1 Reyes 13

Judápita shamuq profëta wilakushqan

1Juk junaqmi profëtata Tayta Dios kacharqan Judápita Bet-elman. Bet-elman chayarmi inciensuta altarcho Jeroboam rupaykätsiqta tarirqan. 2Tsaymi Tayta Dios tantiyatsishqannöla altarta parlapar qayaraypa kayno nirqan: <<¡Altar, altar! Markakunacho kaykaq altarkunapita aywaykamurmi cürakuna qampa janaykicho inciensuwan qoshtatsipäkun. Tsaymi Tayta Dios kayno nin: <Davidpa aylunpita juk wamra Josías jutiyuq yurirmi tsay mana ali cürakunata wanurkatsir janaykicho rupatsinqapaq. Tsaynölami wanushqa kaykaq runakunapa tulunkunatapis janaykicho rupatsinqapaq> >>.#13.2 Jeroboam kawashqanpitaqa Josías mandayta qalaykurqan cäsi kimsa pachak (300) wata pasarkuptinraqmi.#2Rey. 23.15-16.

3Tayta Dios nishqanta wilaparkurmi tsay profëta kayno nirqan: <<Wilakunäpaq Tayta Dios kachamashqanta musyanaykipaqmi kanan junaq rikankipaq kay altar pakiptin uchpanpis pampaman mashtakashqanta>>.

4Bet-elcho kaykaq altarpa contran profëta tsayno parlaptinmi rey Jeroboamqa makinta joqarkur kayno nirqan: <<¡Tsay runata prësu tsaripäkamuy!>>

Tsayno niptin rikran jukla chukrukäkuptinmi kuyutsiyta mana kamäpakurqantsu. 5Tsaynöpis tsay hörami altar pakiptin janancho kaykaq uchpapis mashtakarqan. Tsaykuna pasarqan Tayta Diospa profëtan nishqannölami.

6Tsaymi rey Jeroboamqa profëtata ruwakur kayno nirqan: <<Tayta Diosta manakuykulay rikrä aliyänanpaq>>.

Tsayno ruwakuptinmi profëtaqa Tayta Diosta manakurqan aliyätsinanpaq. Profëta manakushqannölami Jeroboampa rikran aliyarqan.

7Aliyarkurmi rey Jeroboam profëtata kayno nirqan: <<Wayïman aywaykuläshun mikunantsipaq. Tsaynöpis regälutami qarashayki#13.7 Wakin runakunaqa regalashayki nipäkun.>>.

8Tsayno niptinmi profëta kayno nirqan: <<Palaciuykicho kaykaqta pulanpa rakipämaptikipis manami aywashaqtsu. Kaychöqa mikuytapis manami mikushaqtsu ni yakutapis upushaqtsu. 9Kayman kachamarmi Tayta Dios kayno nimashqa: <Tsaychöqa mikuytapis ama mikunkitsu, yakutapis ama upunkitsu ni aywashqayki nänipapis ama kutimunkitsu> >>.

10Tsayno nirkushpanmi profëtaqa Bet-elpita yarqur juk nänipana kutikurqan.

11Tsay witsanmi Bet-elcho taykarqan juk awkin profëta. Paytami tsurinkuna wayinman kutiykur wilaparqan Judápita shamuq profëta rey Jeroboamta imata nishqantapis. 12Tsayno wilapaptinmi awkin profëta kayno tapurqan: <<¿Mayqan nänipataq kutikushqa?>>

Tsayno niptinmi tsurinkuna rikatsirqan mayqan nänipa kutikushqantapis. 13Tsaypitanami awkin kayno nirqan: <<Bürruta karunapaykalämay>>.

Tsaymi tsurinkuna karunaparkuptin bürruta muntakurkur aywarqan.

14Profëtapa qepanta aywarmi tariparqan encina yöra sikincho jamaraykaqta. Tsaymi payta kayno nirqan: <<¿Qamku kaykanki Judápita shamuq profëta?>>

Tsayno tapuptinmi kayno nirqan: <<Aw, noqalämi kaykä, tayta>>.

