Arooma 16

Salamu na Mihupi

1Kinuuperekhezani mweeyo, nlupweetthu Feebe karumeya wa ojama wa Nluku wa Senkereeya. 2Kinuuvekelani yoori mwimpwekherele khwa nzina la Mbwana khwa nanna anrettaazo attakatthiifu, na mwimwaawuni khwa wakhula etile enihithajiyaaye, maana ye oniwaawunaka atthu enkeene hatha na miiyo.

3Salamu Pirisiila na Akiila, ashirikha aka nkatthi wa khaazi ya Yinsa Al-Masiihu. 4Yo aaleviye ohaayi aya mwaasa wa miiyo. Kiniwaashukhurwela venkivene, khahiyo otthome paasi, ila na amalapo ooshi a ojama wa Nluku. 5Salamu theenya ojama wa Nluku onkusanyeyaaye vaje vaya. Salamu mphetani aka ttwiiyaku Epeneetu, mwanzo wa onkhupali Al-Masiihu nti wa Aaziya. 6Salamu Mariyamu, akholiyeeyo khaazi venkivene khwa mweeyo. 7Salamu Antorooniku na Juuniya, ajaama zaku kaariina nkalapooso. Yo pi ooshitahiwa saaneene nkatthi wa maaswihaapa, na eeya anamalottela a Al-Masiihu khapulathi ya miiyo. 8Salamu Ampiliyaato, mphetani aka na ttwiiyaku khwa Mbwana. 9Salamu Urupaanu, nshirikha eetthu khwa khaazi ya Al-Masiihu, na mphetani aka ttwiiyaku Shitaakhisi.

10Salamu Apeleeshi, woohakikhiwa khwa Al-Masiihu. Salamu atthu a owawe Arishitopoolu. 11Salamu Herotiyaawu, jamaayaku. Salamu atthu a owawe Narisiizu, ariiye wa Mbwana. 12Salamu Tirifeena na Tirifooza, aakha ankholaaye khaazi venkivene ya Mbwana. Salamu mphetani aka Peresiti naye akholiyeeyo khaazi venkivene khwa Mbwana. 13Salamu Ruufu, namathawuliwa wa Mbwana, na mamaawe othuuto eeyiye maama theenya khwa miiyo.

14Salamu Ashikiriitu, Folekonte, Heerimeshi, Patoropa, Heermashi na attwi ooshi ari vamote na yo. 15Salamu Filooloku, Juuliya, Nereewu na nlupuwe na theenya Oliipa na attakatthiifu ooshi ari vamote na yo. 16Mwichelisane mmote na nzeenu na salamu ttakatthiifu. Ojama wooshi wa Al-Masiihu omperekha salamu.

Shawuri za wiishela

17Kinuuvekelani attwiizaku, yoori mwiiyane phoole na apale antanaaye waawanyeya na ottha tafwawuthi khwa masomi apale mweeyo mwipwekhereliyeeyo. Apo aya mwiwaasuse. 18Maana atthu aya apo khaninrumeyela Al-Masiihu, Mbwana eetthu, ila tuvela zaya ennyewe. Khwa mattakhuzi awoolowa na ottettekha, anhata rooho za apale oottettekheya. 19Atthu ooshi ansiila olupiwaka oshututi weenu, tiito, kiwoofurahi monkoni weenu mweeyo; na kintakha yoori mwiiye aakhili khwa zooshapweya na mwihisala mwijaliwa ti hatha etthu moote yootakhala. 20Woohirupazi Nluku wa heeri onteela omphwantta epiliisi vathi wa moolu enu mweeyo. Rehema ya Mbwana eetthu Yinsa yiiye na mweeyo.

21Timootiyu nshirikha aka wa khaazi ooperekhezani salamu, nkhama etthiipo Luusiyu, Yaso na Sosipaaturu, ajamaazaku. 22Miiyo, Terisiyu, kaatikhiyeeyo warakha eti, kinuuperekhezani salamu khwa nzina la Mbwana. 23Kaayu kammakeliyeeyo, ottuukho onkusanyeyaawo ojama wooshi wa Nluku omperekha salamu. Eraashitu namapweha nzurukhu wa nsitati na ttwiiyetthu Kwaarutu amperekha salamu. 24Rehema ya Mbwana eetthu Yinsa Al-Masiihu yiiye vamote na mweeyo mooshi amiina.

25Apho, otule ariina owahi wa wuuhakikhini khwa hapari zooshapweya zaka, na olaleyiwa wa Yinsa Al-Masiihu, khwa nanna ya othoonyeziwa wa siiri zoovitheya khwa wakathi oviriyeeyo, 26ila nasaapi eti zathoonyeziwa na enkhiwa ojuwa khwa zawaatikhiwa za manapiyu, khwa oruma wa Nluku wa mileele, yoori khapila zooshi zinkhupali ye na enshututele; 27aaa, Nluku mmote paasi wa akhili enkhiwe siifwa mileele zene, khwa Yinsa Al-Masiihu. Amiina.

Currently Selected:

Arooma 16: eko

Highlight

Compare

Copy