1 Samuel 28

1Tsay witsanmi filisteo runakuna juntakaykur aywapäkurqan Israel runakunata atacananpaq. Tsawraqa rey Aquis Davidta kayno nirqan: <<Qam y qamwan kaykaq runakunapis guërraman aywaykäshilämay>>.

2Tsayno niptinmi David kayno nirqan: <<Aywashun yanapanäpaq, tayta. Kananmi rikamanki imano pelyashqätapis>>.

Tsawraqa Aquis kayno nirqan: <<Tsayno kaptinqa noqata rikamänaykipaqmi churashayki>>.

Endor markacho taq brüjaman rikatsikuq Saúl aywashqan

3Tsay witsanqa Samuel wanushqanami karqan. Israel runakuna lüturmi markan Ramácho pampapäkurqan.#1Sam. 25.1. Tsaynöpis wanushkunapa almanwan parlaqkunata y brüjukunatapis Israel nacionpita rey Saúl qarqushqami karqan.#Lev. 20.27; Deut. 18.10-11.

4Israel runakunawan pelyananpaqmi filisteo runakuna campamentuta rurapäkurqan Sunem markacho. Saúlnami Israel runakunawan campamentuta rurapäkurqan Gilboa jirkacho. 5Filisteo soldädukuna juntakashqa kaykaqta rikaykurmi Saúl pasaypa mantsakäkurqan. 6Tsawraqa imata rurananpaqpis Tayta Diosta manakurqan. Manakuptinpis Tayta Dios manami imatapis nirqantsu ni sueñuyninchöpis, ni Urim rumiwanpis ni profëtakunawanpis. 7Tsaymi yanapaqninkunata Saúl kayno nirqan: <<Ayway ashipäkamuy rikakuq warmita rikatsikuq aywanäpaq>>.

Tsayno niptinmi kayno nipäkurqan: <<Endor markachömi rikakuq warmi kaykan>>.

8Tsawraqa Saúl juk röpata jatikurkur ishkay yanapaqninkunawan tsakaypa aywarqan tsay warmi kaqman. Chayaykurmi kayno ruwakurqan: <<Imano kanäpaq kashqantapis musyanäpaq wanushqa runapa almanta yuritsipaykalämay, mamïta>>.

9Tsayno niptin warmi kayno nirqan: <<Qam musyankimi rey Saúl kay nacionpita lapan brüjukunata y wanushkunapa almanwan parlaqkunata qarqushqanta. Tsayno kaykaptinqa ¿imanirtaq wanushqa runapa almanta qayamunäta munaykanki? Tsayta manakamarqa noqatapis wanuymanchaq jitarpamanki>>.

10Tsayno niptinmi Saúl kayno nirqan: <<Tayta Diospa jutinchömi qamta promitï imapis mana pasashunaykipaq>>.

11Tsawraqa warmi kayno nirqan: <<¿Pipa almanta yuritsimunätataq munaykanki?>>

Tsaymi kayno nirqan: <<Samuelpa almanta yuritsimunaykitami munaykä>>.

12Tsawraqa Samuelpa almanta rikaykur warmi qapachakurqan kayno nir: <<¡Qamqa rey Saúlchaq kaykanki! ¡Imanirtaq lulapämashqanki, tayta!>>

13Tsaynami rey Saúl kayno nirqan: <<Ama mantsakuytsu. ¿Imatataq rikaykanki?>>

Tsawraqa warmi nirqan: <<Patsa rurinpita alma sharkaykämuqtami rikaykä>>.

14Tsawraqa Saúl tapurqan: <<¿Pï niraqtaq tsay sharkaykämuq kaykan?>>

Niptinmi nirqan: <<Tünican jatishqa awkin runami sharkaykämun>>.

Samuel sharkaykämushqanta tantiyarmi Saúl qonqurpakuykurqan urkunpis pampaman töpashqanyaq.

15Yuriparkurmi Samuel kayno nirqan Saúlta: <<¿Imapaqtaq rabyanätsimar kayman qayatsimashqanki?>>

Tsayno niptin Saúl kayno nirqan: <<Filisteo runakuna conträ pelyananpaq shamuptinmi pasaypa lakikuykä. Tayta Diospis manakuptï manami imatapis nimantsu. Sueñuynïchöpis ni profëtakunapis manami imatapis nimantsu. Tsaymi qamta qayatsimushqä imata ruranäpaq kaqtapis tantiyatsimänaykipaq, tayta>>.

16Tsawraqa Samuel kayno nirqan: <<Tayta Dios qampa contrayki kaykaptinqa ¿imapaqnataq imatapis tapukamanki? 17Tayta Dios nimashqanta wilashqänölami lapanpis pasaykäshunki. Tsaymi rey kaykashqaykipita jorqushushpayki Davidtana churashqa Israel runakunapa mandaqnin rey kananpaq.#1Sam. 15.27-29. 18Tsayno jorqushushqanki <amalecita runakunata ushakätsiy> nishuptikipis mana ushakätsishqaykipitami.#1Sam. 15.3-9. 19Tsaymi Israel soldädukunata filisteo runakunapa makinman Tayta Dios entreganqapaq. Tsaycho qamtapis y tsurikikunatapis wanutsishuptikimi wara junaq noqa kashqä kaqman chayamunkipaq>>.

20Tsayno niptinmi Saúl pasaypa mantsakar pampaman tunikurqan. Juk junaq y juk tsakay imatapis mana mikushqa karmi pasaypa almatakashqa karqan. 21Pasaypa mantsakashqa kaykaqta rikarmi tsay warmi witiykur kayno nirqan: <<Wanunäpaq kashqanta mantsakuykarpis ruwakamaptikimi Samuelpa almanta yuritsimushqä, tayta. 22Ashmayniki kaykaptïqa kanan nishqäta mayaykalämay. Kawarirkunaykipaq mikurkulay. Nirkurnami pasakunkipaq>>.

23Tsayno niptinpis Saúl manami mikuyta munarqantsu. Yanapaqninkuna y tsay warmi yaparir yaparir ruwaptinraqmi pampapita sharkurkur bancuman jamakurqan. 24Tsaymi tsay warmi yarqurir werannin turitunta pishtarir levadüraynaq tantatapis masararqan. 25Nirkurmi Saúlman y yanapaqninkunaman tsay yanukushqan mikuyta apaparqan mikunanpaq. Tsayta mikurkurnami tsay tsakay aywakärirqan.

Currently Selected:

1 Samuel 28: qvmB

Highlight

Copy

Compare