Hechos 13

Bernabéta y Sauluta Espíritu Santu akrashqan

1Antioquía iglesiachömi karqan profëtakuna y yachatsikuqkuna. Paykunami karqan Bernabé, Yana Runa nishqan Simón, Cirenipita kaq Lucio, Manaén y Saulo. Manaénta y rey Herodestaqa wamra kaptin tsay wayilachömi ashmarqan. 2Juk junaqmi Tayta Diosman yärakuqkuna ayunar alabarkaykaptin Espíritu Santu kayno nirqan: <<Bernabéta y Sauluta churapäkuy wilakuynïta wilakur puripäkunanpaq. Tsaypaqmi paykunata qayashqä>>.

3Ayunarkurnami Bernabépa y Saulupa umanman makinkunata churaykur Tayta Diosta manakärirqan. Nirkurmi paykunata despacharqan.

Chipricho wilakushqan

4Espíritu Santu tsayno kachaptinmi Bernabé y Saulo chayarqan Seleucia markaman. Tsaypitanami büquiman witsarkur Chipre islaman aywapäkurqan. 5Salamina markaman chayaykurmi sinagögakunacho Tayta Diospa wilakuyninta wilakärirqan. Marcos nishqan Juanpis paykunata yanaparmi purirqan.

6Chipripa pasar wilakurmi Pafos markaman chayashpan Barjesús jutiyuq Israel runata taripäkurqan. Payqa profëta tukuq brüjumi karqan. 7Tsay brüjumi Chipripa mandaqnin Sergio Pauluta yanapar purirqan. Sergio Pauluqa ali yarpayniyuq runami karqan. Tayta Diospa wilakuyninta mayayta munarmi Bernabéta y Sauluta qayatsirqan. 8Brüjunami paykunapa contran sharkur Sergio Pauluta micharqan wilakushqanta mana chaskinanpaq. Barjesústaqa brüju kaptinmi Elimas#13.8 Elimas ninanqa brüju ninanmi. nipäkuq.

9Tsayno michaptinmi Sauluqa rabyarqan. (Saulupa jukaq jutinmi karqan Pablo.) Tsaymi rikärir Espíritu Santupa munayninwan 10kayno nirqan: <<¡Diablu munashqanta rurarmi qamqa Tayta Diospa contran kaykanki! ¿Imayyaqtaq runakunata lulapar Tayta Diospa wilakuqnin tukunki? 11Tsayno kashqaykipitami Tayta Diospa castïgunwan qapra rikakur juk tiempuyaq atsikyaq patsata mana rikankipaqtsu>>.

Tsayno niptinmi jinan höra qapra rikakurqan. Maypapis aywayta mana kamäpakurmi runakunata ruwakurqan janchananpaq. 12Qaprayashqanta rikaykur y Diospa wilakuynin ali kashqanta tantiyakurmi Sergio Paulo criyirqan.

Pisidiacho kaq Antioquíacho wilakushqan

13Tsaypitanami büquiman witsarkur Pafos markapita Pablo yanapaqninkunawan aywapäkurqan Panfiliacho kaykaq Perge markaman. Tsaycho paykunata kachariykurmi Marcos nishqan Juan Jerusalénman kutikurqan. 14Perge markapita aywarmi Pablo y Bernabé chayapäkurqan Pisidiacho kaq Antioquía markaman. Jamay junaq kaptinnami sinagögaman aywapäkurqan. 15Leykunata y profëtakuna qelqashqanta liyiyta usharkuptinmi sinagögacho mandaqkuna Pablo y Bernabé jamaraykashqanman juk runata kachapäkurqan kayno ninanpaq: <<Wawqikuna, imalapis yachatsimänaykipaq kaptinqa jukla yachatsipäkamay>>.

