1 Reyes 12

Israel nación ishkayman rakikashqan

2 Crónicas 10.1—11.4

1Roboamta rey kananpaq churananpaqmi lapan Israel runakuna Siquem markaman juntakarqan. Tsaymanmi Roboampis aywarqan. 2Tsayman juntakänanpaq kashqanta mayaykurmi Nabatpa tsurin Jeroboam Egiptupita kutimurqan. Payqa Salomónpita qeshpir aywakushqanpita patsami Egiptucho tarqan.#1Rey. 11.26-40. 3Tsaymi Israel runakuna qayatsiptin Israelman Jeroboam kutimurqan. Nirkurmi Israel runakunawan aywaykur Roboamta kayno nipäkurqan: 4<<Papänikiqa aläpami impuestukunata cobrapäkamashqa y faynakunachöpis roqu bürrutanömi arutsipäkamashqa. Paynöqa amana cobrapäkamaynatsu. Tsaynöla faynakunachöpis aläpa amana arutsipäkamaynatsu. Manakushqäta awnimaptikiqa sirvipäkushaykimi>>.

5Tsayno niptinmi Roboam kayno nirqan: <<Manakamashqaykita shumaq yarpachakunäyaq kimsa junaq shuyaykamay. Nirkur kutipäkamunki imata yarpashqätapis wilanäpaq>>.

Tsayno niptinmi aywakärirqan.

6Nirkurnami taytanpa yätsikuqnin mayor runakunawan Roboam juntakaykur kayno tapukurqan: <<¿Imatataq tsay runakunata nïman?>>

7Tsayno tapukuptinmi kayno nipäkurqan: <<Tsay runakunata shumaq yanapaptiki y ali shimilaykipa parlapaptikiqa imayyaqpis sirvipäkushunkimi>>.

8Mayor runakuna yätsishqanta chaskikunanpa trukanqa Roboam aywarqan winay mayinkunata tapukuqmi. Paykunaqa Roboampa yätsiqninkunami karqan. 9Paykunatapis Roboam tapurqan kayno nirmi: <<Tsay runakunami ruwakamashqa impuestuta papänï aläpa cobrashqanno manana cobranäpaq. Tsaynölami ruwakamashqa faynakunachöpis aläpa mana arutsinäpaq. ¿Imatataq tsay runakunata nïman?>>

10Tsaymi winay mayin mözukuna kayno nipäkurqan: <<Papäniki aläpa impuestukunata cobrashqanta y aläpa arutsishqanta nishuptiki tsay runakunata kayno ninki: <Papänï fiyu kashqanpitapis noqaqa mas fiyumi kashaq. 11Pay nakatsishushqaykipitapis noqaqa mas peorraqmi nakatsishaykipaq. Papänïqa läzulawanmi astashushqanki. Noqaqa fiërru puntayuq chicötiwanraqmi astashaykipaq> >>.

12Tsaypita jitapashqan junaqnami Jeroboamwan lapan Israel runakuna kutipäkurqan Roboam imata nishqantapis musyapäkunanpaq. 13Kutiykuptinmi rey Roboamqa imatapis mana nirqantsu mayor runakuna yätsishqannöqa, sinöqa toscu shiminpami parlaparqan. 14Tsaymi mözukuna yätsishqannöla kayno nirqan: <<Papänï nakatsishushqaykipitapis noqaqa mas peorraqmi nakatsishayki. Papänïqa läzulawanmi astashushqanki. Noqaqa fiërru puntayuq lätiguwanmi astashaykipaq>>.

15Tsayno nirmi runakuna ruwakushqanta mana awnirqantsu. Mana awninanpaqqa Tayta Diosmi kamakätsirqan Nabatpa tsurin Jeroboamta promitishqanta cumplishpan. Jeroboamta promitishqanta musyatsirqan Silo markapita kaq profëta Ahíaswanmi.#1Rey. 11.29-39. 16Ruwakärishqanta Roboam mana awniptinmi Israel runakuna kayno nipäkurqan:

<<¿Davidpitaku kawantsi imami paypita miraqta aläpa sirvinantsipaqqa?

Ultimu höraqa manami David aylutsu kantsi paypa tsurinta qatiräkunantsipaqqa.

Payqa kikinpa aylunkunata mandatsun.

Israel kaqkunaqa, lapantsi wayintsipa kutikärishun>>.#2Sam. 20.1.

Tsayno nirmi Israel runakuna wayinpa kutikärirqan. 17Paykuna rakikaptinpis Judá markakunacho taykaq Israel runakunaqa manami Roboamta kachaykurqantsu.

