunaykipaqqa ishkay o kimsa testïgukunaraqmi kanman. Juk testïgu nishqalanwanqa manami wanutsipäkunkimantsu.#Núm. 35.30; Deut. 19.15; Mat. 18.16; 2Cor. 13.1; 1Tim. 5.19; Heb. 10.28. 7Tsay testïgukunaraqmi warmita o runata karpis puntata saqmayta qalaykärinqa. Tsaypitanami lapan runakuna saqmapäkunqa. Tsaynöpami mana ali ruraykuna qamkunacho mana kanqatsu.#Deut. 13.5; 19.19; 1Cor. 5.13.

8<<Markaykicho aläpa sasa arreglaypaq problëmakuna kanqami. Tsayno problëmakuna kanqa runa mayinta wanutsishqanpita, runa mayinwan rimanakushqanpita o runa mayinwan pelyashqanpitapis. Tsaykunata arreglayta mana kamäpakurqa Tayta Dios akrashqan sitiuman aywaykur 9tsaycho kaq levita cürakunata karpis o juezta karpis tapukärinki. Paykunami tantiyatsishunkipaq imano arreglanaykipaqpis. 10Kutiykur paykuna tantiyatsishushqaykinöla arreglapäkunki. 11Paykuna yätsishushqaykinöla imatapis mana qonqaypa lapanta arreglapäkunki.

12<<Tayta Diosta sirviykaq cüra o juez imano arreglananpaq nishqanta mana cäsukuq runataqa wanutsipäkunki. Tsaynöpami lutan ruraq runakuna Israel nacioncho mana kanqatsu. 13Tsayno wanutsishqanta musyashpanmi runakuna mantsakunqa cürakuna y juezkuna nishqankunata cäsukärinanpaq.

Reykuna imano kananpaq nishqan

14<<Tayta Dios qoykushunaykipaq kaq nacioncho tashpayki wakin nación runakunapa mandaqnin reykuna kashqanno qamkunapis rey kananta capaz munapäkunkipaq.#1Sam. 8.5. 15Tsayno munarqa Tayta Dios akrashqan Israel mayikita churapäkunki mandaqniki rey kananpaq. Jäpa runataqa ama churapäkunkitsu.

16<<Tsay reyqa ama rantinqatsu atska cawallukunata ni Egiptumanpis ama kachanqatsu cawalluta rantimunanpaq.#1Rey. 10.28; 2Crón. 1.16; 9.28. Egiptuman mana kutinantsipaqmi Tayta Dios kayno nirqan: <Egiptuman imaypis ama kutipäkunkitsu>. 17Tsaynöpis atska warmiyuq ama katsuntsu.#1Rey. 11.1-8. Atska warmiyuq karqa Tayta Diostapis qonqaykunqami. Qoritapis ni qellaytapis aläpa ama shuntatsuntsu.#1Rey. 10.14-22, 27; 2Crón. 1.15; 9.27.

18<<Rey kananpaq churapäkuptin kay yachatsishqä leykunata liyinanpaq levita cürakuna tsararashqan röllupita juk rölluman copiatsinqa. 19Tsay leykunatami reyqa wanunanyaq waran waran liyinqa. Tsaynöpami Tayta Diosta mantsakuyta yachakur lapan leyninkunata y estatütunkunata cäsukunqapaq. 20Tsaynöpis marka mayinkunata manami manakaqman churanqatsu y ley nishqankunatapis manami qonqanqatsu. Tsayno karqa kikinpis, tsurinkunapis y tsurinkunapita miraqkunapis Israel nacioncho imaypis reymi kanqapaq.

Currently Selected:

Deuteronomio 17: qvmB

Highlight

Copy

Compare