15Tsayno niptinmi awkin profëta kayno nirqan: <<Wayïman aku aywashun, tayta, imalatapis mikunantsipaq>>.

16Tsayno niptinmi kayno nirqan: <<Qamwanpis manami wayikiman mikuq ni yakuta upuq aywashaqtsu. 17Kay particho imatapis mana mikunäpaq ni yakutapis mana upunäpaq ni shamushqä nänipa mana kutinäpaqmi Tayta Dios nimashqa>>.

18Tsawraqa awkin profëta lulakur kayno nirqan: <<Noqapis qamno profëtami kaykä. Tayta Diospa angilninmi yuriparkamar nimashqa wayïman pushaykur mikuyta qaranäpaq yakuta upunaykipaq>>.

19Tsaymi Judápita shamuq profëta paypa wayinman aywaykur mikurqan y yakutapis upurqan.

20Mësacho jamarpaykaptin awkin profëtata Tayta Dios tantiyatsiptinmi 21Judápita shamuq profëtata kayno nirqan: <<Tayta Dios kaynömi nin: <Qamqa manami cäsukamashqankitsu Bet-elcho mana mikunaykipaq ni yakutapis mana upunaykipaq nishqäta>. 22Tayta Dios nishushqaykita mana cäsukur kayman kutiykamur mikuyta mikushqaykipita y yakuta upushqaykipitami ayluykikuna pamparashqanchöqa mana pampakunkipaqtsu>>.

23Mikuyta mikurkuptin y yakuta upurkuptinnami awkin profëtaqa bürrunta karunaparqan muntakurkur aywakunanpaq. 24Judápita shamuq profëta aywaykaptinmi juk león yuriparkur wanutsirqan. Nirkurnami bürrupis leonpis ayapa nawpancho ichiraykarqan. 25Tsaypa pasaq runakuna nänicho wanushqa profëta jitaraykaqta y nawpancho león ichiraykaqta rikarmi awkin profëta tashqan markacho wilakurqan.

26Tsayta mayaykurmi awkin profëta kayno nirqan: <<Tsay runaqa Tayta Diosta mana cäsukuq profëtami kashqa. Mana wiyakushqanpitami Tayta Dios kamakätsishqa león wanutsinanpaq. Tayta Dios nishqannölami wanushqa>>.

27Nirkurmi tsurinkunata kayno nirqan: <<Bürruta karunapaykalämay>>.

Niptin tsurinkuna karunaparqan. 28Tsaypita aywarmi awkin profëta tarirqan wanushqa jitaraykaqta y nawpancho bürrupis y leonpis ichiraykaqta. León manami mikurqantsu ayata ni bürrutapis. 29Tsayno kaykaqta tariykurmi ayata bürruman cargarkur markaman aparqan pampananpaq. 30Tsaymi kikinpa sepultüranman ayata churaykur waqarqan kayno nishpan: <<¡Ay wawqilay wawqi! ¿Imanirtaq kachariykamashqanki?>>

31Ayata pamparkurnami tsurinkunata kayno nirqan: <<Noqa wanuptï kay profëtata pampashqantsiman pampaykalämanki. Aytsä ismur ushakaptin tulükunata paypa tulunkuna kashqanman churaykunki. 32Bet-elcho kaykaq altarpa contran y Samaria markakunacho kaykaq altarkunapa contran kay profëta wilakushqanqa lapanpis nishqannölami pasanqapaq>>.

33Jeroboamqa profëta michaykaptinpis Tayta Diosta mana cäsukuypami pitapis cüra kananpaq lutala churarqan. Nirkurmi tsay cürakunata mandarqan markakunacho kaykaq altarkunacho sacrificiukunata rupatsinanpaq. 34Tsayno rurashqan pasaypa jutsa kaptinmi achäqui karqan Jeroboampita miraqkuna Israelcho ushakänanpaq.

Currently Selected:

1 Reyes 13: qvmB

Highlight

Copy

Compare