1 Samuel 12
12
Israel runakunata Samuel yätsishqan
1Tsaypitanami lapan Israel runakunata Samuel kayno nirqan: <<Qamkuna munapäkushqaykinömi mandaqniki reyta churapashqä. 2Kananpitaqa paymi mandaqniki rey kanqa. Noqaqa mözu kashqäpita patsami qamkunata yanapashqä. Kananqa soquyashqa awkinnami kaykä. Tsurïkunapis qamkunawanmi kaykan. 3Pipa töruntapis o bürruntapis duëñu tukushqa kaptïqa Tayta Diospa y akrashqan reypa nawpancho careamätsun. Tsaynöpis careamätsun pitapis nakatsishqa o maqashqa kaptïqa o pipa favorninpis sharkunäpaq sobornuta chaskipakushqa kaptïqa. Mayqanikipapis jaqayki karqa pägaläshaykimi>>.
4Tsawraqa paykuna kayno nipäkurqan: <<Manami imaypis suwapämashqankitsu, lulapämashqankitsu ni sobornuta chaskipakushqankitsu>>.
5Tsawraqa Samuel kayno nirqan: <<Tayta Diospis y akrashqan reypis rikaykanmi jutsaynaq kashqäta>>.
Tsayno niptinmi runakuna kayno nipäkurqan: <<Rasun kaqtami niykanki>>.
6Tsawraqa Samuel kayno nirqan: <<Tsaytaqa Tayta Diospis musyanmi. Paymi Moisésta y Aarónta kacharqan Egiptupita unay ayluntsikunata jorqamunanpaq.#Éxo. 6.26. 7Tsaynölami kananyaqpis Tayta Dios salvaykämantsi. Tsayno kaptinmi yanapamashqantsita paypa nawpancho yarpätsishayki. Yarpätsiptï shumaq mayapäkamay.
8<<Jacobpita miraq unay ayluntsikuna Egiptucho nakar Tayta Diosta manakuptinmi#Éxo. 2.23. Moisésta y Aarónta kacharqan paykunata jorqamunanpaq. Jorqarkamurnami kay tashqantsi kaqcho tänanpaq churarqan. 9Tsayno churaykaptinpis paykunaqa Tayta Diosta manami wiyakärirqantsu. Tsaymi Tayta Diospis paykunata mana yanaparqantsu Hazor marka soldädukunapa capitannin Sísara#Jue. 4.2. atacar munayninman churaptinpis. Tsaynölami filisteo runakuna y moabita#Jue. 3.12. runakunapis atacar munayninman churaptin mana yanaparqannatsu.
10<<Tsaypitana Israel runakuna Tayta Diosta manakur kayno nipäkurqan: <Baal y Astarot ïdulukunata adorashqäpita perdonaykalämay, Tayta. Chikimaqnïkunapa munayninpita jorqamaptikiqa japalaykitami sirvipäkushayki>.#Jue. 10.10-15. 11Tsayno manakäriptinmi Tayta Dios churarqan Jerobaalta,#Jue. 7.1. Baracta#Jue. 4.6. y Jeftéta#Jue. 11.29. chikiqninkunapita salvananpaq. Tsaynölami noqatapis churamarqan qamkunata salvanäpaq.#1Sam. 3.20. Tsaynöpami Tayta Dios yanapashushqanki ali kawapäkunaykipaq.
12<<Tsaypitanami amonita runakunapa mandaqnin rey Nahas qamkunawan pelyaq shamurqan. Tsaymi kikin Tayta Dios qamkunapa mandaqniki rey kaykaptinpis manakamarqayki juk reyta churapänäpaq.#1Sam. 8.19. 13Tsay reyqa noqantsiwanmi kaycho kaykan. Manakamashqaykinölami Tayta Dios churapäshushqanki.
14<<Tsawraqa Tayta Diosta mantsakäriy, paylata sirvipäkuy y nishushqaykita wiyakäriy. Paypa wilakuyninta manakaqman ama churapäkuytsu. Mandaqniki reypis tsaynöla Tayta Diosnintsita wiyakur kawatsun. Tsaynöpami ali kawapäkunkipaq. 15Tayta Diosta mana cäsukur lutankunata rurapäkuptikimi itsanqa qamkunata y mandaqniki reytapis mana kuyapaypa castigashunkipaq.
16<<Kaypita mayqaykipis ama aywakäriytsu. Kanan rikapäkunaykipaqmi Tayta Dios milagruta ruranqa. 17Usya killa kaykaptinpis tamyatsimunanpaq y räyutsimunanpaqmi Tayta Diosta manakushaq. Manakushqäno tamyamuptin y räyumuptinmi musyapäkunkipaq reyta manakushpayki Tayta Diosta rabyanätsishqaykita>>.
18Tsayno nirkur Tayta Diosta Samuel manakuptinmi jinan höra tamyamurqan y räyumurqan. Samuel manakushqannöla tamyamuptin y räyumuptinmi lapan runakuna Tayta Diosta y Samuelta pasaypa mantsakärirqan. 19Tsaymi Samuelta kayno nipäkurqan: <<Noqakunaqa rey kananpaq manakushpämi jutsata rurapäkushqä, tayta. Tsayno manakärishqäpita mana wanutsimänanpaq Tayta Diosta manakuykulay>>.
20Tsayno niptin Samuel kayno nirqan: <<Rasunpami qamkuna jutsayuq karkaykanki. Tsayno karpis ama mantsakäriytsu. Tsaypa trukanqa lapan shonquykiwan Tayta Dios munashqanno imaypis kawapäkuy. 21Tsaynöpis ïdulukunata ama adorapäkunkitsu. Tsaykunaqa imapaqpis mana väliq karmi mana yanapashunkitsu ni salvashunkitsu. 22Ama yarpapäkuytsu rey kananpaq manakärishqaykipita Tayta Dios manana yanapashunaykipaq kashqanta. Paymi qamkunata promitishushqanki makincho tsararäshunaykipaq. Tsay promitishqanta cumplirmi imaypis yanapashunkipaq.
23<<Tsaymi imaypis qamkunapaq Tayta Diosta manapakushaq. Qamkunapaq mana manakurqa jutsayuqmi kashaqpaq. Tsaynöpis pay munashqanno kawapäkunaykipaqmi imaypis yätsiykäshayki. 24Tayta Diosta mantsakur lapan shonquykiwan pay munashqanno imaypis kawapäkuy. Ama qonqapäkuytsu lapanchöpis ali kawanaykipaq yanapaykäshushqaykita. 25Tayta Diosta mana wiyakur jutsata rurapäkuptikimi itsanqa qamkunata y mandaqniki reytapis ushakätsishunkipaq>>.
Currently Selected:
1 Samuel 12: qvmB
Highlight
Copy
Compare
Share
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
