1 Samuel 29

Filisteo runakuna Davidman mana yärakärishqan

1Tsaypitana lapan filisteo soldädukuna juntakarqan Afecman. Israel runakunanami juntakarqan Jezreelcho kaykaq pukyu nawpanman. 2Filisteo runakunami waranqa waranqa (1,000) soldädukunawan y pachak pachak (100) soldädukunawan punta punta Afecman aywapäkurqan. Paykunapa qepantami Davidpis y yanapaqninkunapis rey Aquiswan aywapäkurqan. 3Tsaymi filisteo runakunapa mandaqninkunaqa Aquista kayno nipäkurqan: <<Kay hebreo runakunaqa ¿imanirtaq noqantsiwan aywarkaykan?>>

Tsayno niptinmi Aquis kayno nirqan: <<Payqa Davidmi, Israel runakunapa mandaqnin rey Saúlpa soldädunkunapa capitanninmi. Juk ishkay watanami payqa noqawan juntu kaykan. Chayamushqanpita patsa manami imatapis lutanta rurashqatsu>>.

4Tsawraqa filisteo runakunapa mandaqninkuna pasaypa rabyashpan Aquista kayno nipäkurqan: <<Tsay runaqa rikatsishqayki markaman jukla kutikutsun. Noqantsiwan aywarqa guërracho kaykaptintsipis contrantsi sharkunmanchari. Payqa rey Saúlwan amistayta munar wanurkatsimashpantsi umantsitapis roqurir apapanqachari. 5Tsay runapaq ¿manaku cantapäkurqan kayno nir: <Saúlmi wanutsirqan waranqa (1,000) runakunata y Davidnami wanutsirqan chunka waranqa (10,000) runakunata>?>>#1Sam. 18.7; 21.11.

6Tsayno niptinmi Davidta qayaykur Aquis kayno nirqan: <<Noqa musyämi ali runa kashqaykita. Tayta Diospis tsayta musyanmi. Tsaynöpis shamushqaykipita patsami ali runa kashqaykita rikashqä. Tsaymi munashqä guërracho yanapamänaykipaq. Tsayno kaptinpis filisteo rey mayïkunaqa manami qamman yärakuntsu. 7Tsayno kaykaptinqa mana rabyanaylapa kutikuy rikatsishqä markaman>>.

8Tsayno niptinmi David kayno nirqan: <<Qammi mandamaqnï rey kaykanki, tayta. ¿Imanirtaq michämanki contrayki runakunawan pelyaq mana aywanäpaq? Makikiman shamushqäpita patsa ¿imatataq mana alita rurashqä?>>

9Tsawraqa Aquis kayno nirqan: <<Noqa musyämi Tayta Diospa angilninno ali runa kashqaykita. Tsayno kaykaptikipis filisteo rey mayïkuna manami munantsu noqakunawan guërraman aywanaykita. 10Tsayno nirkaykaptinqa wara tuta tsaka tsakala yanapashuqniki runakunawan kutikäriy>>.

11Tsayno niptinmi yanapaqnin runakunawan waraynin#29.11 Wakin runakunaqa warantin nipäkun. tuta David kutikärirqan rikatsishqan markaman. Filisteo runakunanami Jezreelman aywapäkurqan Israel runakunawan pelyapäkunanpaq.

Currently Selected:

1 Samuel 29: qvmB

Highlight

Copy

Compare