16Tsawraqa Pablo ichirkur runakuna upälakunanpaq makinta joqarishpan kayno nirqan: <<Israel runakuna y Tayta Diosta mantsakuq mana Israel runakuna, yachatsishqäta shumaq mayapäkamay. 17Adorashqantsi Tayta Diosshi unay ayluntsikunata akraykur Egiptucho jäpa kaykaptinpis jatun nación rikakunanpaq yanaparqan.#Éxo. 1.7. Nirkurnashi milagrukunata rurashpan Egiptupita jorqamurqan.#Éxo. 12.51. 18Chusku chunka (40) watano chunyaq jirkapa purir mana cäsukäriptinpis pacienciakurqanshi.#Núm. 14.34; Deut. 1.31. 19Tsaypita Canaánman chayaykatsirnashi qanchis nacionkunata#Deut. 7.1. ushakaykatsir herenciankuna qoykurqan.#Jos. 14.1. 20Egiptucho kashqanpita Canaáncho herenciankunata chaskishqanyaq chusku pachak pitsqa chunka (450) watanöshi pasarqan.

<<Canaánchönashi profëta Samuel#1Sam. 3.20. kawashqan witsanyaq Tayta Dios juezkunata churaparqan mandananpaq.#Jue. 2.16. 21Tsaypitanashi mandaqnin rey kananta runakuna manakuptin#1Sam. 8.5. Benjamín trïbu Cispa tsurin Saúlta churaparqan.#1Sam. 10.21. Payshi chusku chunka (40) wata rey karqan. 22Tsaypitanashi Saúlta jorqurir Davidtana churarqan rey kananpaq. Paypaqshi Tayta Dios kayno nirqan: <Isaípa tsurin Davidqa shonqüpaqnömi kaykan. Payqa lapan nishqäkunatami cäsukunqa>.#1Sam. 13.14; 16.12-13; Sal. 89.20.

23<<Tsaypitanami Tayta Dios promitishqannöla rey Davidpa aylunpita salvamaqnintsi Jesús Israelcho yurirqan. 24Manaraq Jesús wilakuptinmi Israel runakunata Bautizaq Juan wilaparqan jutsankunata kacharir bautizakärinanpaq.#Mar. 1.4; Luc. 3.3. 25Tsaypita wanunanpaq walkalana pishiykaptinmi Juan kayno nirqan: <¿Pï kashqätataq yarpapäkunki? Manami noqatsu Cristo kä. Cristuqa qepätaraqmi shamunqa.#Juan 1.20. Noqaqa manami lanqi watunta paskapänaläpaqpis merecïtsu>.#Mat. 3.11; Mar. 1.7; Luc. 3.16; Juan 1.27.

26<<Abrahampita miraq Israel wawqikuna y Tayta Diosta mantsakuq mana Israel runakuna, noqantsimanmi salvakunantsipaq ali wilakuy chayamushqa. 27Jerusaléncho taq runakunaqa y autoridäninkunaqa profëtakuna qelqashqanta sinagögacho cada jamay junaq liyirpis manami tantiyapäkurqantsu Jesúspita qelqarashqanta. Tsaymi profëtakuna qelqashqanta cumplir Jesústa wanutsipäkurqan. 28Jutsaynaq kaykaptinpis payta wanutsinanpaqmi Pilatuta manakärirqan.#Mat. 27.22-23; Mar. 15.13-14; Luc. 23.21-23. 29Profëtakuna qelqashqannölami lapanpis pasarqan. Wanurkuptinnami cruzpita jorqurir pampapäkurqan.#Mat. 27.57-61; Mar. 15.42-47; Luc. 23.50-56; Juan 19.38-42. 30Wanutsipäkuptinpis Tayta Diosmi kawaritsimushqa. 31Kawarirkamurmi Galileapita Jerusalénman#Hech. 1.3. paywan aywaq discïpulunkunata atska kuti yuriparqan. Paykunami Jesúspita kanan wilakurkaykan.

32<<Tsaynölami noqakunapis Tayta Diospa wilakuyninta qamkunata wilaparkaykä. Unay ayluntsikunata promitishqantami 33Tayta Dios cumplishqa. Tsayno cumplirqan Jesucristuta kawaritsimurmi. Ishkay kaq salmuchöpis Jesucristupita kaynömi qelqaraykan:

<< <Qamqa tsurïmi kanki.

Kanan junaqpitaqa taytaykinami kaykä>.#Sal. 2.7.

34Jesucristo kawarimur imaypis manana wanunanpaq kashqantaqa Tayta Dios kaynömi niykan:

<Davidta promitishqä santu bendicionkunata qamtami qoykushayki.

