Arooma 15

Khaazi ya owaatuvelisa azeetthu

1Fweeyo nikhomaaliyeeyo, nina ya ovilela otteettheya wa apale oohikhomaali, nihisala nijituvelisa neenyeweru. 2Wakhula mmote wa fweeyo ona ya ontuvelisa nzaawe khwa saana yawe, yoori ankhomaaze. 3Maana theenya Al-Masiihu khajituveliseeni mweenyeweru, ila nkhama yaatikhiweezo yoori: “Mattukhano a apale anuuttukhanaaye akikwela miiyo.” 4Maana zooshi zaatikhiweeyo asulani zaatikhiwa yoori enisomise, khwa nanna, yoori khwa nthiti na olipiseliwa onlankhaaye Zawaatikhiwa Ttakatthiifu elipisele nroromelo eetthu.

5Nluku otule aninkhaaye nthiti na ominyala, awinkheni mweeyo rooho ya osiilana, khwa Yinsa Al-Masiihu 6yoori khwa rooho moote paasi na huula moote mweeyo mwinttitthimise Nluku na Paapa wa Mbwana eetthu Yinsa Al-Masiihu.

7Nakataalikha, mwikhupalelane mmote na nzeenu, nkhama etthiipo Yinsa ookhupaleyeenini, yoori mwipatthe onttitthimisa Nluku. 8Maana miiyo kiniwuuzani mweeyo yoori Al-Masiihu ajiretta okarumeya wa apale eeyiyeeyo anamakhiriya, khwa pheta ya haakhi ya Nluku, yoori athoonyeze ahiti arettiyeeyo amarehemu apapazetthu; 9yoori amalapo anttitthimise Nluku khwa tthakaraka yawe, nkhama etthiipo yaatikhiweezo yoori:

“Tiito miiyo kinuusifu vakatthi wa amalapo;

kiniipela siifwa nzina lawo.”

10Na theenya khulupa yoori:

“Mwiipe na furaha, oo amalapo, na atthu awe.”

11Na theenya:

“Mwinsifu Mbwana, mooshi mweeyo, amalapo;

mwimwiipele siifwa ye atthu ooshi.”

12Ezaaya theenya alupa yoori:

“Omphutuwa khwa ntathaari wa Yeese,

otule anttelaaye opuwa yoori alokozele vakatthi wa amalapo;

yo anttela ottha nroromelo aya khwa ye”.

13Nluku wa nroromelo ti aweetaaze furaha yooshi na heeri, mwaasa wa omwaamini ye, yoori nroromelo enu weekezeleye khwa owahi wa Rooho Ttakatthiifu.

Khaazi aakhupalaniweeyo Paawulu

14Attwiizaku, miiyo ena kinkhupalela yoori mweeyo mweetaala emaani saaneene na onozeleya, mwina makhaamu a olakana mmote na nzeenu. 15Monkoni wa vitthu kiina zaya, miiyo kawaatikhelani mweeyo woomaruwavo channu, haaswahaaswa yoori kuukupuseleni opheya vitthu zaya epo mwinjuwaazo. Kawaatikhelani mwaasa wa rehema Nluku akinkhiyeeyo, 16ya wiiya karumeya wa Al-Masiihu Yinsa khwa amalapo, nkhama khaazi ya ohaakhimu ya olaleya hapari za Nluku, yoori amalapo aretteye wiiya zaakha yookhupaliwa ti Nluku, oottakatthisiwa ti Rooho Ttakatthiifu.

17Nakataalikha, miiyo kinjittitthimisa khwa Yinsa Al-Masiihu, khwa khaazi yaka kininkholelaaye Nluku. 18Akinjilokozelisa ottakhula etthu woohiiyi etile Al-Masiihu arettiyeeyo khwa miiyo khwa nttakhuzi na vitthu zawooneya yoori kiwaathuule amalapo onshututela Nluku, 19khwa owahi wa alama na mitikiniso na khwa owahi wa Rooho ya Nluku. Etthiipo waaza Yeruzaleemu na nkerekhere mwaya mpakha Eliiriku kalaleya saaneene hapari zooshapweya za Al-Masiihu. 20Wakhula siikhu karetta thenke ya otafusiri hapari zooshapweya ohali Al-Masiihu ahaari ojuwiwaawo, yoori kihikhomaaze vatulu wa nchina la akinoko. 21Ila khapulathi, nkhama etthiipo yaatikhiweezo yoori:

“Anteela omoona apale ahasiliyeeyo alupiwaka,

na enteela oweeleya apale ahansiliyeeyo”.

Paawulu onwaza othotola ojama wa Nluku wa Rooma

22Tiito swaafu za waatta kaakhattaziweeyo ota vakatthi venu mweeyo. 23Ila apha, kiishisiyeevo khaazi yaka mmuti mphu na kaaza raku otakha oteela owoonani, 24kinwaza oretta amana kilawaka Shipaanya. Kinwejela wuuthotolani kiviraka na kiwinkheni mweeyo ruhusa ya okaawuni monkoni wa safwari yaka eto, paata ya opuha vattitthiiru vamote na mweeyo.

25Ila nasaapi eti kineetta Yeruzaleemu, okhola khaazi ya attakatthiifu. 26Maana ojama wa Nluku wa Masetooniya na wa Akaaya aarina furaha ya oshokholeza khwa asikhini ariiye vakatthi wa attakatthiifu a Yeruzaleemu. 27Aarina tuvela wa epo zaya na weekhweele ana sharuthi ya attakatthiifu a Yeruzaleemu. Maana, nkhama amalapo aretta phantte ya parakha ttakatthiifu ya mayaahuuti, ana ya owaarumeyela mayaahuuti theenya na maali zaya. 28Etthiipo, paata ya omarisela khaazi eti na khwiiyana hakiikha yoori yo apwekherela mishumo epi, kinlawa Shipaanya na kinuuthotolani amana kiviraka. 29Kajuwa yoori, amana kita wuuthotolani, kinlawa kiri woolikana na parakha zawaatta za Al-Masiihu.

30Miiyo kinuuvekelani attwiizaku, khwa Mbwana Yinsa Al-Masiihu na khwa pheta ya Rooho Ttakatthiifu, yoori muumane vamote na miiyo nkatthi wa lompa ya Nluku khwa zwaamu yaka. 31Mwilompe yoori akiwerawere atthu a Yudeya apale ahininkhupalaaye Yinsa na yoori khaazi yaka Yeruzaleemu ekhupaleliwe saaneene pi attakatthiifu, 32khwa nanna yoori, miiyo kite kuuthotoleni khwa matakhelo a Nluku, yoori kiwahi ofiya vakatthi venu na furaha kizunkumuze vamote na mweeyo. 33Nluku wa heeri eeye vamote na mweeyo mooshi. Amiina.

Currently Selected:

Arooma 15: eko

Highlight

Compare

Copy