18Tsaypitanami capataznin Adoramta Roboam kacharqan rakikaykaq Israel runakunata faynacho arutsinanpaq. Chayaykuptinmi Israel runakuna saqmaypa wanutsirqan. Wanutsishqanta mayaykurmi Roboamqa pasaypa mantsarishpan carrëtanwan qeshpir Jerusalénpa aywakurqan.

19Roboamta kacharishqanpita patsami Israel runakunaqa kananyaqpis David aylu kaqtaqa mana chaskipantsu mandaqnin rey kananpaq.

20Egiptupita Jeroboam kutimushqanta musyaykurmi lapan Israel runakuna qayaykatsir churapäkurqan rey kananpaq. Judá trïbulanami David aylu reypa makincho quëdarqan.

Israel mayinkunawan mana pelyapäkunanpaq Semaías wilakushqan

21Jerusalénman Roboam kutiykurmi rakikaykaq Israel runakunata munayninman shuntananpaq Judá trïbu runakunapita y Benjamín trïbu runakunapita pachak pusaq chunka waranqa (180,000) alinnin soldädukunata shuntarqan. 22Tsaymi profëta Semaíasta Tayta Dios parlaparqan kayno nir: 23<<Salomónpa tsurin Judá nacionpa mandaqnin rey Roboamta, Judá trïbu runakunata, Benjamín trïbu runakunata y wakin runakunatapis wilanki kayno nir: 24<Tayta Diosmi kayno nin: Noqami Israel nacionta rakishqä ishkay nación kananpaq. Tsayno kaptinqa ama aywapäkuytsu Israel mayikikunawan pelyanaykipaq. Tsaypa trukanqa cada ünuyki wayikipa kutikäriy> >>.

Tayta Diospa wilakuqnin tsayno niptinmi wayinpa lapan kutikärirqan.

Qori turitukunata Jeroboam ruratsishqan

25Tsaypitanami Jeroboamqa Efraín jalqakunacho kaykaq Siquem markata altsarkatsir tsayman aywarqan tänanpaq. Nirkurnami altsatsirqan Penuel markatapis. 26Jeroboamqa yarpachakur kayno nirqan: <<Davidpa wilkan Roboamqa Israel runakunata shuntarpis shuntaykunmanchi. 27Tsaynöpis Tayta Diospa templuncho sacrificiukunata rupatsinanpaq Jerusalénman aywar Judá runakunapa mandaqnin rey Roboamwan amistarpis amistaykunmanchi. Tsayno amistarqa paypa munayninman kutir wanutsimanqachari>>.

28Tsayno yarpachakurmi yätsiqninkunawan wilanakurkur Jeroboam ruratsirqan qoripita ishkay turitukunata. Nirkurmi Israel runakunata kayno nirqan: <<Israel runakuna, Jerusaléncho kaykaq templuman aläpanami aywashqanki. Kaychömi kaykan Egiptupita jorqamushuqniki diosnikikunaqa>>.#Éxo. 32.4.

29Nirkurmi tsay turitukunata churarqan jukaqta Bet-elman y jukaqtana Danman. 30Tsay ïdulukunata Israel runakuna adorashqanmi pasaypa jutsa karqan. Karu kaptinpis adorananpaq hasta Danyaqmi aywapäkurqan.

31Tsaynölami maytsaycho kaykaq altarkuna kashqanchöqa wayikunata Jeroboam ruratsirqan. Tsaycho cüra kananpaqmi mana Leví trïbu runakunatapis lutala churarqan. 32Tsaynöpis Jeroboamqa mandarqan Judácho Ramäda fiestata rurashqanno Israel runakuna Bet-elchöpis cada wata fiestata rurapäkunanpaqmi. Tsay fiesta rurayta qalaykäriq pusaq killacho chunka pitsqa junaq kaykaptinmi. Bet-elcho fiesta kaptinmi kikin Jeroboam sacrificiukunata rupatsirqan qoripita rurashqa turitukunata adorar. Tsaynölami runakunata churarqan markakunacho kaykaq altarkunacho cüra kananpaq.

33Tsaymi pusaq kaq killa kaykaptin chunka pitsqa junaqcho Jeroboamqa sacrificiukunata rupatsirqan Bet-elcho kaykaq altarcho. Fiestata rurapäkunanpaq tsay junaqta akrarqan kikinpa yarpaynilanpitami.#Lev. 23.33-34. Tsaynöpis tsay fiestachömi altarman aywarqan inciensuwan qoshtatsinanpaq.

Currently Selected:

1 Reyes 12: qvmB

Highlight

Copy

Compare