Tsay promitishqäta imayyaqpis cumplishaqmi>.#Isa. 55.3.

35Mas juk salmuchöpis kaynömi qelqaraykan:

<Santu sirviqniki kaptïmi sepultüracho ayä ismunantapis mana munankipaqtsu>.#Sal. 16.10.

36<<Manami kikinpaqtsu David tsayno qelqarqan. Davidqa Tayta Dios munashqanta cumplirkur wanuptinmi unay aylunkuna pamparashqancho paypapis ayan ushakarqan. 37Jesústami itsanqa Tayta Dios kawaritsimushqa. Paypa ayanqa sepultüracho manami ismur ushakashqatsu.

38<<Wawqikuna, nishqäta shumaq tantiyakäriy. Jesucristo kayninpami jutsantsikunata Tayta Dios perdonamantsi. 39Lapantapis payman yärakuq kaqtaqa jutsaynaqtanami Tayta Dios chaskin. Moisés qelqashqan leykunata cumplishqanpitaqa manami pipis salvakuntsu. 40Cuidädu profëtakuna qelqashqancho nishqanno qamkunatapis pasashunkiman. 41Paykuna qelqashqanqa kaynömi niykan:

<< <Mana cäsukamaqkuna, pasaypa mantsakäriy.

Pasaypa mantsakuypaq kaqkunata ruranäpaqnami kaykä.

Imano ruranäpaq kashqanta wilapäshuptikipis manami criyipäkunkipaqtsu> >>.#Hab. 1.5.

42Sinagögapita Pablo y Bernabé yarquptinmi [mana Israel runakuna] ruwapäkurqan jukaq jamay junaqpis yapay yachatsinanpaq. 43Pabluwan y Bernabéwanmi Israel runakuna y Diosta cäsukuq mana Israel runakunapis atskaq aywapäkurqan. Paykunatami Pablo shakyätsirqan kuyapäkuq Tayta Diosman imaypis yärakärinanpaq.

Mana Israel runakunatana yachatsishqan

44Jukaq jamay junaqnami tsay markacho cäsi lapan runakuna Diospa wilakuyninta mayayta munar sinagögaman juntakarqan. 45Tsaytsika runakunata rikaykurmi wakin Israel runakuna chikishpan Pablo parlashqanta manakaqman churapäkurqan.

46Tsawraqa Pablo y Bernabé mana mantsakuypa kayno nirqan: <<Israel runakuna kaptikimi Tayta Diospa wilakuyninta qamkunata puntata wilapashqä. Tsayno wilapaptïpis mana ushakaq kawayta chaskikuyta manami munapäkunkitsu. Mana chaskikäriptikimi mana Israel runakunatana wilapäshaq. 47Paykunata wilapänantsipaqmi Tayta Dios kayno nishqa:

<< <Maytsay nacionkunapaqpis atski kanaykipaqmi churashqä.

Tsaynöpami maytsaychöpis runakuna salvakärinqa> >>.#Isa. 49.6.

48Tsayno parlashqanta mayaykurmi mana Israel runakuna kushikur Tayta Diosta alabapäkurqan. Tsaynöpami mana ushakaq kawayta tarinanpaq Tayta Dios akrashqankuna lapanpis Jesucristuman yärakärirqan.

49Tsawraqa Tayta Diospa wilakuyninta Pablo y Bernabé markan markan wilakärirqan. 50Tsayno wilakäriptinmi Tayta Diosta cäsukuq reqishqa warmikunata y respitashqa runakunata Israel runakuna shimita qorqan Pablupa y Bernabépa contran sharkapäkunanpaq. Contran sharkur tsay markakunapita qarquptinmi 51chakinpita polvuta tapshiriykur#Mat. 10.14; Mar. 6.11; Luc. 9.5; 10.11. Iconio markapana aywakärirqan. 52Jesucristupa discïpulunkunaqa#13.52 Discïpulukunapaq parlarqa Jesucristuta chaskikuqkunapaqmi parlaykan. Espíritu Santupa munaynincho kashpanmi kushishqa kawapäkurqan.

Currently Selected:

Hechos 13: qvmB

Highlight

Copy

Compare