Hechos 12

Carcilcho Pedro wichqarashqan

1Tsay witsanmi rey Herodes Jesucristuman yärakuqkunata astatsiyta munar wakinta prësu tsaritsirqan. 2Tsaynölami soldädunta nirqan apóstol Juanpa wawqin Santiagutapis espädawan wanutsinanpaq. 3Wanutsishqanpita Israel runakuna kushikushqanta rikarmi Pedrutapis prësu tsaritsirqan. Tsay karqan Levadüraynaq Tantata Mikupäkunan fiesta#12.3 Tsay witsanqa Levadüraynaq Tantata Mikupäkunan fiestawan Pascuapis tsay junaqlami qalaykuq. Tsay fiestakunata qanchis junaqmi rurapäkuq. witsanmi. 4Pascua fiesta#Éxo. 12.1-27. ushayraq lapan runakunapa nawpancho juzgayta munarmi carcilman wichqatsirqan. Nirkurmi chusku grüpu soldädukunata kacharqan täpananpaq. Cada grüpuchömi chusku soldädukuna karqan.

5Carcilcho Pedruta wichqarätsiptinmi Jesucristuman yärakuqkuna Tayta Diosta mana chawaypa manakurkaykarqan.

Pedruta ángel carcilpita jorqushqan

6Herodes juzgananpaq patsa manaraq waraptinmi ishkay soldädukunapa chawpincho cadinawan cadinashqa Pedro punuykarqan. Wakin kaq soldädukunanami punkucho täparkaykarqan. 7Tsayno kaykaptinmi Señor Jesucristo kachamushqan ángel elaqpita atsikyar yuriparqan. Custillanta yataykur rikcharkatsirmi kayno nirqan: <<¡Apurädu sharkuy, Pedro!>>

Niptinmi jinan höra wataraykashqan cadinakuna Pedrupa makinpita kachakarqan.

8Tsaypitami ángel kayno nirqan: <<Jukla wachkakur lanqikita jatikuy>>.

Jatikurkuptinnami kayno nirqan: <<Capötikita aylukurkur qepaläpa shamuy>>.

9Tsawraqa angilpa qepalanpa Pedro aywarqan. Carcilpita rasunpa yarquykashqanta manami tantiyarqantsu, sinöqa revelacionta rikaykashqantami yarparqan. 10Ruricho kaq soldädukunata y chawpi punkucho kaq soldädukunata pasarkurmi cälliman yarquna kaq fiërru punkumanna chayapäkurqan. Tsay punku kikilan kichakaptinmi cällimanna yarqupäkurqan. Tsaypita juk esquïnata aywarkaykaptinmi ángel elqakäkurqan.

11Tsawraqa cällicho kaykashqanta tantiyarmi Pedro kayno nirqan: <<Kananmi itsanqa rasunpa musyä salvamänanpaq angilninta Tayta Dios kachamushqanta. Paymi salvamashqa Herodespa makinpita y Israel runakuna wanutsimänanpita>>.

12Tayta Dios salvashqanta tantiyarnami Juanpa maman Maríapa wayinman aywarqan. Juanpa jukaq jutinmi karqan Marcos. Tsaychömi atskaq juntakaykur Pedrupaq Tayta Diosta manakurkaykarqan. 13Chayaykur sawan punkuta Pedro takakuptinmi pï kashqantapis rikaq yarqurqan Rode jutiyuq jipash. Tsay jipash karqan Maríapa yanapaqninmi. 14Parlakuyninpa Pedro kashqanta reqiykurmi pasaypa kushikurqan. Tsawraqa punkuta mana kichaylapa ruriman warakayla kutirqan punkucho Pedro kaykashqanta wilananpaq.

15Wilaptinmi kayno nipäkurqan: <<¡Imanöpataq Pedro kanqa!>>

Rasunpa Pedro kashqanta niptinmi mana criyir kayno nipäkurqan: <<Angilnin parlamuq imatachari mayapakushqanki>>.

16Tsayyaqqa Pedro yaparir yaparirmi punkuta takakurqan. Punkuta kicharir rikaykurnami lapanpis espantashqa rikakurqan. 17Upälakunanpaq makinwan sëñata rurarkurmi Pedro wilaparqan carcilpita Señor Jesucristo imanöpa jorqamushqantapis. Nirkurnami kayno nirqan: <<Carcilpita yarqamushqäta Santiaguta#Mat. 13.55; Juan 7.3-5; Hech. 1.14. y wakin wawqi panikunatapis wilaykulay>>.

Tsaypitanami yarqurir juk lädupana aywakurqan.

18Carcilcho Pedro mana warämushqa kaptinmi soldädukuna kayno nipäkurqan: <<Pedruta ¿imaraq pasashqa?>>

Tsayno nishpanmi ima ruraytapis mana kamäpakurqantsu. 19Maytsaypa ashitsirpis mana tariykurmi täpaq soldädukunata shumaq tapurkur Herodes ordenarqan tsay soldädukunata wanutsinanpaq. Nirkurmi Judeapita Cesareaman Herodes aywakurqan.

Herodes wanushqan

20Tirucho y Sidóncho taq runakuna Herodespa contran rurashqa kaptinmi Herodes rabyakushpan tsay markakunaman mikuyta apatsiyta mana munarqannatsu. Tsayno kaptinmi tsay runakuna Herodesman kachata kachakurqan parlapäkamunanpaq. Manaraq parlarmi Herodespa yanapaqnin Blastuwan amistäta rurapäkurqan. Blastunami Herodeswan parlarqan Tiro y Sidón runakunawan amistananpaq. 21Tsawraqa Herodes jitaparqan juk junaq paykunawan parlananpaq. Tsay junaq chayamuptinmi mas alinnin kaq röpanta jatikurqan. Nirkurnami juzgananpaq kaq sillëtaman jamaykur runakunata parlapämurqan. 22Tsayta mayaykurmi runakuna lapan kalpanwan kayno nipäkurqan: <<¡Kay parlaykämuqqa manami runatsu, sinöqa juk diosmi!>>

23Tayta Dioslata adorananpaq Herodes mana niptinmi Señor Jesucristo kachamushqan ángel jinan höra castigaptin kuru ushaypa wanurqan.

24Tayta Diospa wilakuynintaqa maytsaychöpis runakuna chaskikärirqanmi. 25Bernabéwan Saulunami wawqi panikuna apatsishqanta Jerusalénman chayatsipäkurqan.#Hech. 11.28-30. Nirkurmi Marcos nishqan Juanta pushakurkur Antioquíaman kutipäkurqan.

Currently Selected:

Hechos 12: qvmB

Highlight

Copy

Compare