Hechos 11

Mana Israel runakunapis Jesústa chaskikushqanta Pedro wilashqan

1Mana Israel runakunapis Tayta Diospa wilakuyninta chaskikärishqantami apostolkuna y Judea provinciacho wawqi panikunapis mayapäkurqan. 2Tsaymi Jerusalénman Pedro kutiykuptin señalashqa kaq wakin wawqikuna jamurpar 3kayno nipäkurqan: <<¡Imanirtaq mana Israel runakunapa wayinman yaykur paykunawan mikushqanki!>>

4Tsayno niptinmi Pedruqa ima pasashqantapis wilapar kayno nirqan: 5<<Jope markacho Tayta Diosta manakuykashqächömi revelacioncho rikarqä jana patsapita chuskun puntanpa watashqa jatunkaray jaku niraq uraykämuqta. 6Tsaycho shumaq tantiyaykunäpaqmi kaykarqan tukuy casta ashmana kaq y mana ashmana kaq uywakuna, lashtaypa puriqkuna y päriqkunapis. 7Tsayta rikaraykaptïmi jana patsapita kayno nimurqan: <Pedro, tsaykunata pishtarkur mikuy>.

8<<Tsayno nimaptinmi kayno nirqä: <Manami tsaykunata mikümantsu, Tayta. Impüru uywakunataqa manami imaypis mikushqätsu>.

9<<Tsawraqa jana patsapita yapay kayno nimurqan: <Mikunaykipaq püru kashqanta Tayta Dios niykäshuptikiqa impüru kashqanta ama niytsu>. 10Tsay revelacionta kimsa kuti rikarkatsimarmi jakuta jana patsapa kutitsikurqan.

11<<Tsay hörami Cesarea markapita kachamushqan kimsa runakuna ashimashpan patsaraykashqä wayiman chayapäkamurqan. 12Tsawraqa Espíritu Santu nimarqan mana mantsakuypa paykunawan aywanäpaq. Tsayno nimaptinmi kay soqta wawqikunawan aywar qayatsimaq runapa wayinman yaykurqä. 13Tsaychömi wilamarqan wayincho juk ángel yuriparkur kayno nishqanta: <Simón jutiyuq runata pushamunanpaq Jope markaman kachakuy. Paypa jukaq jutinmi kaykan Pedro. 14Paymi tantiyatsishunki qam y wayikicho taqkuna imanöpa salvakärinaykipaqpis>.

15<<Tsaycho wilapayta qalaykuykaptïmi noqantsiman chayamushqannöla paykunamanpis Espíritu Santu chayashqa. 16Tsaychömi yarparkurqä Señornintsi kayno nishqanta: <Juanqa yakulawanmi bautizarqan. Qamkunami itsanqa Espíritu Santuwan bautizashqa kankipaq>.#Hech. 1.5. 17Señor Jesucristuman yärakuptintsi Espíritu Santuta qaramashqantsinömi#11.17 Wakin runakunaqa regalamashqantsinömi nipäkun. paykunatapis Tayta Dios qarashqa. Tsayno kaykaptinqa ¡noqa pitaq kä Tayta Diosta michänäpaq!>>

18Tsawraqa Pedruta jamurpänanpa trukanqa kushikärishpanmi kayno nipäkurqan: <<¡Mana Israel runakunatapis Tayta Dios tantiyaykätsinmi jutsa ruraykunata kacharir mana ushakaq kawayta taripäkunanpaq!>>

Antioquíacho Jesucristuta runakuna chaskikushqan

19Estebanta wanuykatsiptin Jerusalénpita qeshpikuqkunami Feniciaman, Chipriman y Antioquíaman#Hech. 8.1-4. chayaykur Israel mayinkunalata ali wilakuyta wilaparqan. Mana Israel runakunataqa manami pitapis wilaparqantsu. 20Chipripita y Cirenipita kaq wakin wawqikunami itsanqa Antioquíaman chayaykur mana Israel runakunatapis Señor Jesucristupa ali wilakuyninta wilaparqan. 21Tsayno wilakunanpaq Tayta Dios yanapaptinmi tsaytsika runakuna Jesucristuta chaskikärirqan.

22Tsayta mayashpanmi Jerusaléncho kaykaq wawqi panikuna Bernabéta Antioquíaman kacharqan. 23Tsaycho mana Israel runakunatapis Tayta Dios kuyapashqanta rikarmi Bernabé pasaypa kushikurqan. Tsawraqa paykunata shakyätsirqan shumaq cäsukur Tayta Diosman imaypis yärakärinanpaq. 24Bernabéqa ali runami karqan. Tsaynöpis Tayta Diosman yärakur Espíritu Santupa munayninchömi imaypis kawaq. Tsaycho yachatsiptinmi tsaytsika runakuna Señor Jesucristuta chaskikärirqan.

25Tsaypitanami Bernabéqa Tarso markaman aywarqan Saulo ashiq. 26Tariykurnami Antioquíaman kutipäkushpan wawqi panikunawan Sauluwan Bernabé juk wata juntakarqan. Tsaychömi atska runakunata yachatsipäkurqan. Antioquíachöraqmi Jesúspa discïpulunkunata#11.26 Discïpulukunapaq parlarqa Jesucristuta chaskikuqkunapaqmi parlaykan. cristiänu niyta qalaykurqan.

27Tsay witsanmi Jerusalénpita Antioquíaman profëtakuna aywapäkurqan. 28Tsaychömi Espíritu Santu tantiyatsiptin profëta Agabo#Hech. 21.10. wilakurqan maytsaychöpis pasaypa muchuy kananpaq kashqanta. Wilakushqannölami muchuy karqan Romacho Claudio César mas mandaq kashqan witsan. 29Muchuy kananpaq wilakuptinmi discïpulukuna wilanakurqan imatapis kashqanpita shuntarkur Judeacho kaq wawqi panikunaman apatsinanpaq. 30Wilanakushqanno shuntarkurmi Bernabéta y Sauluta kacharqan Judeacho kaq mayor wawqikunaman apananpaq.

Currently Selected:

Hechos 11: qvmB

Highlight

Copy

Compare