1 Samuel 11

Amonita runakunata Saúl vincishqan

1Amonita runakunapa mandaqnin rey Nahasmi soldädunkunata shuntarkur Galaad particho kaykaq Jabes markaman aywarqan Israel runakunata atacananpaq. Tsayman chayaykuptinmi Jabes runakuna kayno nipäkurqan: <<Atacamänaykipa trukanqa pactuta rurashun munaynikicho kawapäkunäpaq>>.

2Tsaymi rey Nahas kayno nirqan: <<Qamkunawanqa pactuta rurashaq lapanikipa alawqa kaq nawikita jorqurkurraqmi. Tsaynöpami lapan Israel runakunata manakaqman churashaq>>.

3Tsayno niptinmi Jabes mayor runakuna kayno nipäkurqan: <<Qanchis junaq shuyaykalämay intëru Israel nacionpa nishqaykita wilakatsinäyaq. Tsaycho pipis yanapamänanpaq mana shamuptinqa nishqaykinöchari kanqa>>.

4Tsayno nishqanta Nahas awniptinmi wilakuqninkunata kachapäkurqan. Saúl tashqan Gabaa markaman chayaykur wilaptinmi lakikushpan lapan waqapäkurqan. 5Saúlnami chakrancho arushqanpita törunkuna qatishqa chayarqan. Runakuna waqaykaqta tarirmi kayno tapurqan: <<¿Imanirtaq waqarkaykanki?>> Tsayno tapuptinmi wilapäkurqan Jabes runakuna wilashqanta.

6Wilaptinmi Tayta Diospa Espïritun Saúlta valorta qorqan mana mantsakuypa amonita runakunawan pelyananpaq. Tsaymi pasaypa rabyashpan 7ishkay törukunata pishtarir pedäzu pedäzu kutsurqan. Nirkurmi wilakuqkunawan apatsirqan intëru Israel nación markakunaman. Tsay markakunaman chayaykurmi kayno nipäkurqan: <<Mayqanikipis Saúlta y Samuelta pelyäshiq mana aywaptikiqa töruykitapis kaynömi pedäzu pedäzu kutsunqa>>.

Tsayno nishqanta mayarmi Israel runakuna pasaypa mantsakärishpan pelyäshinanpaq Bezeccho lapan juntakarqan. 8Bezeccho juntakaq runakunata Saúl yupaptinmi kimsa pachak waranqa (300,000) runakuna Israelpita karqan y kimsa chunka waranqa (30,000) runakunanami Judápita karqan.#11.8 Saúl kawashqan witsan Israel nación juklayla kaptinpis ishkay parti kashqantami nipäkurqan. Norti kaq partipa jutinmi karqan Israel y sur kaq partipa jutinmi karqan Judá.

9Nirkurna Jabesman kutipäkunanpaq wilakuq aywaqkunata Saúl kayno nirqan: <<Jabes runakunata wilapäkuy wara manaraq pulan junaq kaptin aywaykamur salvanäpaq kashqanta>>.

Tsaymi wilakuq runakuna kutiykur wilapäkuptin Jabes runakuna pasaypa kushikärirqan.

10Tsaypitanami amonita runakunapa mandaqnin rey Nahasta kayno nipäkurqan: <<Wara junaqmi shapäkamushaq nawïta jorqunaykipaq>>.

11Tsaymi waraynin#11.11 Wakin runakunaqa warantin nipäkun. junaq soldädunkunata Saúl rakirqan kimsa puntaman. Patsa manaraq waraptinmi tsay kimsa punta soldädukuna amonita runakunaman elaqpita yaykuykur wanutsipäkurqan pulan junaqyaq. Mana wanutsishqan kaq amonita runakunami wakpa kaypa matsiypa matsir qeshpipäkurqan.

12Tsayno vincirkurmi Israel runakuna Samuelta kayno nipäkurqan: <<¿Pitaq mana criyirqantsu Saúl mandamaqnintsi rey kananpaq kashqanta? Tsay runakuna pï kashqantapis wilamay wanutsipäkunäpaq>>.

13Tsayno niptin Saúl kayno nirqan: <<Kanan junaq Tayta Dios Israel runakunata salvaykaptinqa manami pipis wanunqatsu>>.

14Tsawraqa lapan runakunata Samuel kayno nirqan: <<Gilgal markaman aku aywashun rey kayta Saúl qalaykunanpaq>>.

15Tsayno niptinmi lapan runakuna Gilgalman aywapäkurqan. Jawka kawakuy sacrificiuta rupatsishpanmi Tayta Diospa nawpancho Saúlta churarqan rey kananpaq. Tsaymi fiestata rurashpan lapanpis kushikärirqan.

Currently Selected:

1 Samuel 11: qvmB

Highlight

Copy

Compare